കാര്‍ത്തിക ദീപം, മഞ്ഞില്‍ വിരിഞ്ഞ പൂവ് എന്നിങ്ങനെ രണ്ട് പരമ്പരകളിലെയും വില്ലത്തി കഥാപാത്രമായെത്തി പ്രേക്ഷക പ്രീതിനേടിയ താരമാണ് ജിസ്മി.
അടുത്തിടെ ജിസ്മിയും ഭര്‍ത്താവ് ഷിന്‍ജിത്തും തങ്ങളുടെ ഒന്നാം വിവാഹ വാര്‍ഷികത്തിന്റെ ഭാഗമായി ഇന്‍സ്റ്റാഗ്രാമിലൂടെ ചോദ്യോത്തരങ്ങൾ പങ്കുവയ്ക്കുകയുണ്ടായി. അതിലൂടെ ആരാധകരുടെ ചോദ്യങ്ങള്‍ക്കും സംശയങ്ങള്‍ക്കുമെല്ലാം ഉത്തരം നല്‍കുകയായിരുന്നു ജിസ്മി. അപ്പോഴാണ് ആരാധകരുടെ ഇടയിൽ നിന്നും കാര്‍ത്തിക ദീപം, മഞ്ഞില്‍ വിരിഞ്ഞ പൂവ് എന്നിങ്ങനെ രണ്ട് പരമ്പരകളിലെയും വില്ലത്തി കഥാപാത്രങ്ങളെ ഒരുമിച്ചു കൊണ്ടു പോകുന്നത് എങ്ങനെയെന്ന ചോദ്യം ഉയർന്നത്. ”എന്നെ സംബന്ധിച്ചിടത്തോളം അത് വലിയൊരു ടാസ്‌ക് തന്നെയാണ് പക്ഷെ ഞാനത് ആസ്വദിച്ചാണ് ചെയ്യുന്നതെന്നും” ജിസ്മി മറുപടി പറഞ്ഞു. രണ്ടുപരമ്പരകളില്‍ കൂടിയും നല്ല വരുമാനം കിട്ടുന്നുണ്ടാകുമല്ലോ? അപ്പോള്‍ എത്രയാണ് ശമ്പളം എന്ന ചോദ്യത്തിന് പെണ്‍കുട്ടികളുടെ പ്രായവും ശമ്പളവും ചോദിയ്ക്കാന്‍ പാടില്ല എന്നാണ് ജിസ്മിയുടെ മറുപടി.
എന്താണ് സ്വപ്നം എന്ന ചോദ്യത്തിന് ‘നല്ലൊരു ഭാര്യ ആയിരിക്കുക. നല്ലൊരു അമ്മ ആവുക, പിന്നെ നല്ലൊരു നടിയും’ എന്നാണ് ജിസ്മിയുടെ മറുപടി.
