കാസർകോട്: കാസർകോട്: ഗൾഫിൽ നിന്നും ഞായറാഴ്ച ഉച്ചയ്ക്ക് നാട്ടിലേക്ക് വിളിച്ചു വരുത്തിയ യുവാവിനെ ദുരുഹ സാഹചര്യത്തിൽ മരിച്ച നിലയിൽ കണ്ടെത്തി. യുവാവിനെ ക്രിമിനൽ സംഘം തട്ടികൊണ്ടുപോയി കൊലപ്പെടുത്തിയ ശേഷം ആശുപത്രിയിലെത്തിച്ച് മുങ്ങിയതായാണ് പോലീസ് സംശയിക്കുന്നത്. കാസർകോട് കുമ്പള മുഗുവിലാണ് സംഭവം.
മുഗു സ്വദേശി അബൂബക്കർ സിദ്ദീഖ് (32) ആണ് മരിച്ചത്. ഞായറാഴ്ച രാത്രിയോടെയാണ് ഒരു സംഘം ആളുകൾ യുവാവിനെ ആശുപത്രിയിലെത്തിച്ചത്. ആശുപത്രിയിലെത്തിച്ചെങ്കിലും യുവാവ് മരണപ്പെട്ടിരുന്നു. മരണം ഉറപ്പിച്ചതോടെ ആശുപത്രിയിലെത്തിച്ചവർ വന്ന വാഹനത്തിൽ തന്നെ കടന്നു കളയുകയായിരുന്നു. ഇതേ തുടർന്നാണ് ആശുപത്രി അധികൃതർക്ക് സംശയം തോന്നിയത്. ഉടൻ കുമ്പള പോലീസിൽ വിവരമറിയിച്ചു. പോലീസെത്തി പ്രാഥമികമായി നടത്തിയ അന്വേഷണത്തിലാണ് മരണത്തിൽ സംശയം പ്രകടിപ്പിച്ചത്. ബന്തിയോട്ടെ സ്വകാര്യ ആശുപത്രിയിലാണ് സംഘം അടിയേറ്റ പരിക്കുകളോടെ സിദ്ദീഖിനെ എത്തിച്ചത്.
ചില ഇടപാടുമായി ബന്ധപ്പെട്ട് സിദ്ദീഖിന്റെ രണ്ട് ബന്ധുക്കളെ പൈവളിഗെ സ്വദേശികളായ ചിലർ രണ്ട് ദിവസം മുമ്പ് തട്ടിക്കൊണ്ട് പോയിരുന്നതായി പറയപ്പെടുന്നു. ഇവരെ ബന്ദികളാക്കിയാണ് സിദ്ദീഖിനെ ഗൾഫിൽ നിന്നും നാട്ടിലേക്ക് വിളിച്ചുവരുത്തി തട്ടികൊണ്ടു പോയതെന്നാണ് പറയുന്നത്. മൃതദ്ദേഹം പോസ്റ്റുമോർട്ടത്തിനായി തിങ്കളാഴ്ച പരിയാരം മെഡിക്കൽ കോളേജിലേക്ക് കൊണ്ടു പോവും. പോലീസ് പ്രതികൾക്കായി അന്വേഷണം ഊർജിതമാക്കിയിട്ടുണ്ട്.
