തന്റെ അനുഭവം ഇടതുപക്ഷത്തോടെന്നും സിനിമയില്‍ ലൈംഗീക ചുവയുള്ള പെരുമാറ്റങ്ങള്‍ക്കു നോ പറഞ്ഞതുമൂലം വേഷങ്ങള്‍ നഷ്ടമായിട്ടുണ്ടെന്നും നടി കനി കുസൃതി തുറന്നു പറഞ്ഞു. റിപ്പോര്‍ട്ടര്‍ ടി വിയിലെ മീറ്റ് ദി എഡിറ്റേഴ്സ് എന്ന പരിപാടിയില്‍ സംസ്ഥാന അവാര്‍ഡ് നേടിയ ബിരിയാണിയുടെ വിശേഷങ്ങള്‍ പങ്കുവെക്കുമ്ബോഴാണ് നടി ഇത്തരത്തില്‍ പറയുകയുണ്ടായത്. സിനിമയില്‍ സംവരണം വേണമെന്നും കനി കുസൃതി ആവശ്യപ്പെടുകയുണ്ടായി.
‘സിനിമയില്‍ വന്ന കാലത്ത് ഒരാള്‍ വിളിച്ചു ജയശ്രീ ചേച്ചിയോട്(അമ്മയോട്) അഡ്ജസ്റ്റ് ചെയ്യാന്‍ ആവശ്യപ്പെട്ടു. എന്നാല്‍ അമ്മയ്ക്ക് അത് മനസിലായില്ല. പണ്ടുമുതലേ നോ പറയാനുള്ള ധൈര്യം ഉണ്ടായിരുന്നതുകൊണ്ട് നേരിട്ട് ഇത്തരം അനുഭവങ്ങള്‍ ഉണ്ടായിട്ടില്ല. എന്നാല്‍ ഫോണില്‍ വിളിച്ച്‌ രാത്രി സ്ക്രിപ്റ്റ് പറയുക, പിന്നീട് അതിന്റെ ചുവ മാറുക അതൊക്കെ ഉണ്ടായിട്ടുണ്ട്. ഫോണ്‍ കട്ട് ചെയ്യും. പിന്നീട് ആ സിനിമ വേറെ നടിയെ വെച്ച്‌ പുറത്തിറങ്ങുകയും ചെയ്യും. അത്തരം അനുഭവങ്ങള്‍ ഉണ്ടായിട്ടുണ്ട്’, കനിയുടെ വാക്കുകള്‍.
താന്‍ ഒരു ഇടതുപക്ഷ അനുഭാവി ആണെന്നും എന്നാല്‍ മെച്ചപ്പെട്ട രാഷ്ട്രീയ കാഴ്ചപാടുകള്‍ ഉന്നയിക്കുന്ന, അത് രാഷ്ട്രീയ എതിര്‍പ്പുകള്‍ ഉള്ള വ്യക്തി ആയാലും കേള്‍ക്കാന്‍ ഇഷ്ടമാണെന്നും കനി പറഞ്ഞു.സിനിമയില്‍ ദളിത് പിന്നോക്ക ന്യൂനപക്ഷത്തിന് സംവരണം നല്‍കണമെന്നും ന്യൂനപക്ഷങ്ങള്‍ക്കു വിദ്യാഭ്യാസ സ്കോളര്‍ഷിപ്പ് പോലുള്ള സഹായങ്ങള്‍ നല്‍കുവാന്‍ സംസ്ഥാനം മുന്‍കൈയെടുക്കണമെന്നും കനി ആവശ്യപ്പെടുകയുണ്ടായി.
നടിയെന്ന നിലയിലും കാഴ്ചക്കാരി എന്ന നിലയിലും ബിരിയാണിയുടെ രാഷ്ട്രീയത്തോട് യോജിപ്പില്ല. സിനിമ ഉന്നയിക്കുന്ന രാഷ്ട്രീയം തല്‍ക്കാലം പറയാന്‍ നിര്‍വാഹമില്ല. ഒരു പിന്നോക്ക വിഭാഗം മുസ്ലിം സ്ത്രീയും അവരുടെ അമ്മയും അനുഭവിക്കുന്ന ബുദ്ധിമുട്ടുകളാണ് ചിത്രത്തിന്റെ കഥ. ഈ കഥ ഒരു ആണ്‍കാഴ്ചയല്ലേ എന്ന് തോന്നിയിട്ടുണ്ട്. അത് സംവിധായകനോട് തുറന്നു പറയുകയും ചെയ്തു. സജിന്‍ ബാബുവാണ് ചിത്രത്തിന്റെ സംവിധായകന്‍. സജിന്‍ കഥയില്‍ കണ്‍വിന്‍സ്ഡ് ആയിരുന്നു’, ബിരിയാണി ഉന്നയിക്കുന്ന രാഷ്ട്രീയത്തെ കുറിച്ച്‌ കനി പറഞ്ഞു.
ചിത്രത്തിലെ പ്രണയരംഗത്തിലെ ന്യൂഡിറ്റി പ്രേക്ഷകര്‍ എങ്ങനെ സ്വീകരിക്കുമെന്ന് താന്‍ ഭയപെടുന്നില്ലെന്നും ഒരു അഭിനേതാവിന് ഒരു സിനിമയില്‍ അഭിനയിക്കുന്ന കാര്യങ്ങളില്‍ നൂറു ശതമാനം ഉത്തരവാദിത്വം എടുക്കാന്‍ പറ്റുമോ എന്ന കാര്യത്തില്‍ ഉറപ്പില്ല. രാഷ്ട്രീയപരമായ വിയോജിപ്പുള്ള കഥ, അല്ലെങ്കില്‍ സംവിധായകര്‍ ഇവരോടൊപ്പം വര്‍ക്ക് ചെയ്യേണ്ടി വരും എന്നും നടി കൂട്ടിച്ചേര്‍ത്തു. സംവിധാനം ചെയ്യാന്‍ താല്പര്യമില്ലെന്നും എന്നാല്‍ സ്ക്രിപ്റ്റിംഗ് സമയത്ത് കഥയില്‍ ഇന്‍വോള്‍വ് ചെയ്യാറുണ്ടെന്നുമാണ് സംവിധാനം നിര്‍വഹിക്കാന്‍ സാധ്യതയുണ്ടോ എന്നുള്ള ചോദ്യത്തിന് കനി നല്‍കിയ ഉത്തരം.
കേരളം കഫേയിലെ ഐലന്‍ഡ് എക്സ്പ്രസ്സ് എന്ന ചിത്രത്തിലൂടെയാണ് കനി കുസൃതി വെള്ളിത്തിരയില്‍ എത്തിയത്. തുടര്‍ന്ന് കോക്ക്ടെയില്‍, ശിക്കാര്‍ തുടങ്ങിയ ചിത്രങ്ങളെ പ്രകടനങ്ങളിലൂടെ ശ്രദ്ധേയായി. കനി പ്രധാനവേഷത്തില്‍ എത്തിയ ബിരിയാണിക്ക് സംസ്ഥാന പുരസ്‌കാരത്തിന് പുറമേ നിരവധി അന്തര്‍ദേശിയ പുരസ്‌കാരണങ്ങളാണ് ലഭിച്ചുകൊണ്ടിരിക്കുന്നത്.
