പുരുഷന്മാരും സ്ത്രീകളും തെറ്റുചെയ്തിട്ടുണ്ടെങ്കിൽ മാധ്യമങ്ങൾ തുല്യമായി രണ്ടുപേരേയും പുറത്തുകാണിക്കണമെന്ന് നടി പ്രിയങ്ക അനൂപ്. മെൻസ് അസോസിയേഷനും രാഹുൽ ഈശ്വറിനും പിന്തുണയുമായി വാർത്താ സമ്മേളനത്തിൽ സംസാരിക്കുകയായിരുന്നു നടി. എന്തിനാണ് എല്ലാക്കാര്യത്തിലും സ്ത്രീകളെ മാത്രം പിന്തുണയ്ക്കുന്നതെന്നു ചോദിച്ച നടി മെൻസ് കമ്മീഷൻ വരികയാണെങ്കിൽ അത് പുരുഷന്മാരെ സംബന്ധിച്ചിടത്തോളം വലിയൊരു കാര്യമാണെന്നും അഭിപ്രായപ്പെട്ടു.
പുരുഷന്മാർക്ക് വേണ്ടി സംസാരിക്കാനും നിയമം കൊണ്ടുവരാനും കമ്മീഷൻ ആവശ്യമാണ്. പല കേസുകളിലും സ്ത്രീകളുടെ പേരോ മുഖമോ പുറത്തുവരില്ല, പുരുഷന്മാരുടേത് വരുന്നു. കേസ് വ്യാജമാണെന്ന് തെളിയുമ്പോൾ എന്താണ് സംഭവിക്കുന്നത്. ആ വ്യാജ കേസിൽ അകപ്പെട്ട പുരുഷന്റെ വീട്ടിലും അമ്മയും ഭാര്യയുമൊക്കെയില്ലേ.. പുരുഷന്മാർക്ക് പലപ്പോഴും നീതി ലഭിക്കാറില്ല. ആരെന്ത് പറഞ്ഞാലും ഞാൻ പുരുഷന്മാരുടെ കൂടെ നിൽക്കും. പുരുഷന്മാരെ സപ്പോർട്ട് ചെയ്യും. തന്നേക്കാൾ ഒരുപടി മുകളിലാണ് പുരുഷന്മാർക്ക് സ്ഥാനം നൽകിയിരിക്കുന്നത്. ഈ സംഘടനയ്‌ക്ക് എല്ലാവിധ ഭാവുകങ്ങളും നേരുകയാണെന്നും പ്രിയങ്ക പറഞ്ഞു.
ഒരുപാട് നിയന്ത്രിച്ച് വീട്ടിൽ തളച്ചിടേണ്ട ആളുകളല്ല പുരുഷന്മാർ, പ്രത്യേകിച്ച് ഭർത്താക്കന്മാർ. 20 വർഷം കേസ് നടത്തി വിജയിച്ചയാളാണ് താനെന്നും താനെത്ര സഹിച്ചിട്ടുണ്ടാവുമെന്നും അവർ ചോദിച്ചു. വാർത്താ സമ്മേളനത്തിൽ പുരുഷ കമ്മീഷന്റെ കരട് പ്രിയങ്കയ്ക്ക് രാഹുൽ ഈശ്വർ കൈമാറി.
