മലയാളികളെ ഏറെ ചിരിപ്പിച്ച ചിത്രങ്ങളിലൊന്നായിരുന്നു അമർ അക്ബർ അന്തോണി. പൃഥ്വിരാജ്, ഇന്ദ്രജിത്ത്, ജയസൂര്യ എന്നിവരായിരുന്നു ചിത്രത്തിൽ പ്രധാന വേഷങ്ങളിലെത്തിയത്. നടൻ രമേഷ് പിഷാരടിയും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിച്ചിരുന്നു. നല്ലവനായ ഉണ്ണി എന്ന ആ കഥാപാത്രത്തിന് വൻ സ്വീകാര്യതയും ലഭിച്ചു. സിനിമയിൽ ഉണ്ണിയുടെ അച്ഛൻ ആശുപത്രിയിൽ കിടക്കുമ്പോൾ ഷർവാണി ഇട്ട് വരുന്ന ഒരു സീൻ ഉണ്ട്.തിയറ്ററിൽ പൊട്ടിച്ചിരി പടർത്തിയ സീനുകളിൽ ഒന്നായിരുന്നു ഇത്. ഇപ്പോഴിതാ സിനിമ ഇറങ്ങിയതിന് ശേഷം ഷർവാണി ഇട്ട് എങ്ങും പോകാറില്ലെന്ന് പറയുകയാണ് പിഷാരടി.
“ആ സിനിമയിൽ ഒരു വേഷം ചെയ്തിട്ടുണ്ട് നല്ല വേഷം, നല്ലവനായ ഉണ്ണി. അതിൽ പിന്നെ എനിക്ക് ഷർവാണി ഇടാൻ പറ്റാതെയായി. ആ സിനിമയ്ക്ക് ശേഷം കല്യാണത്തിനോ കാത് കുത്തലിനോ ഷർവാണി ഇട്ട് പോയിട്ടില്ല. ഇത് ഇട്ടാൽ അപ്പോൾ നല്ലവനായ ഉണ്ണി എന്ന പേര് വരും”, രമേഷ് പിഷാരടി പറഞ്ഞു.
