ബിഗ് ബോസ് മലയാളം സീസൺ ഫൈവ് വിജയിയായിരുന്നു അഖിൽ മാരാർ. അൻപത് ലക്ഷം രൂപയും ഇതിനൊപ്പം മാരുതി സുസുക്കിയുടെ പുതിയൊരു കാറും താരത്തിന് സമ്മാനമായി ലഭിച്ചിരുന്നു. സംവിധായകനായി ആയിരുന്നു എന്റർടൈൻമെന്റ് ഇൻഡസ്ട്രിയൽ തുടക്കമെങ്കിലും ബിഗ് ബോസ് റിയാലിറ്റി ഷോയിൽ മികച്ച പ്രകടനം കാഴ്ചവച്ചതോടെ ആയിരുന്നു അഖിലിന് പ്രേക്ഷക പിന്തുണയും പ്രീതിയും കൂടിയത്. ബിഗ് ബോസിന് ശേഷവും താരം സോഷ്യൽ മീഡിയയിലൂടെ തന്റെ വിശേഷങ്ങളും ഉയർച്ചകളും എല്ലാം തന്നെ ആരാധകരോട് പങ്കുവയ്ക്കുമായിരുന്നു. തന്റെ സോഷ്യൽ മീഡിയ സ്വാധീനം ഉപയോഗിച്ച് ബിസിനസ് മെച്ചപ്പെടുത്തിയതുമെല്ലാം താരം ആരാധകരോട് പങ്കുവെച്ചിരുന്നു. ഈയടുത്ത് ഒരു മണിക്കൂറിൽ ഒരു ലക്ഷം രൂപ സമ്പാദിക്കുന്ന നിലയിലേക്ക് താൻ വളർന്നുവെന്നും താരം വെളിപ്പെടുത്തിയിരുന്നു. അപ്പോഴെല്ലാം അഖിൽ നിരന്തരം കേട്ടുകൊണ്ടിരുന്ന വിമർശനം ആയിരുന്നു എന്തുകൊണ്ട് മാതാപിതാക്കളെയും ഈ നിലയ്ക്ക് പരിഗണിക്കുന്നില്ല എന്നും അമ്മ ഇപ്പോഴും തൊഴിലുറപ്പ് ജോലിക്ക് പോകുന്നതിന് പിന്നിലെ കാരണമെന്ത് എന്നുള്ളതും. ഇപ്പോഴിതാ താൻ അമ്മയെയും കുടുംബത്തെയും തഴഞ്ഞുവെന്ന ചോദ്യങ്ങൾക്ക് അമ്മയ്ക്കൊപ്പമുള്ള വീഡിയോ സഹിതം ഉത്തരവുമായി രംഗത്തെത്തിയിരിക്കുകയാണ് അഖിൽ.
തന്റെ എല്ലാ ആവശ്യങ്ങളും മകൻ നിറവേറ്റിത്തരുന്നുണ്ടെന്നും തന്റെ കൂട്ടുകാർക്കൊപ്പം സമയം ചെലവഴിക്കാനാണ് താൻ തൊഴിലുറപ്പിന് പോകുന്നത് എന്നാണ് വിഡിയോയിൽ താരത്തിന്റെ അമ്മ പറയുന്നത്. എത്രയോ വർഷങ്ങളായി ഇങ്ങനെയാണ്. തൊഴിലുറപ്പിൽ നിന്ന് കിട്ടുന്ന പണം കൊണ്ടല്ല താൻ ജീവിക്കുന്നത്. തന്റെ ഒരു മാനസികോല്ലാസത്തിന് തനിക്ക് തൊഴിലുറപ്പിന് പോകണമെന്നും അമ്മ വീഡിയോയിൽ പറയുന്നു
ആൾക്കാര് പറയുന്നത് പോലെ തന്റെ മകൻ നിർബന്ധിച്ച് പറഞ്ഞുവിടുന്നതല്ല. ഇതിലൊന്നും ജനങ്ങൾ വല്ലാതെ ബുദ്ധിമുട്ടണ്ട. ഞങ്ങളുടെ ജീവിതത്തിൽ ബുദ്ധിമുട്ടോ, പ്രയാസമോ ഇല്ലെന്നും ഞങ്ങൾ സാധരണക്കാരായി ജീവിക്കാനാണ് ആഗ്രഹിക്കുന്നതെന്നും അമ്മ പറഞ്ഞു. ആശുപത്രിയിലേക്ക് ബസ്സിന് പോകുന്നതുമെല്ലാം സ്വന്തം താൽപര്യങ്ങളുടെ ഭാഗമായാണെന്നും അഖിൽ മാരാരുടെ അമ്മ പറയുന്നു
അഖിലും പിതാവുമായുള്ള വഴക്കിനെ കുറിച്ചും അമ്മ പറയുന്നുണ്ട്. അച്ഛനും മകനുമായുള്ള വഴക്ക് സ്വാഭാവികമല്ലേ എന്നും അതൊക്കെ കുടുംബത്തിലെ കാര്യങ്ങളല്ലേ, അതൊക്കെ വലിച്ചിഴക്കേണ്ട കാര്യമുണ്ടോ എന്നാണ് അമ്മ ചോദിക്കുന്നത്. പലയിടത്തു നിന്നും കേൾക്കുന്നത് ഫേസ്ബുക്കിൽ പറയുക, അധിക്ഷേപിക്കാൻ ശ്രമിക്കുക, ഇതിലൊക്കെ എന്ത് നേട്ടമാണ് ലഭിക്കുന്നത് എന്നാണ് അമ്മ ചോദിക്കുന്നത്. വീഡിയോയിൽ അമ്മയുടെ തൊഴിലുറപ്പ് കൂട്ടുകാരെയും അഖിൽ കാണിക്കുന്നുണ്ട്.
