കൊയിലാണ്ടി : പൊലീസ് സ്‌റ്റേഷന്റെ വിളിപ്പാടകലെയുള്ള മേഖലകളിൽ വീണ്ടും മോഷണം. ഇന്നലെ പുലര്‍ച്ചെ രണ്ടു മണിയോടെ പാലക്കുളം പൊക്കനാരി ഷാഹിനയുടെ വീട്ടിൽ മോഷണം നടന്നു. വീടിന് പുറകുവശത്തെ വാതില്‍ കുത്തിത്തുറന്ന് അകത്തു കയറിയ കള്ളൻ, ഉറങ്ങിക്കിടക്കുകയായിരുന്ന ഷാഹിനയുടെ കഴുത്തില്‍ നിന്നും 3 പവന്റെ സ്വര്‍ണമാല പൊട്ടിച്ചെടുത്തു.
ഉടനെ ഉറക്കത്തില്‍ നിന്നും ഞെട്ടിയുണര്‍ന്ന ഷാഹിന ഭര്‍ത്താവിനെ വിളിച്ച് കാര്യം പറയുകയായിരുന്നു. തുടര്‍ന്ന് കൊയിലാണ്ടി പൊലീസില്‍ വിവരമറിയിച്ചു. പൊലീസ് അന്വേഷണം ആരംഭിച്ചു. ഷാഹിനയും ഭര്‍ത്താവും മാത്രമാണ് വീട്ടിലുണ്ടായിരുന്നത്. ഇവരുടെ മകന്‍ ഉമര്‍ ഷെഫീല്‍ കോഴിക്കോടുള്ള ഭാര്യ വീട്ടില്‍ പോയിരുന്നു
. അടുത്തിടെയായി കൊയിലാണ്ടിയില്‍ മോഷണം പതിവായിരിക്കുകയാണ്. ആളില്ലാത്ത സമയം മനസ്സിലാക്കി വീട്ടിനുള്ളില്‍ കയറിയാണ് മോഷണം. പാലക്കുളത്തേത് ഇതിനകം മൂന്നു വീട്ടമ്മമാരുടെ മാലയാണ് മോഷ്ടാക്കള്‍ കവർന്നത്. ആനക്കുളത്തും കൊയിലാണ്ടി കൊരയങ്ങാട് തെരുവിലുമാണ് നേരത്തെ കവർച്ച നടന്നത്
