മുടി വളരാന്‍, മുടി കൊഴിച്ചില്‍ നിര്‍ത്താന്‍ പല വഴികളും നോക്കുന്നവരാണ് എല്ലാവരും. ഇതിനായി കയ്യില്‍ കിട്ടുന്ന പല ഹെയര്‍ പായ്ക്കുകളും പരീക്ഷിയ്ക്കും, പരസ്യത്തില്‍ കാണുന്ന ഉല്‍പന്നങ്ങള്‍ വാങ്ങി പരീക്ഷിയ്ക്കും, എന്നാല്‍ കാര്യമായ ഗുണം ഉണ്ടാകില്ലെന്ന് മാത്രമല്ല, ചിലപ്പോള്‍ പാര്‍ശ്വഫലവുമുണ്ടാകും. മുടി കൂടുതല്‍ കൊഴിയും. വാസ്തവത്തില്‍ ചില അടിസ്ഥാനകാര്യങ്ങളില്‍ ശ്രദ്ധ വച്ചാല്‍ തന്നെ മുടി കൊഴിച്ചില്‍ മാറാനും മുടി വളരാനും വഴിയുണ്ട്.
കഴുകേണ്ടതില്ല
മുടി ദിവസവും കഴുകണോ വേണ്ടയോ, എതാണ് മുടിയുടെ ആരോഗ്യത്തിന് നല്ലതെന്ന സംശയം പലര്‍ക്കുമുണ്ടാകും. വാസ്തവത്തില്‍ മുടി ദിവസവും കഴുകേണ്ടതില്ല. . കാരണം കുളിയ്ക്കുമ്പോഴും ഇതിന് ശേഷവും വേണ്ട രീതിയില്‍ പരിപാലിച്ചില്ലെങ്കില്‍ മുടി കൊഴിയാന്‍ സാധ്യതയേറെയാണ്. ഇതിനാല്‍ രണ്ടു ദിവസം കൂടുമ്പോഴോ മറ്റോ മുടി കഴുകിയാല്‍ മതി. എന്നാല്‍ വല്ലാതെ ചൂടും വിയര്‍പ്പും ചെളിയുമെല്ലാം തലയില്‍ പറ്റുന്ന സാഹചര്യമെങ്കില്‍ ദിവസവും തല കഴുകാം. അല്ലാത്തപക്ഷമാകും മുടി പോകുക. ഇത് നിങ്ങളുടെ സാഹചര്യം പോലെ ചെയ്യാം.
നട്‌സ്
മുടിയ്ക്ക് പുറമേ നിന്ന് വേണ്ടതില്‍ കൂടുതല്‍ പോഷകങ്ങള്‍ ഉള്ളില്‍ നിന്നാണ് വേണ്ടത്. ബയോട്ടിന്‍, വൈറ്റമിനുകള്‍, പ്രോട്ടീന്‍, അയേണ്‍ എല്ലാം മുടിയ്ക്ക് അത്യാവശ്യമാണ്. ഇവയുടെ കുറവ് ശരീരത്തിനൊപ്പം മുടിയ്ക്കും ചര്‍മത്തിനും പ്രശ്‌നമുണ്ടാക്കും. പോഷകസമ്പുഷ്ടമായ, ആരോഗ്യകരമായ ഭക്ഷണങ്ങള്‍ കഴിയ്ക്കാം. നെല്ലിക്ക, നട്‌സ്, മുട്ട, ഇലക്കറികള്‍, പച്ചക്കറികള്‍, മീന്‍, ഇറച്ചി, പരിപ്പ് എല്ലാം മുടിയ്ക്ക് നല്ലതാണ്.
മുടിയുടെ തരം നോക്കി
ആരോഗ്യകരമായ നാച്വറല്‍ ഹെയര്‍ മാസ്‌കുകള്‍ ഇടയ്ക്ക് ഉപയോഗിയ്ക്കാം. മുടിയുടെ തരം നോക്കി ഉപയോഗിയ്ക്കുക. ഉദാഹരണത്തിന് വല്ലാതെ വരണ്ട മുടിയുള്ളവര്‍ ഹെന്ന പോലുള്ളവ ഉപയോഗിയ്ക്കുമ്പോള്‍ മുടിയ്ക്ക് എണ്ണമയം നല്‍കുന്ന കൂട്ടുകള്‍ കൂടി ചേര്‍ക്കണം. ഓയില്‍ മസാജ് ആഴ്ചയില്‍ രണ്ടോ മൂന്നോ തവണ ചെയ്യുന്നത് നല്ലതാണ്.
മുടി ഉണക്കുമ്പോള്‍
നനഞ്ഞ മുടി ഉണക്കുമ്പോള്‍ ശ്രദ്ധ വേണം. ഹെയര്‍ഡ്രയര്‍ ഉപയോഗിയ്ക്കരുത്. മുടി വല്ലാതെ അമര്‍ത്തി തോര്‍ത്തരുത്. നനഞ്ഞ മുടി ചീകരുത്. മുടിത്തുമ്പ് വെട്ടുന്നത് മുടിയുടെ ആരോഗ്യം സംരക്ഷിയ്ക്കാന്‍ നല്ലതാണ്. ഇതുപോലെ സില്‍ക് തലയിണക്കവറുകള്‍ ഉപയോഗിയ്ക്കാം. ഇത് മുടി നഷ്ടപ്പെടുന്നത് കുറയ്ക്കും. മുടി വല്ലാതെ ഇറുക്കിക്കെട്ടരുത്. മുടിയ്ക്കും ഓക്‌സിജന്‍ വേണം. സ്‌ട്രെസ് പോലുള്ളവ ഒഴിവാക്കുക. ഇത് മുടി പോകാനും നരയ്ക്കാനുമെല്ലാം ഇടയാക്കും.
