ഒടിടി പ്ലാറ്റ്‌ഫോമുകൾ ഇന്ത്യയിൽ അതിവേഗം വളരുകയാണ്. ഡിജിറ്റൽ സ്‌പേസിനായി കണ്ടന്‍റുകള്‍ സൃഷ്ടിക്കാന്‍ മുന്‍നിര നിര്‍മ്മാതാക്കളും സംവിധായകരും രംഗത്ത് എത്തിയിട്ടുണ്ട്. ഈ വലിയ മാറ്റം സംഭവിക്കുമ്പോൾ ബിഗ് സ്ക്രീനിലെ താരങ്ങള്‍ ഇത്തരം ഒടിടി പ്രൊഡക്ഷനുകളുടെ ഭാഗമാകാനും സമയം കണ്ടെത്തുന്നുണ്ട്. ഇത്തരത്തില്‍ ഒരു നടി ബോളിവുഡിലെ ചില വലിയ താരങ്ങളെ മറികടക്കുന്ന പ്രതിഫലമാണ് സമീപകാല പ്രൊജക്ടില്‍ നേടിയത്.
ഇന്ത്യയിലെ ഒടിടിയില്‍ ഏറ്റവും കൂടുതൽ പ്രതിഫലം വാങ്ങുന്ന നടിയായി മാറിയിരിക്കുകയാണ് സാമന്ത.വ്യക്തിപരവും ആരോഗ്യപരവുമായ കാരണങ്ങളാല്‍ വലിയ ഹിറ്റുകള്‍ ഒന്നും തന്നെ രണ്ട് വര്‍ഷത്തോളമായി സാമന്തയ്ക്ക് ഇല്ല. എന്നാല്‍ രാജ് ഡികെയുടെ സ്‌പൈ-ത്രില്ലർ സീരിസ് സിറ്റാഡൽ: ഹണ്ണി ബണ്ണിയിലൂടെ വന്‍ തിരിച്ചുവരവാണ് സാമന്ത നടത്തിയത്. കഴിഞ്ഞ നവംബര്‍ 7നാണ് സീരിസ് ആമസോണ്‍ പ്രൈം വീ‍ഡിയോയില്‍ റിലീസായത്. പരമ്പരയിലെ സാമന്തയുടെ ആക്ഷന്‍ ഹീറോയിന്‍ റോളിന് ലഭിച്ച പ്രതിഫലം 10 കോടി രൂപയാണ് എന്നാണ് വിവരം.
ഇതോടെ ഇന്ത്യയിൽ ഒരു ഒടിടി സീരിസില്‍ ഏറ്റവും കൂടുതൽ പ്രതിഫലം വാങ്ങുന്ന നടിയായി സാമന്ത മാറി. വരുൺ ധവാൻ , കെ കെ മേനോൻ, കാഷ്വി മജ്മുണ്ടർ, സിമ്രാൻ, സാഖിബ് സലീം എന്നിവരും സിറ്റാഡൽ: ഹണ്ണി ബണ്ണി വെബ് സീരീസിൽ പ്രധാന വേഷങ്ങളിൽ എത്തുന്നുണ്ട്.സാമന്തയുടെ സീരിസിലെ വേഷം വന്‍ പ്രേക്ഷക പ്രീതി നേടുന്നുണ്ട്.
