തന്‍റെ പുതിയ ചിത്രം ജഗമേ തന്തിരം തിയറ്ററിലൂടെ പ്രേക്ഷകർക്ക് മുന്നിൽ എത്താത്തതിൽ നിരാശയുണ്ടെന്ന് സൂപ്പർ താരം ധനുഷ്.
എന്നാൽ സാഹചര്യങ്ങൾ മനസ്സിലാക്കുന്നു. കുറച്ച് കൂടി നല്ല സാഹചര്യത്തിൽ റിലീസ് ചെയ്യാം എന്നായിരിന്നു പ്രതീക്ഷ. ഓടിടിയിലൂടെ എങ്കിലും ചിത്രം റിലീസ് ചെയ്യുന്നുണ്ടല്ലോ എന്ന ആശ്വാസം ഉണ്ടെന്നും ധനുഷ് പറഞ്ഞു.
കാർത്തിക് സുബ്ബരാജ് സംവിധാനം ചെയ്ത ചിത്രത്തിൽ സുരുളി എന്ന കഥാപാത്രമായാണ് ധനുഷ് എത്തുന്നത്.
മധുരയിലെ ഗുണ്ടാത്തലവനാണ് സുരുളി. സൂപ്പ‍ർസ്റ്റാറും ഭാര്യാ പിതാവുമായ രജനീകാന്തിന്റെ മാനറിസങ്ങൾ ഉള്ളയാളാണ്
സുരുളിയെന്ന് ധനുഷ് വെളിപ്പെടുത്തുന്നു. താനും കാർത്തിക്കും രജനീഫാൻസ് ആയതുകൊണ്ടാണ് കഥാപാത്രത്തെ അത്തരത്തിൽ
രൂപപ്പെടുത്തിയതെന്നും കഥാപാത്രത്തിൽ ഏറെ ആത്മവിശ്വാസമുണ്ടെന്നും ധനുഷ് പറഞ്ഞു. ചിത്രത്തിന്റെ രണ്ടാം ഭാഗം ഒരുക്കണമെന്ന്
കാർത്തിക്കിനോട് ആവശ്യപ്പെട്ടുകൊണ്ടിരിക്കുകയാണെന്നും താരം കൂട്ടിച്ചേർത്തു..
ചിത്രത്തിന്റെ ഓ‍ഡിയോ ലോഞ്ച് കഴിഞ്ഞ ദിവസം ട്വിറ്ററിലൂടെ നടന്നപ്പോൾ സംവിധായകൻ കാർത്തിക് സുബ്ബരാജും
സംഗീത സംവിധായകൻ സന്തോഷ് നാരായണനും മറ്റ് അണിയറപ്രവർത്തകരും പങ്കെടുത്തിരുന്നു. വൈ നോട്ട് സ്റ്റുഡിയോയുടെ ബാനറിൽ
ശശികാന്ത് ആണ് ചിത്രം നിർമിച്ചിരിക്കുന്നത്. ഐശ്വര്യ ലക്ഷ്മി, ജോജു ജോർജ്, കലയരസൻ തുടങ്ങിയവരും പ്രധാന വേഷത്തിൽ എത്തുന്നു.
ഹോളിവുഡ് താരം ജെയിംസ് കോസ്മോ അതിഥി വേഷത്തിൽ അഭിനയിച്ചിരിക്കുന്നു എന്ന പ്രത്യേകതയും ഉണ്ട്. ജൂൺ 18ന് നെറ്റ്ഫ്ലിക്സിൽ ചിത്രം റിലീസ് ചെയ്യും.
