താര സംഘടനായ അമ്മയുടെ തിരഞ്ഞെടുപ്പ് സമയത്ത് രൂക്ഷ വിമർശനവുമായി മല്ലിക സുകുമാരൻ രംഗത്തെത്തിയിരുന്നു. സംഘടനയിൽ തെറ്റു കണ്ടാല് താൻ തുറന്നുപറയുമെന്നും അതിജീവിതയായ നടിയെ സംഘടനയിലേക്ക് തിരിച്ചെടുക്കണമെന്നും മല്ലിക സുകുമാരൻ വ്യക്തമാക്കിയിരുന്നു. ഇപ്പോഴിതാ ദിലീപിനെ സപ്പോർട്ട് ചെയ്തും മല്ലിക സുകുമാരനെ വിമർശിച്ചും തന്റെ ചാനലിലൂടെ രംഗത്തെത്തിയിരിക്കുകയാണ് സംവിധായകൻ ശാന്തിവിള ദിനേശ്. മഞ്ജു വാര്യർ അടക്കമുള്ളവരുടെ പിന്തുണ കണ്ടപ്പോൾ അവരുടെ കൂടെ വിശ്വസിച്ച് സംഘടനയ്ക്ക് പുറത്ത് പോയതാണ് അവരെന്നും എന്നാൽ മഞ്ജു തിരിച്ചു വരികയും അതിജീവിത പുറത്തുമാകുന്ന അവസ്ഥയാണ് കാണേണ്ടി വന്നതെന്ന് ചൂണ്ടിക്കാണിച്ച ശാന്തിവിള ദിനേശ് അതിജീവിത ബംഗളൂരുവിൽ മനസമാധാനത്തോടെ കഴിയുകയാണെന്നും പറയുന്നു.
മല്ലിക സുകുമാരൻ വെറുതെ വിവാദം ഉണ്ടാക്കരുതെന്നും അതിജീവിതയെ അങ്ങോട്ട് ചെന്ന് വിളിച്ച് സംഘടനയിലേക്ക് തിരിച്ചെടുക്കുന്നത് എന്തിനാണെന്നും ശാന്തിവിള ദിനേശ് ചോദിക്കുന്നു. അതിജീവിത തിരിച്ചുവരണമെന്ന് ആവശ്യപ്പെട്ടാൽ ശ്വേതമേനോൻ തിരിച്ചെടുക്കുമെന്നും കുക്കു അതിനെ എതിക്കുകയുമില്ലെന്നും ശാന്തിവിള ദിനേശ് പറയുന്നു. എന്നാൽ ശ്വേതയ്ക്ക് പകരം മല്ലികയാണ് അമ്മയുടെ തലപ്പത്തെങ്കിൽ അതിജീവിതയുടെ കാല് പിടിക്കുമോ? എന്നും അദ്ദേഹം ചോദിച്ചു.
അതേസമയം ദിലീപിനെയും ശാന്തിവിള ദിനേശ് പിന്തുണച്ചു. അതീജീവിതയെ ആരും പുറത്താക്കിയതല്ല. പക്ഷേ, ദിലീപിനെ പുറത്താക്കിയതാണ്. അമ്മയ്ക്ക് ഫണ്ടുണ്ടാക്കാൻ വേണ്ടി മമ്മൂട്ടിക്കും സുരേഷ് ഗോപിക്കും ഒന്നും ചെയ്യാൻ സാധിക്കാതെ വന്നപ്പോൾ ദിലീപിന്റെ തലയിൽ വച്ച് കൊടുത്തു. അങ്ങനെ ആ സിനിമ ഞാൻ ചെയ്യാം എന്നും ട്വന്റി ട്വന്റി എന്ന സിനിമ ഓടിയാലും ഇല്ലെങ്കിലും സംഘടനയ്ക്ക് അഞ്ച് കോടി രൂപ നൽകാമെന്നും ദിലീപ് ഉറപ്പ് പറഞ്ഞതാണ്. ഒരുപാട് ലാഭം കിട്ടിയപ്പോൾ ആറരക്കോടി രൂപയാണ് അയാൾ സംഘടനയ്ക്ക് കൊടുത്തത്. ചേച്ചിയുടെ മകനാണെങ്കിൽ അങ്ങനെ ചെയ്യുമോ? അതൊക്കെ മല്ലിക ചേച്ചി ഓർക്കുന്നത് നല്ലതാണ് ‘ – ശാന്തിവിള ദിനേശ് പറഞ്ഞു.
