മലയാളത്തിന്റെ പ്രിയ സംവിധായകനാണ് ഭദ്രന്‍. എന്നാല്‍ കഴിഞ്ഞ 15 വര്‍ഷമായി ഭദ്രന്റെ സിനിമ തിയേറ്ററുകളില്‍ എത്തിയിട്ട്. എന്തുകൊണ്ട് ഇത്രയും കാലം സിനിമ ചെയ്യാത്തതെന്ന ആരാധകന്റെ ചോദ്യത്തിന് മറുപടി പറഞ്ഞിരിക്കുകയാണ് ഭദ്രന്‍.
ചോദ്യവും തന്റെ ഉത്തരവും ഫേസ്ബുക്കില്‍ പങ്കുവെച്ചിരിക്കുകയാണ് ഭദ്രന്‍. ഈ ചോദ്യങ്ങളാണ് ഒരാളെ വടവൃക്ഷമാക്കി മാറ്റുന്നത് എന്ന് കുറിച്ചുകൊണ്ടാണ് ഭദ്രന്‍ ചോദ്യവും ഉത്തരവും ആരാധകര്‍ക്കായി പങ്കുവെച്ചത്.
തിരക്കഥാകൃത്തും സിനിമാ മാധ്യമ പ്രവര്‍ത്തകനുമായ സുരേഷ് കുമാര്‍ രവീന്ദ്രന്‍ ആണ് ഭദ്രനോട് ചോദ്യം ചോദിച്ചത്. 2005-ല്‍ ഉടയോന്‍ ആണ് ഭദ്രന്‍ ഒടുവില്‍ സംവിധാനം ചെയ്ത ചിത്രം.
ഭദ്രന്റെ ഫേസ്ബുക്ക് പോസ്റ്റ് പൂര്‍ണരൂപം
”ഈ ചോദ്യങ്ങളാണ് ഒരുവനെ വടവൃക്ഷമാകുന്നത്..
നമസ്‌കാരം സാർ. എന്റെ പേര് സുരേഷ് കുമാർ രവീന്ദ്രൻ. സിനിമാ ജേണലിസ്റ്റാണ്, ചെറിയ രീതിയിൽ ഒരു തിരക്കഥാകൃത്താണ്. അടുത്തിടെ, സന്തോഷ് ശിവൻ സാറിന്റെ ‘ജാക്ക് & ജിൽ’ (മഞ്ജു വാരിയർ, കാളിദാസ് ജയറാം, സൗബിൻ ഷാഹിർ ) എന്ന സിനിമയുടെ സംഭാഷണം എഴുതിയിരുന്നു. ഇപ്പോൾ ഒരു തമിഴ് സിനിമയുടെ രചനയിലാണ്. മലയാളവും തമിഴും ഒരേ പോലെ കൈകാര്യം ചെയ്യും സാർ. അൽപ്പം വിക്ക് ഉണ്ട്. പക്ഷെ പാടുമ്പോൾ അത് ഇല്ല. ഇഎംഎസ് പറഞ്ഞതു പോലെ ‘വിക്ക് സംസാരിക്കുമ്പോൾ മാത്രമേയുള്ളൂ’…
സാറിന്റെ വലിയൊരു – ഏറ്റവും വലിയൊരു ആരാധകനാണ് ഞാൻ. സാറിന്റെ എല്ലാ സിനിമകളും എനിക്ക് പ്രിയപ്പെട്ടവയാണ്, ചാനലുകളിലും മറ്റുമുള്ള ഓരോ അഭിമുഖ സംഭാഷണങ്ങളും ഒന്നു വിടാതെ കാണാറുണ്ട്. സാറിലെ സംവിധായകനെയും, പച്ചയായ മനുഷ്യനെയും ജീവനാണ്. എനിക്ക് സാറിനോട് രണ്ടു ചോദ്യങ്ങൾ ചോദിക്കാനുണ്ട്,
മലയാള സിനിമയിലെ ഒരേ ഒരു ഭദ്രൻ, അതെ, ഒരേ ഒരു ഭദ്രൻ മാട്ടേൽ, എന്തു കൊണ്ടാണ് 15 വർഷങ്ങളായിട്ട് ഒരു സിനിമ പോലും ചെയ്യാത്തത്? സാറിന്റെ ‘ജെന്യുൻ’ ആയിട്ടുള്ള ആരാധകർക്ക് അത് എത്രത്തോളം വേദനയുണ്ടാക്കും എന്ന് സാർ എപ്പോഴെങ്കിലും ചിന്തിച്ചിട്ടുണ്ടോ? എന്നതാണ് ചോദ്യം.
ആ വാക്കുകളുടെ ഓരോ ശ്വാസവും സിനിമയിൽ കൂടുതൽ കരുത്തോടെ ജീവിക്കാൻ എന്നെ പ്രചോദിപ്പിക്കുകയാണ്. എല്ലാ സിനിമയും സംഭവിക്കലാണ്, സംഭവിക്കാൻ നമുക്ക് പ്രതീക്ഷിക്കാം, എന്നാണ് ഭദ്രൻ അതിന് നൽകിയിരിക്കുന്ന ഉത്തരം.
