തിരുവനന്തപുരം: ഐഎഫ്‌എഫ്കെയുടെ സ്ഥിരം വേദി മാറ്റുന്നത് മേളയുടെ അന്താരാഷ്ട്ര അംഗീകാരത്തെ ബാധിക്കാമെന്ന് സംവിധായകന്‍ ഡോ. ബിജു. മേള സ്ഥിരമായി തിരുവനന്തപുരത്ത് നടത്തുന്നതില്‍ നിന്ന് മാറ്റാനുള്ള നീക്കമാണോ ഇതെന്ന് സംശയമുണ്ടെന്നും ഡോ. ബിജു പറഞ്ഞു. തന്റെ ഫേസ്ബുക് പേജിലൂടെയായിരുന്നു അദ്ദേഹത്തിന്റെ പ്രതികരണം.
എന്നാല്‍ ഇത്തരത്തിലുള്ള ആശങ്കകള്‍ക്ക് ഒരു അടിസ്ഥാനവുമില്ലെന്നാണ് കേരള ചലച്ചിത്ര അക്കാദമി വ്യക്തമാക്കുന്നത്. കൊവിഡ് പശ്ചാത്തലത്തില്‍ മേള പല മേഖലകളിലായി സുരക്ഷിതത്വത്തോടെ നടത്തുകയാണെന്ന് ഫിയാഫിനെ നേരത്തേ തന്നെ അറിയിച്ചിട്ടുണ്ടെന്നും അക്കാദമി വ്യക്തമാക്കുന്നു. സാധാരണ ഡിസംബറില്‍ നടത്താറുള്ള മേള ഫെബ്രുവരിയില്‍ നടത്തുന്നതും ഫിയാഫിനെ അറിയിച്ചതാണെന്ന് അക്കാദമി അറിയിച്ചു.
