കുവൈറ്റ് സിറ്റി: കുവൈറ്റില്‍ ഇനി വാഹനമോടിക്കുന്നവര്‍ക്ക് ഡ്രൈവിംഗ് ലൈസന്‍സ് കൈയില്‍ ഇല്ലെന്നു കരുതി ടെന്‍ഷന്‍ അടിക്കേണ്ട. അത് മൊബൈല്‍ ഫോണ്‍ വഴി ഡൗണ്‍ലോഡ് ചെയ്ത് ഉപയോഗിക്കാം. രാജ്യത്ത് ഡ്രൈവിംഗ് ലൈസന്‍സും വാഹന രജിസ്ട്രേഷന് രേഖയും ഡിജിറ്റല്‍ രൂപത്തിലാക്കാനുള്ള ഗതാഗത വകുപ്പിന്റെ തീരുമാനത്തോടെയാണ് ഇത് സാധ്യമായിരിക്കുന്നത്.
കുവൈറ്റ് സിവില്‍ ഐഡിയുടെ ഡിജിറ്റല്‍ പതിപ്പായ കുവൈറ്റ്് മൊബൈല്‍ ഐഡിയുടെ മാതൃകയില്‍ ഡ്രൈവിംഗ് ലൈസന്‍സും വാഹന രജിസ്ട്രേഷന് കാര്‍ഡും ഡിജിറ്റലാക്കി മാറ്റാനാണ് വകുപ്പ് ആലോചിക്കുന്നത്. കുവൈറ്റ്് മൊബൈല്‍ ഐഡി ആപ്ലിക്കേഷനു ജനങ്ങളില്‍ നിന്നു ലഭിച്ച സ്വീകാര്യതയും അത് വിജയകരമായി നടപ്പിലാക്കാനായതും കണക്കിലെടുത്താണ് സമാനരൂപത്തില്‍ ഡ്രൈവിംഗ് ലൈസന്‍സും രജിസ്ട്രേഷന് കാര്‍ഡും ഡിജിറ്റല്‍ രൂപത്തിലാക്കാന്‍ ട്രാഫിക് അധികൃതര്‍ മുന്നോട്ടുവന്നത്.
ഡ്രൈവിംഗ് ലൈസന്‍സും രജിസ്ട്രേഷന് കാര്‍ഡും നിലവിലെ സിവില്‍ ഐഡിയുടെ ഡിജിറ്റല്‍ പതിപ്പായ കുവൈത്ത് മൊബൈല്‍ ഐഡിയില്‍ ഉള്‍പ്പെടുത്തുകയോ ഇവയ്ക്ക് പ്രത്യേകമായി മറ്റൊരു മൊബൈല്‍ ആപ്പ് രൂപകല്‍പ്പന ചെയ്യാനോ ആണ് അധികൃതര്‍ ആലോചിക്കുന്നതെന്ന് അല്‍ റായ് പത്രം റിപ്പോര്‍ട്ട് ചെയ്തു. ഇതോടെ ഇവ രണ്ടും കാര്‍ഡ് രൂപത്തില്‍ കൈവശം വയ്ക്കുന്നത് ഒഴിവാക്കാന്‍ സാധിക്കും. സ്വദേശികള്‍ക്കെന്ന പോലെ പ്രവാസികള്‍ക്കും ഇതിന്റെ ആനുകൂല്യം ലഭിക്കുമെന്നും അധികൃതരെ ഉദ്ധരിച്ച് പത്രം റിപ്പോര്‍ട്ട് ചെയ്തു. ഇവ ഡിജിറ്റലായി പരിശോധിച്ച് ഉറപ്പുവരുത്തുന്നതിനുള്ള മികച്ച സാങ്കേതിക സംവിധാനം ട്രാഫിക് വകുപ്പ് പരിശോധനാ ഉദ്യോഗസ്ഥര്‍ക്ക് നല്‍കും.
ഇവയിലൂടെ ട്രാഫിക് നിയമലംഘനങ്ങള്‍ എളുപ്പത്തില്‍ കണ്ടെത്താനും അവ അപ്പപ്പോള്‍ തന്നെ ആപ്ലിക്കേഷന്‍ വാഹന ഉപയോക്താക്കളെ അറിയിക്കാനും സാധിക്കുമെന്ന സൗകര്യവുമുണ്ട്. മൊബൈലിലേക്ക് എസ്എംഎസ് സന്ദേശമായാണ് ട്രാഫിക് നിയമ ലംഘനങ്ങള്‍ അറിയിക്കുക. നിയമലംഘകരെ അപ്പപ്പോള്‍ തന്നെ ലംഘനങ്ങള്‍ അറിയിക്കുന്നതിലൂടെ അവരെ കൂടുതല്‍ ബോധവാന്‍മാരാക്കാനും മുന്നറിയിപ്പ് നല്‍കാനും ഇതിലൂടെ സാധിക്കും. നിയമലംഘനം നടത്തിയ സ്ഥലം, സമയം, സ്വഭാവം എന്നിവ അടങ്ങുന്ന സന്ദേശത്തോടൊപ്പം നിയമ ലംഘനത്തിനുള്ള ഫൈന്‍ തുക കൂടി ഉള്‍പ്പെടുത്താനുമാവും. ഫൈന്‍ ഈടാക്കാനുള്ള നടപടിക്രമങ്ങള്‍ വേഗത്തിലും കാര്യക്ഷമവുമാക്കാന്‍ ഇതിലൂടെ സാധിക്കുമെന്നാണ് അധികൃതരുടെ വിലയിരുത്തല്‍. വാഹന ഇന്‍ഷുറന്‍സ് നടപടികള്‍ തുടങ്ങിയവ എളുപ്പമാക്കാനും ഡിജിറ്റലൈസേഷന്‍ സഹായകമാകും. പരമാവധി സര്‍ക്കാര്‍ സേവനങ്ങള്‍ കടലാസ് രഹിതമാക്കുകയെന്ന ഭരണകൂടത്തിന്റെ പ്രഖ്യാപിത നയത്തിന്റെ ഭാഗമായാണ് ട്രാഫിക് വകുപ്പിന്റെ പുതിയ നീക്കം.
രാജ്യത്ത് വ്യാജ ഡ്രൈവിംഗ് ലൈസന്‍സുകള്‍ കണ്ടെത്താനും ഇതിലൂടെ സാധിക്കുമെന്നും അധികൃതര്‍ കരുതുന്നു. പതിനായിരക്കണക്കിന് പ്രവാസികള്‍ കാലാവധി തീര്‍ന്നതോ നിയമവിരുദ്ധമായതോ ആയ ലൈസന്‍സ് ഉപയോഗിച്ചാണ് വാഹനം ഓടിക്കുന്നതെന്ന് നേരത്തേ പരാതികള്‍ ഉയര്‍ന്നിരുന്നു. പ്രത്യേക തൊഴില്‍ വിസയുമായി ബന്ധപ്പെട്ട് നേടുന്ന ഡ്രൈവിംഗ് ലൈസന്‍സ് ആ വിസ മാറുന്നതോടെ അസാധുവാകും എന്നാണ് കുവൈറ്റിലെ നിയമം. എന്നാല്‍ പലരും ഇത് പാലിക്കുന്നില്ല. സ്റ്റുഡന്റ്‌സ് വിസയിലെത്തുന്നവരും പഠന കാലാവധി കഴിഞ്ഞ ശേഷവും ഈ ലൈസന്‍സ് ഉപയോഗിക്കുന്നതായി പരാതി ഉയര്‍ന്നിരുന്നു. ഡിജിറ്റല്‍വല്‍ക്കരിക്കുന്നതോടെ ലൈസന്‍സുകളുടെ അനധികൃത ഉപയോഗം തടയുകയെന്ന ലക്ഷ്യവും അധികൃതര്‍ക്കുണ്ട്.
