ദുല്ഖറിന്റെ നിര്മാണത്തില് കല്യാണി പ്രിയദര്ശൻ നായികയായ ‘ലോക: ചാപ്റ്റര് വണ്- ചന്ദ്ര’ വൻ അഭിപ്രായം നേടി തിയറ്ററിൽ കുതിക്കുകയാണ്. നസ്ലിനായിരുന്നു ചിത്രത്തിലെ നായകൻ. ഇതിന്റെ പശ്ചാത്തലത്തിൽ ദുല്ഖറിന്റേയും ചിത്രത്തിൽ അതിഥി വേഷത്തിലെത്തിയ ടോവിനോയുടെയും നടുവിൽ നിന്ന് നസ്ലിന് പങ്കുവെച്ച ഒരു ചിത്രവും ചിത്രത്തിന് ദുല്ഖർ ചെയ്ത കമ്മെന്റുമാണ് ഇപ്പോൾ ശ്രദ്ധേയമാകുന്നത്.
‘Starstruck but grateful’, എന്ന കുറിപ്പോടെയാണ് നസ്ലിന് ഫോട്ടോ പങ്കുവെച്ചത്. ടൊവിനോയ്ക്കും ദുല്ഖറിനും നടുവിലായി ഇരുവരുടേയും തോളില് കൈവെച്ചു നില്ക്കുന്ന നസ്ലിനെ ചിത്രത്തില് കാണാം. ഇതിന് താഴെയാണ് ദുല്ഖര് കമന്റുമായി എത്തിയത്. ‘എടാ, സൂപ്പര്സ്റ്റാര്’ എന്നായിരുന്നു ദുല്ഖറിന്റെ കമന്റ്.
ദുല്ഖര് സല്മാന്റെ വേഫെറര് ഫിലിംസ് നിര്മിച്ച ഏഴാമത്തെ ചിത്രമാണ് ‘ലോക’. ഡൊമിനിക് അരുണ് സംവിധാനംചെയ്ത ചിത്രത്തിന് വലിയ സ്വീകരണമാണ് തീയേറ്ററുകളില് ലഭിച്ചുകൊണ്ടിരിക്കുന്നത്. ‘ലോക’ എന്ന പേരുള്ള സൂപ്പര്ഹീറോ സിനിമാറ്റിക് യൂണിവേഴ്സിലെ ആദ്യചിത്രമാണ് ‘ചന്ദ്ര’. സാന്ഡി, ചന്തു സലിംകുമാര്, അരുണ് കുര്യന്, ശരത് സഭ, നിഷാന്ത് സാഗര്, വിജയരാഘവന് എന്നിവരും ചിത്രത്തില് പ്രധാനവേഷങ്ങളിലുണ്ട്.
