ചെന്നൈ : പ്രശസ്ത സിനിമ സംവിധായകൻ കെ എസ് സേതുമാധവൻ അന്തരിച്ചു. ചെന്നൈയിൽ വച്ചാണ് അദ്ദേഹത്തിന് അന്ത്യം സംഭവിച്ചത്. 90 വയസായിരുന്നു. മലയാളത്തിന് പുറമേ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിലും അദ്ദേഹം ചിത്രങ്ങൾ സംവിധാനം ചെയ്തിട്ടുണ്ട്.ഓടയിൽനിന്ന്, അടിമകൾ, അരനാഴിക നേരം, കരകാണാകടൽ, പണി തീരാത്ത വീട്, ചട്ടക്കാരി, ഓപ്പോൾ തുടങ്ങിയവയാണ് അദ്ദേഹത്തിന്റെ പ്രശസ്തമായ മലയാള ചിത്രങ്ങൾ.
പാലക്കാട് സുബ്രഹ്മണ്യം ലക്ഷ്മി ദമ്പതികളുടെ മകനായി 1931ലാണ് അദ്ദേഹം ജനിച്ചത്. പാലക്കാട് വിക്ടോറിയ കോളേജിൽ നിന്നും സസ്യശാസ്ത്രത്തിൽ ബിരുദം കരസ്ഥമാക്കി. നിരവധി തവണ ദേശീയ ചലച്ചിത്ര പുരസ്‌കാരവും, സംസ്ഥാന ചലച്ചിത്ര പുരസ്‌കാരവും അദ്ദേഹത്തെ തേടിയെത്തിയിട്ടുണ്ട്.ചലച്ചിത്ര ലോകത്തിന് നൽകിയ സമഗ്ര സംഭാവനകൾ പരിഗണിച്ച് 2009ലെ ജെ സി ഡാനിയേൽ പുരസ്‌ക്കാരം ലഭിച്ചിട്ടുണ്ട്.
