ഫസ്റ്റ് ലുക്ക് മാസ്; സുരേഷ് ഗോപിക്ക് പിറന്നാൾ സമ്മാനമായി 251ആം സിനിമയുടെ പോസ്റ്റർ
മലയാളത്തിന്‍റെ സൂപ്പർ താരങ്ങളിൽ മാസ് ആക്ഷൻ ആരുടേതെന്ന് ചോദിച്ചാൽ ഒറ്റ ഉത്തരമേ ഉള്ളൂ. അത്
സുരേഷ് ഗോപിയുടേത് തന്നെ. വിസ്മയിപ്പിക്കുകയും കോരിത്തരിപ്പിക്കുകയും ചെയ്ത പൊലീസ് വേഷങ്ങൾ
മുതൽ കണ്ണീരണിയിച്ച സ്വഭാവ നടൻ വരെ. എത്രയെത്ര കഥാപാത്രങ്ങൾ. എന്നും സുരേഷ്ഗോപി ചിത്രങ്ങളോട്
പ്രത്യേക ഇഷ്ടമാണ് സിനിമാ പ്രേമികൾക്ക്.
ഇപ്പോഴിതാ ആ ജൈത്രയാത്ര 251ആം ചിത്രത്തിൽ എത്തി നിൽക്കുന്നു. പിറന്നാൾ ദിനത്തിൽ പുറത്തുവിട്ട ഫസ്റ്റ്
ലുക്ക് പോസ്ററർ സൂപ്പർ ഹിറ്റായിരിക്കുകയാണ്. മുടി കെട്ടി വച്ച്, നരച്ച താടിയും മുടിയുമായി അസ്സലൊരു സാൾട്ട്
ആന്‍റ് പെപ്പർ ലുക്ക്. വെളുത്ത ബനിയനുമിട്ട് വാച്ച് നന്നാക്കുന്ന നായകനെ പോസ്റ്ററിൽ കാണാം. സിനിമയുടെ പേരോ
മറ്റ് വിവരങ്ങളോ അഭിനേതാക്കളെയോ പുറത്തു വിട്ടിട്ടില്ലെങ്കിലും ആക്ഷൻ പടമായിരിക്കും എന്ന് തന്നെയാണ് സൂചനകൾ.
എത്തിറിയൽ എന്‍റർടെയ്ൻമെന്‍റ്സ് നിർമിക്കുന്ന ചിത്രം സംവിധാനം ചെയ്യുന്നത് രാഹുൽ രാമചന്ദ്രൻ ആണ്. സമീൻ സലീം
ആണ് തിരക്കഥ. ഓഗസ്റ്റ് സിനിമാസ് ആണ് ചിത്രം വിതരണത്തിന് എത്തിക്കുന്നത്. എസ്കെ ഡിസൈൻസ് ആണ്
ആണ് പോസ്റ്റർ തയ്യാറാക്കിയിരിക്കുന്നത്. നിഥിന്‍ രണ്‍ജി പണിക്കരുടെ കാവല്‍, മാത്യൂസ് തോമസിന്‍റെ ഒറ്റക്കൊമ്പന്‍,
ജോഷിയുടെ പാപ്പന്‍ എന്നിവയാണ് സുരേഷ് ഗോപിയുടേതായി അണിയറയില്‍ ഒരുങ്ങുന്ന മറ്റു ചിത്രങ്ങള്‍.
