ന്യൂഡല്‍ഹി : തന്റെ കസിൻ സഹോദരിയെയും ഭർത്താവിനെയും മക്കളുടെ മുന്നിൽ വച്ച് ഹമാസ് കൊലപ്പെടുത്തിയെന്ന് ഇന്ത്യൻ ടെലിവിഷൻ നടി മധുര നായിക്. ‘നാഗിൻ’ എന്ന ടെലിവിഷൻ പരമ്പയിലെ മധുര നായിക്, ഇൻസ്റ്റാഗ്രാമിൽ പങ്കുവച്ച വിഡിയോ സന്ദേശത്തിലൂടെയാണ് ഇക്കാര്യം അറിയിച്ചത്. സഹോദരിയുടെയും കുടുംബത്തിന്റെയും ചിത്രവും അവർ പങ്കുവച്ചു. ഇന്ത്യൻ വംശജയായ ജൂതയാണ് മധുര.
‘‘എന്റെ കുടുംബം നേരിടുന്ന സങ്കടവും വികാരങ്ങളും വാക്കുകളിൽ പറഞ്ഞറിയിക്കാൻ കഴിയില്ല. ഇസ്രയേൽ വേദനയിലാണ്. ഹമാസിന്റെ രോഷത്തിൽ തെരുവുകൾ തീയിൽ കത്തുന്നു. സ്ത്രീകളും കുട്ടികളും വൃദ്ധരും ദുർബലരുമായവരെ ലക്ഷ്യം വയ്ക്കുന്നു’’– അവർ പറഞ്ഞു.
തന്റെ സഹോദരിയുടെയും കുടുംബത്തിന്റെയും ചിത്രം പങ്കുവച്ചതിനു ശേഷം സമൂഹമാധ്യമത്തിൽ തനിക്കെതിരെ ട്രോളുകളുണ്ടായതായും പറഞ്ഞു. ‘‘പലസ്തീൻ അനുകൂല അജൻ‍ഡ എത്ര ആഴത്തിലാണ് പ്രവർത്തിക്കുന്നതെന്ന് ഇത് കാണിക്കുന്നു. ജൂതയായതിന്റെ പേരിൽ എന്നെ ലക്ഷ്യം വച്ചു. ഞാൻ അപമാനിക്കപ്പെട്ടു’’– അവർ കൂട്ടിച്ചേർത്തു.
