ഭാവനയ്‌ക്കെതിരെ നടത്തിയ വിവാദ പരാമര്‍ശത്തില്‍ വിശദീകരണവുമായി താര സംഘടനയായ എ എം എം എയുടെ ജനറല്‍ സെക്രട്ടറി ഇടവേള ബാബു. അമ്മ മുമ്ബ് നിര്‍മ്മിച്ച മള്‍ട്ടിസ്റ്റാര്‍ ചിത്രം ട്വന്റി 20യില്‍ ഭാവനയുടെ കഥാപാത്രം മരിച്ചുപോയില്ലേ എന്നാണ് താന്‍ ഉദ്ദേശിച്ചതെന്ന് ഇടവേള ബാബു പറഞ്ഞു. നടി പാര്‍വതിയുടെ രാജി കിട്ടിയിട്ടില്ലെന്നും ഇടവേള ബാബു റിപ്പോര്‍ട്ടര്‍ ടിവിയോട് പറഞ്ഞു.
ഭാവന സംഘടനയില്‍ അംഗമല്ലാത്തതിനാല്‍ അമ്മ നിര്‍മ്മിക്കുന്ന സിനിമയില്‍ അവര്‍ ഉണ്ടാകില്ലെന്നും മരിച്ചുപോയവര്‍ തിരിച്ചുവരാത്തത് പോലെയാണ് ഇതെന്നുമാണ് ഇന്നലെ ഇടവേള ബാബു പറഞ്ഞത്. അമ്മ നിര്‍മ്മിക്കുന്ന അടുത്ത സിനിമയില്‍ ഭാവനയ്ക്ക് റോളുണ്ടാകുമോ എന്ന ചോദ്യത്തോട് പ്രതികരിക്കവേയാണ് ഇടവേള ബാബു ഇക്കാര്യം പറഞ്ഞത്.
ഇടവേള ബാബുവിന്റെ പരാമര്‍ശം വെറുപ്പുളവാക്കുന്നതും ലജ്ജാകരവുമാണെന്നും എ എം എം എ എന്ന സംഘടനയ്ക്ക് ഒരു മാറ്റവും പ്രതീക്ഷിക്കാന്‍ കഴിയാത്തതിനാല്‍ രാജി വയ്ക്കുകയാണെന്നും നടി പാര്വതി തിരുവോത്ത് ഫേസ്ബുക്ക് പോസ്റ്റില്‍ അറിയിച്ചിരുന്നു. ഇതിന് പിന്നാലെയാണ് പാര്‍വതിയുടെ രാജി കിട്ടിയിട്ടില്ലെന്ന് ഇടവേള ബാബു പ്രതികരിച്ചത്.
