മോഡലായ നിള നമ്പ്യാരുടെ അഡൽട്ട് വെബ്സീരിസിൽ അഭിനയിക്കുന്നതിൽ സാമൂഹിക മാധ്യമങ്ങളിലുയരുന്ന വിമർശനങ്ങളിൽ തന്റെ ഭാഗം വ്യക്തമാക്കി നടൻ അലൻസിയർ. എനിക്ക് വെബ് സീരീസെന്നോ നാടകമെന്നോ സിനിമയെന്നോ വ്യത്യാസമില്ല. എന്റെ തൊഴിൽ മേഖലയാണ്. അതിന്‍റെ പിന്നിൽ പ്രവർത്തിക്കുന്നവർ ആരാണെന്നോ അവരുടെ ചരിത്രമോ ചാരിത്ര്യമോ ഞാൻ അന്വേഷിക്കേണ്ട കാര്യമില്ല. നിള നമ്പ്യാർ ആരാണെന്ന് എനിക്കറിയില്ലായിരുന്നു. ഞാൻ കണ്ടിട്ടുപോലുമില്ല. ഇപ്പോൾ ഈ വിമർശനം വന്നശേഷമാണ് അവരുടെ ഇമേജുകളും വിഡിയോസും കാണുന്നത്. അതെന്നെ ബാധിക്കുന്ന പ്രശ്നമല്ലെന്നും അലൻസിയർ വ്യക്തമാക്കി.
എന്നെ അഭിനയിക്കാൻ വിളിച്ചു എനിക്കതിന്റെ ക്യാരക്ടർ ഇഷ്ടപ്പെട്ടു ഞാൻ അഭിനയിച്ചു. ഒരു കാര്യംകൂടി സത്യസന്ധമായി പറയട്ടെ. എന്നെ വിമർശിക്കുന്നവരായിരിക്കും ഈ വെബ് സീരീസ് ആദ്യം പോയി കാണാൻ പോകുന്നത്. അവരായിരിക്കും ഇതുകണ്ട് രോമാഞ്ചം കൊള്ളാൻ പോകുന്നത്. പക്ഷെ അവർ നിരാശരായി പോകും. നിങ്ങളുടെ സദാചാരമെന്ന് പറയുന്നത് നമ്മുടെ സാമൂഹ്യ ബോധത്തിന്റെ പ്രശ്നമാണ്. മതങ്ങൾ കൊണ്ടുവന്നതാണ്. നമ്മുടെ കുടുംബബന്ധങ്ങൾ അങ്ങനെ സൃഷ്ടിക്കപ്പെട്ടതാണ്. പക്ഷെ ഒരു കലാകാരനെ സംബന്ധിച്ചിടത്തോളം അതൊക്കെ ബ്രേക്ക് ചെയ്യേണ്ടിവരും. എന്നെ എന്തിനാണിങ്ങനെ വേർതിരിച്ച് നിർത്തി ആക്രമിക്കുന്നത്. സണ്ണി ലിയോണിനൊപ്പം അഭിനയിച്ച എത്രയോ മഹാരഥന്മാർ ഇന്ത്യൻ സിനിമയിലും മലയാളത്തിലുമുണ്ട്.
എനിക്കീ നിളാ നമ്പ്യാരെ അറിയില്ല, വിമർശിക്കുന്നവർക്കൊക്കെ അറിയാമായിരിക്കും. അവന്മാരുടെ സംസ്കാരം അതാണ്. എന്നെ ആക്ഷേപിക്കുകയും അവഹേളിക്കുകയും ചെയ്യുമ്പോൾ വീട്ടിലിരുന്ന് വിഷമിക്കുന്ന എന്റെ മക്കളും ഭാര്യയുമുണ്ട്. നിങ്ങൾക്കൊരു ധാർമികബോധം വേണം. നിങ്ങൾ പത്മരാജന്റെയും ഭരതൻ സാറിന്റെയും സിനിമ കണ്ടിട്ടുണ്ടോ? നിങ്ങൾ തൂവാനത്തുമ്പികൾ കണ്ടിട്ടുണ്ടോ? നിങ്ങൾ വയലാർ എഴുതിയ കവിതകളും പാട്ടുകളും കേട്ടിട്ടുണ്ടോ? അതിൽ എന്തെല്ലാം വർണനകളാണ്. അവരെക്കുറിച്ചൊന്നുമില്ലാത്ത അപരാധം എന്റെ പേരിലെന്തിനാണ് ചാർത്തുന്നത്. ഞാനും ഒരു കലാകാരനാണ്. എനിക്കും പല കാര്യങ്ങളിലും ഉത്തരവാദിത്തമുണ്ട്. എനിക്കിഷ്ടപ്പെട്ടതായതുകൊണ്ടാണ് ഞാൻ ആ കഥാപാത്രം തെരഞ്ഞെടുത്തത്. എനിക്ക് ഇഷ്ടമില്ലാത്തവ ഞാൻ നിരസിച്ചിട്ടുണ്ട്. അതിലൊരു സങ്കോചവുമില്ല. നിങ്ങളെ പോലെ ഞാനൊരു സദാചാരവാദിയല്ല. നിങ്ങളിൽ സദാചാരം പറയുന്നവരാണ് വല്യ പ്രശ്നക്കാരെന്ന് എം.എൻ.വിജയൻ മാഷ് പണ്ടേ പറഞ്ഞിട്ടുണ്ട്. കുറ്റവാളികളാണ് നിങ്ങൾ, സദാചാരം പഠിപ്പിക്കുന്നവർ അത് ആരായാലും. അയൽപക്കത്തെ വീട്ടിലേക്ക് എത്തിനോക്കേണ്ട ഒരു കാര്യവും നിങ്ങൾക്കില്ല. നിങ്ങൾക്ക് ആസ്വദിക്കാൻ പറ്റില്ലെങ്കിൽ ആസ്വദിക്കേണ്ട. ആസ്വദിക്കുമെങ്കിൽ ആസ്വദിച്ചോ. അലന്സിയർ പറയുന്നു.
നിളയുടെ വെബ് സീരീസിൽ ഞാൻ അഭിനയിക്കുന്നതറിഞ്ഞ് സിനിമാമേഖലയിൽനിന്ന് ഒരുപാടുപേർ വിളിച്ചു. ആ പണിക്ക് പോണോ എന്ന് ചോദിച്ചു. എനിക്കിഷ്ടപ്പെട്ട കഥാപാത്രം വന്നപ്പോഴാണ് ഞാൻ ചെയ്തത്. അതിന് ആ വ്യക്തിയുടെ ചരിത്രം അന്വേഷിക്കേണ്ട കാര്യമില്ല. അങ്ങനെയെങ്കിൽ മലയാള സിനിമയിൽ ആർക്കൊപ്പവും എനിക്ക് അഭിനയിക്കാൻ കഴിയില്ല, തിരിച്ചും. ഞാനും പാപങ്ങൾ ചെയ്തൊരു മനുഷ്യനാണ്. നന്മയില്ലാത്തൊരു ലോകത്ത് തിന്മയുടെ ഭാഗത്തുനിന്ന് ഞാൻ പറയുന്നു. പാപം ചെയ്യാത്തവർ എന്നെ കല്ലെറിയട്ടെ. അലന്സിയർ പറയുന്നു
