പട്‌ന: ബീഹാറിലെ ഗയയിൽ ഇന്നലെ കംഗാരു കോടതി നടത്തിയ മാവോയിസ്റ്റുകൾ രണ്ട് പുരുഷന്മാരെയും രണ്ട് സ്ത്രീകളെയും തൂക്കിലേറ്റുകയും വീട് സ്‌ഫോടനം ചെയ്യുകയും ചെയ്തു. ദുമാരിയയിലെ മോൺബാർ ഗ്രാമത്തിലെ സർജു ഭോക്തയുടെ വീടാണ് ഡൈനാമിറ്റ് ഉപയോഗിച്ച് തകർത്തത്. അദ്ദേഹത്തിന്റെ മക്കളായ സത്യേന്ദ്ര സിംഗ് ഭോക്ത, മഹേന്ദ്ര സിംഗ് ഭോക്ത എന്നിവരെയും അവരുടെ ഭാര്യമാരെയും വീടിന് പുറത്ത് , കെട്ടിത്തൂക്കി. കൊലപാതകവും ഗൂഢാലോചനയും ആരോപിച്ച് മാവോയിസ്റ്റുകൾ വീടിന്റെ വാതിലിൽ ഒരു കുറിപ്പും ഒട്ടിച്ചു.
അമ്രേഷ് കുമാർ, സീത കുമാർ, ശിവ്പൂജൻ കുമാർ, ഉദയ് കുമാർ എന്നീ നാല് മാവോയിസ്റ്റുകളെ മുമ്പ് വിഷം നൽകി കൊലപ്പെടുത്തിയെന്നും കുടുംബത്തിന് പങ്കുണ്ടെന്ന് ആരോപിക്കുന്നതായും കുറിപ്പിൽ പറയുന്നു. രാജ്യദ്രോഹികൾക്ക് കടുത്ത ശിക്ഷ നൽകുമെന്നും കുറിപ്പിൽ മുന്നറിയിപ്പ് നൽകിയിട്ടുണ്ട്.
ഞായറാഴ്ച രാവിലെ പോലീസ് സ്ഥലത്തെത്തി അന്വേഷണം നടത്തിവരികയാണ്.
ഒരു വർഷം മുമ്പ് മോൺബാർ ഗ്രാമത്തിൽ പോലീസുമായുണ്ടായ ഏറ്റുമുട്ടലിൽ നാല് മാവോയിസ്റ്റുകൾ കൊല്ലപ്പെട്ടിരുന്നു. എന്നാൽ ഇത് വ്യാജ സംഭവമാണെന്ന് മാവോയിസ്റ്റുകൾ ആരോപിച്ചു.
തങ്ങൾ താമസിച്ചിരുന്ന വീടിന്റെ ഉടമകൾ വിഷം കൊടുത്ത് കൊല്ലുകയായിരുന്നുവെന്നാണ് ഇവരുടെ വാദം. തുടർന്ന് അവർ പോലീസിനെ വിളിച്ചു, അവർ വ്യാജ ഏറ്റുമുട്ടൽ നടത്തി എന്നാണ് വാദം.
