ബിഗ് ബോസ് മലയാളം സീസണുകൾ എന്നും വിവാദത്തിന്റെ പതിവ് വേദിയാണ്. ബിഗ് ബോസ് വീടിനുള്ളിലും പുറത്തും ഒരുപോലെ വാക്കുതർക്കങ്ങളും ആരോപണങ്ങളും നടത്തി സോഷ്യൽ മീഡിയകളിൽ ഇതുപോലെ ചർച്ചയാവുന്ന റിയാലിറ്റി ഷോ മത്സരാർത്ഥികൾ വേറെയില്ലെന്ന് തന്നെ പറയാം. ഏറ്റവുമൊടുവിൽ പൂർത്തിയായ സീസണെ ചുറ്റിപ്പറ്റിയും പലതരം വിവാദ കോലാഹലങ്ങൾ നമ്മൾ കണ്ടതുമാണ്. ജാസ്മിനും, ഗബ്രിയും, സിജോയും, റോക്കിയും, നോറയും, സായിയും ഒക്കെ ഇപ്പോഴും സോഷ്യൽ മീഡിയകളിൽ സജീവ ചർച്ചാ വിഷയമാണ്.
അതേസമയം മുൻ സീസണുകളിലുള്ള മത്സരാർത്ഥികളുമായി ബന്ധപ്പെട്ട വാർത്തകളും ഇപ്പോഴും പല ഓൺലൈൻ ചാലുകളും പ്രാധാന്യം നൽകി പോരുന്നുണ്ട്. ആ കൂട്ടത്തിലൊരാളാണ് റോബിൻ രാധാകൃഷ്ണൻ. ബിഗ് ബോസ് ഷോയ്ക്ക് ശേഷവും ജനങ്ങൾ ഒരുപോലെ വാഴ്ത്തുകയും താഴ്ത്തുകയും ചെയ്ത ആളാണ് റോബിൻ രാധാകൃഷ്ണൻ. സഹമത്സരാർത്ഥിയായിരുന്ന ദിൽഷയുമായുള്ള പ്രണയത്തെച്ചൊല്ലിയും ആരതിയുമായുള്ള വിവാഹത്തെ ചൊല്ലിയും, സിനിമാ-ബിസിനസ് സംബന്ധിച്ച പരാമർശങ്ങളെ ചൊല്ലിയും റോബിന്റെ തന്നെ ചില മുൻ സുഹൃത്തുക്കളുടെ വെളിപ്പെടുത്തലുകളെ തുടർന്നും റോബിൻ ഏറെ തിരിച്ചടികൾ ഏറ്റുവാങ്ങിയിട്ടുണ്ട്. ഇതൊക്കെ ഒരു ഭാഗത്ത് നടക്കുമ്പോഴും ഒരു വലിയ കൂട്ടം ആരാധകർ റോബിനോടൊപ്പം ഇന്നും കട്ടയ്ക്കു നിൽക്കുന്നു എന്നത് നിഷേധിക്കാൻ പറ്റാത്ത യാഥാർഥ്യമാണ്.
ഇപ്പോഴിതാ താൻ ഹീറോയായി എത്തുമെന്ന് പ്രചരിച്ച സിനിമയെ കുറിച്ചും ജീവിതത്തിലുണ്ടായ വിവാദങ്ങളെ കുറിച്ചും ആരതി പൊടിയുമായുള്ള വിവാഹത്തെ കുറിച്ചുമെല്ലാം ഒരു പ്രമുഖ യുട്യൂബ് ചാനലിന് നൽകിയ അഭിമുഖത്തിൽ വ്യക്തമാക്കുകയാണ് റോബിൻ രാധാകൃഷ്ണൻ. സന്തോഷ് ടി കുരുവിള നിർമിക്കുന്ന ചിത്രത്തിൽ റോബിൻ നായകനായി എത്തുമെന്നായിരുന്നു പ്രചരിച്ച വാർത്ത. ഇത് ശെരിവയ്ക്കുന്ന രീതിയിൽ മോഹൻലാലിൻറെ ഓഫീഷ്യൽ പേജിൽ ഇതിന്റെ പോസ്റ്ററും പ്രത്യക്ഷപ്പെട്ടിരുന്നു.
സന്തോഷ് ടി കുരുവിള തന്നെ വന്ന് റോബിനെ വെച്ച് പടം ചെയ്യാൻ പോവുകയാണെന്ന് പറഞ്ഞ വീഡിയോ യുട്യൂബിൽ കിടപ്പുണ്ടെന്നും ലാലേട്ടന്റെ ഓഫീഷ്യൽ പേജിൽ താൻ എങ്ങനെയാണ് ഒരു പോസ്റ്ററുണ്ടാക്കി ഇടുന്നതെന്നും അവതാരകനോട് റോബിൻ ചോദിക്കുന്നുണ്ട്. ‘ഞാൻ ആരാണ് അതിന്? ലാലേട്ടൻ അത്ര മന്ദബുദ്ധിയാണോ? ഒരു സാധനം ലാലേട്ടന്റെ പേജിൽ വരും മുമ്പ് അവർ അത് ശ്രദ്ധിക്കില്ലേ?. എനിക്ക് എങ്ങനെ അത് പറ്റും?. ഞാൻ ഒരു സാധാരണക്കാരനല്ലേ!’ എന്നുമാണ് റോബിന്റെ വാക്കുകൾ.
എന്തായാലും പ്രസ്തുത സിനിമ അവർ വേണ്ടെന്ന് വെച്ചെന്നും സിനിമ എപ്പോഴും നിർമാതാക്കളുടെ ചോയ്സ് ആണെന്നും റോബിൻ പറയുന്നു. സിനിമകളിലേക്ക് വേണമെങ്കിൽ എന്നെ കാസ്റ്റ് ചെയ്താൽ മതി എന്നാണ് സിനിമയുമായി ബന്ധപ്പെട്ട വിവാദത്തിൽ പ്രതികരിച്ച് റോബിൻ പറഞ്ഞത്.
അതേസമയം തന്റെ ഭാവി വധുവിനെ കുറിച്ചും തങ്ങളുടെ ബന്ധത്തിലെ ചില കയ്‌പ്പേറിയ കാര്യങ്ങളെ കുറിച്ചും റോബിൻ വ്യക്തമാക്കുന്നുണ്ട്. തന്റെ ഭാവി വധുവും നടിയും മോഡലും സംരംഭകയുമായ ആരതി പൊടിയെയും തന്നെയും തമ്മിൽ അകറ്റാൻ പലരും ശ്രമിച്ചിരുന്നെന്നും ഇപ്പോഴും ശ്രമിക്കുന്നുമുണ്ടെന്നും റോബിൻ പറയുന്നു. ഇതിന്റെ കാരണം എനിക്ക് അറിയില്ല. എന്നെ ഒഴിവാക്കി രക്ഷപ്പെട്ടോളൂവെന്ന് പറഞ്ഞ് സോഷ്യൽ മീഡിയകളിൽ ആരതിക്ക് ദിവസവും പത്ത് മെൻഷനോളം വരുമെന്നും പക്ഷെ ആരതിക്ക് തന്നെ ഭയങ്കര ഇഷ്ടമാണെന്നും റോബിൻ പറയുന്നു. തങ്ങൾക്കിടയിലുള്ളത് ജെനുവിനായുള്ള സ്നേഹമാണെന്നും കല്യാണം ഉടനെയുണ്ടാകുമെന്നും അഭിമുഖത്തിൽ റോബിൻ കൂട്ടിച്ചേർത്തു.
എന്റെ സമ്പാദ്യം എന്നെ ഇഷ്ടപ്പെടുന്നവരാണ്. രണ്ട് വർഷം കഴിഞ്ഞിട്ടും എനിക്ക് ആ സ്നേഹം കിട്ടുന്നുണ്ട്. ഒരുപാട് ആളുകൾ എന്നെ സ്നേഹിക്കുന്നു എനിക്ക് വേണ്ടി പ്രാർത്ഥിക്കുന്നു എന്നെ അനുഗ്രഹിക്കുന്നു.
