ഈയടുത്ത് മറ്റൊരു സോഷ്യൽ മീഡിയ ഇൻഫ്ലുവൻസറായ ദാസേട്ടനൊപ്പം ചാന്തു കുടഞ്ഞൊരു സൂര്യൻ മാനത്ത് എന്ന പാട്ടിന് ഗ്ലാമറസായി രേണു അഭിനയിച്ച റീൽ വീഡിയോയും വിഷുവിനോട നുബന്ധിച്ച് നടത്തിയ ഫോട്ടോഷൂട്ടും എല്ലാം വലിയ ചർച്ചയായി മാറിയിരുന്നു. സുധി ജീവനോടെ ഉണ്ടായിരുന്നെങ്കിൽ ഈ കാട്ടിക്കൂട്ടലുകൾ നടക്കില്ലെന്നും ഇത്തരം പ്രഹസനങ്ങൾക്ക് ദയവായി കൊല്ലം സുധിയുടെ പേര് ഉപയോഗിക്കരുത് എന്നുമായിരുന്നു രേണു സോഷ്യൽ മീഡിയയിൽ നേരിട്ട വിമർശനം
കോമഡി വേഷങ്ങളിലൂടെ മലയാളികൾക്ക് സുപരിചിതനായി മാറിയ നടനായിരുന്നു അന്തരിച്ച കൊല്ലം സുധി. വാഹനാപകടത്തിൽ സുധി മരിച്ചതിനുശേഷം ഭാര്യ രേണുവിന് വിവിധ തരത്തിലുളള വിമർശനങ്ങളും ഏറ്റുവാങ്ങേണ്ടി വന്നിട്ടുണ്ട്. സോഷ്യൽ മീഡിയയിൽ റീലുകൾ ചെയ്തിരുന്ന രേണു ഇപ്പോൾ നാടക അഭിനേത്രിയും മോഡലും കൂടിയാണ്. ഭർത്താവിന്റെ ആഗ്രഹങ്ങൾ നിറവേറ്റാനാണ് താൻ പലകാര്യങ്ങളും ചെയ്യുന്നതെന്നാണ് അവർ പറയുന്നത്. രേണുവിനെ വിമർശിക്കാൻ ഒരുപറ്റം സോഷ്യൽ മീഡിയ ഉപഭോക്താക്കൾ കച്ചകെട്ടിയിറങ്ങിയ സാഹചര്യത്തിൽ ഒരു ചെറുപ്പക്കാരനൊപ്പമുള്ള ഇവരുടെ പുതിയ വീഡിയോ ആണ് വൈറൽ ആയിരിക്കുന്നത്.
വിവാഹ വേഷത്തിലാണ് ഇരുവരും പ്രചരിക്കുന്ന ചിത്രങ്ങളിൽ ഉള്ളത്. കേരള സാരിയിൽ വധുവിനെപ്പോലെ സിമ്പിൾ ആയി അണിഞ്ഞൊരുങ്ങി കഴുത്തിൽ തുളസിമാലയും ആഭരണങ്ങളുമൊക്കെയായാണ് രേണുവിന്റെ നിൽപ്പ്. ദൃശ്യങ്ങൾ പ്രചരിച്ച് നിമിഷങ്ങൾക്കകം തന്നെ വലിയ വിമർശനമാണ് രേണുവിനെതിരെ സോഷ്യൽ മീഡിയയിൽ ഉയരുന്നത്.
അതേസമയം കരിമിഴി കണ്ണാൽ എന്ന ആൽബത്തിന്റെ ഷൂട്ടിങ്ങിനിടെയുള്ള വീഡിയോയാണിത് എന്നാണ് വിവരം.
