മരണ കിണറിൽ ഒരുക്കിയ ‘ബിഗ് ഡോഗ്സ്’ എന്ന ഒറ്റ ആൽബത്തിലൂടെ ഇന്ത്യയ്ക്ക് തന്നെ ഏറെ അഭിമാനമാനമായ, 2024ൽ ലോകം തിരഞ്ഞ റാപ്പർ ആണ് ഹനുമാൻ കൈൻഡ്. മുഖ്യധാര ഹിപ്പ്-പോപ്പിന്റെ ഇന്ത്യൻ മുഖമായി അതിവേഗം ഉയർന്നുവരുന്ന ഹനുമാൻ കൈൻഡ് മലപ്പുറം സ്വദേശി ആണെന്നതിൽ മലയാളികൾക്കും അഭിമാനിക്കാം. സൂരജ് ചെറുകാട് എന്നാണ് ഹനുമാൻ കൈൻഡിന്റെ യഥാർത്ഥ നാമം.
ഇപ്പോഴിതാ ന്യൂയോർക്കിലെ ലോംഗ് ഐലൻഡിൽ നടന്ന പരിപാടിയിൽ പ്രധാനമന്ത്രി നരേന്ദ്ര മോദിയും റാപ്പർ ഹനുമാൻകൈൻഡും കണ്ടുമുട്ടിയ വീഡിയോയാണ് സോഷ്യൽ മീഡിയ പ്ലാറ്റുഫോമുകളിൽ വൈറലാകുന്നത്. യുഎസ് ഇന്ത്യ ബന്ധം ശക്തിപ്പെടുത്തുന്നതിന്‍റെ ഭാഗമായി പ്രധാനമന്ത്രി നരേന്ദ്ര മോദിയുടെ ത്രിദിന യുഎസ് സന്ദർശനത്തിന്‍റെ ഭാഗമായി നാസൗ കൊളീസിയത്തിൽ നടന്ന ‘മോദിയും യുഎസും’ എന്ന പരിപാടിയിലായിരുന്നു ഈ അപൂര്‍വ്വ കൂടികാഴ്ച.
മോദി ഹനുമാൻ കൈൻഡിനെ ഹസ്തദാനം നൽകി ആലിംഗനം ചെയ്ത് അഭിവാദ്യം ചെയ്യുന്നതാണ് വൈറൽ വീഡിയോയിലുള്ളത്. കലാകാരനെ ആലിംഗനം ചെയ്യുന്നതിനുമുമ്പ് പ്രധാനമന്ത്രി “ജയ് ഹനുമാൻ” എന്ന് വിളിച്ചതും ശ്രദ്ധേയമായി.
