അവാർഡ് ഒരിക്കലും തന്നെ മോഹിപ്പിച്ചിട്ടില്ലെന്ന് നടൻ ജനാർദ്ദനൻ. ഇത്ര വർഷം സിനിമയിൽ അഭിനയിച്ചിട്ടും അതിനെക്കുറിച്ച്‌ ചിന്തിച്ചിട്ടില്ലെന്നും നല്ല നല്ല സിനിമകൾ ലഭിച്ചതാണ് തനിക്ക് ലഭിച്ച ഏറ്റവും വലിയ അവാർഡ് എന്നും ജനാർദ്ദനൻ വ്യക്തമാക്കുന്നു.
‘എനിക്ക് ഒരു അവാർഡും കിട്ടിയിട്ടില്ല. എന്റെ മനസ്സിന് തൃപ്തിയുള്ള ഒരുപാട് സിനിമകൾ ചെയ്യാൻ കഴിഞ്ഞതാണ് എന്റെ അവാർഡ്. എന്നേക്കാൾ നല്ല ആളുകൾക്കായിരിക്കണമെല്ലോ അവാർഡ് കൊടുക്കുക. അങ്ങനെ ഞാൻ വിശ്വസിക്കുന്നു. ആ വിശ്വാസം എന്നെ സമാധാനപ്പെടുത്തുന്നു. അവാർഡ് പ്രേരണയാൽ നൽകുന്നുവെന്ന് എനിക്ക് തോന്നിയിട്ടില്ല. കാരണം ഞാൻ അതിനെക്കുറിച്ച്‌ ചിന്തിച്ചിട്ടില്ല. അവാർഡ് കിട്ടാൻ വേണ്ടി ഇതിന്റെ പിറകിൽ പോയിരുന്നുവെങ്കിൽ മാത്രമേ ആരെല്ലാമാണ് ഇത് വാങ്ങുന്നത് എന്നൊക്കെ മനസ്സിലാക്കാൻ കഴിയൂ. ഞാൻ ഇതിന് പോയിട്ടില്ല എന്നതാണ് സത്യം. എന്നാൽ അവാർഡ് നൽകിയാൽ സ്വീകരിക്കില്ല എന്നും പറയില്ല.
ഏതെങ്കിലുമൊരു കാലത്ത് നമുക്ക് കിട്ടാൻ യോഗ്യതയുണ്ടേൽ കിട്ടൂ. സലിം കുമാറിന് ഇവിടെ അവാർഡ് കിട്ടി. എനിക്ക് അത്ര ഉറപ്പാണ് അവൻ ഇതിന്റെ പിറകെ പോയിട്ടല്ല ലഭിച്ചതെന്ന്. അത് പോലെ എനിക്കും ഒരുനാൾ അവാർഡ് കിട്ടിയാൽ സന്തോഷം ജനാർദ്ദനൻ പങ്ക്വയ്ക്കുന്നു.
