ബിഗ് ബോസിന്റെ ഏറ്റവും ഒടുവിലത്തെ സീസണ്‍ ആയ സീസണ്‍ 6 അവസാനിച്ചെങ്കിലും മത്സരാർത്ഥികളുമായി ബന്ധപ്പെട്ട വിവാദങ്ങൾക്കും ഗോസ്സിപ്പുകൾക്കും ഒരു അന്ത്യവുമില്ല. ഷോ ആരംഭിച്ച നാൾമുതൽ വിവാദ നായികയായ ജാസ്മിനുമായി ബന്ധപ്പെട്ട വിവാദങ്ങൾ തന്നെയാണ് ഇപ്പോഴും സോഷ്യൽ മീഡിയയിൽ കത്തിപ്പടരുന്നത്. ജാസ്മിൻ, ബിഗ് ബോസിലെ തന്നെ മറ്റൊരു മത്സരാർത്ഥിയായിരുന്ന സായി കൃഷ്ണ , ജാസ്മിന്റെ കാമുകനെന്ന് പറയപ്പെടുന്ന അഫ്സൽ അമീർ, യുട്യൂബർ വിവി, റോബിൻ രാധാകൃഷ്ണൻ എന്നിവരെ ചുറ്റിപ്പറ്റിയാണ് ഇപ്പോഴും പുതിയ പുതിയായ വിവാദങ്ങൾ കൊഴുക്കുന്നത്.
ഇതിൽ സായികൃഷ്ണയും വിവേക് എന്ന യുട്യൂബർ വിവിയും തമ്മിലാണ് ഇപ്പോൾ യുദ്ധം നടക്കുന്നത്. നടന്നുകൊണ്ടിരിക്കുന്നത് പൊരിഞ്ഞ സോഷ്യൽ മീഡിയ യുദ്ധമാണെന്നു തന്നെ പറയാം. വിവിയെക്കുറിച്ച് സായി നിരന്തരം വിമർശനാത്മകമായി വിഡിയോകൾ ചെയ്യുകയും പ്രകോപിതനായി പലപ്പോഴും വിവി അതിനു മറുപടി നൽകുകയും ചെയ്യുന്നതാണ് പതിവ്. എന്നാൽ കാര്യങ്ങൾ ഒരുപടികൂടി കടന്ന് ഗുരുതരാരോപണങ്ങളാണ് സായി ജാസ്മിനുമായി ബന്ധപ്പെടുത്തിയിപ്പോൾ വിവിയെക്കുറിച്ചു പറഞ്ഞിരിക്കുന്നത്.
ജാസ്മിനെ അവൾ വിശ്വസിച്ചവർ തന്നെ ചതിച്ചു. ബിഗ് ബോസിലേക്ക് പോകുന്നതിനു മുൻപ് അവൾ എല്ലാ കാര്യങ്ങളും പറഞ്ഞു ഏല്‍പ്പിച്ച് പോയ ഒരു വ്യക്തി തന്നെയാണ് ഇതുചെയ്തതെന്നും സായി ആരോപിക്കുന്നുണ്ട്. ഇത്തരം പ്രവർത്തി ചെയ്തത് വിവി ആണെന്ന് വ്യക്തമാക്കിയ സായി ബിഗ് ബോസിനകത്ത് ജാസ്മിൻ വലിയപ്രതിസന്ധികൾ നേരിട്ടപ്പോൾ തന്നെ ജാസ്മിനും ഫാമിലിക്കുമെതിരേ ഇയാൾ തിരിഞ്ഞ് കൊത്തിയെന്നും കുറ്റപ്പെടുത്തി.
ഇത് ജാസ്മിനെ ബാധിച്ചെന്നും, അവളെ എല്ലാ തരത്തിലും ഇല്ലാതാക്കിയത് വിവിയാണെന്നും സായി വിഡിയോയിൽ വാദിക്കുന്നുണ്ട്. ജാസ്മിനുമായി വിവാഹം തീരുമാനിച്ചിരുന്ന അഫ്സലിനെയാണ്‌ അവൾ തന്റെ സോഷ്യൽ മീഡിയ പ്രൊഫൈലുകള്‍ നോക്കാന്‍ ഏല്‍പ്പിച്ചിരുന്നത് എന്ന തരത്തിലുള്ള റിപ്പോർട്ടുകളുണ്ടായിരുന്നു. ഇത് തെറ്റാണെന്നും ജാസ്മിന് വിശ്വസിച്ച് പ്രൊഫൈല്‍ അടക്കം കൈമാറിയത് വിവിക്കായിരുന്നുവെന്നും സായി പറയുന്നു. ഇക്കാരണങ്ങൾ കൊണ്ടുതന്നെ വിവിയെ ജാസ്മിന്റെ കുടുംബവും വിശ്വസിച്ചു. ബിഗ് ബോസില്‍ ജാസ്മിന് പ്രതിസന്ധികൾ വന്നപ്പോൾ പുറത്ത് അതിന് ഇന്ധനം പകരുന്ന പരിപാടിയായിരുന്നു വിവി ചെയ്തുകൊണ്ടിരുന്നതെന്നും സായി കുറ്റപ്പെടുത്തി. ഇതെല്ലാം ജാസ്മിന്റെ മുൻ ആൺ സുഹൃത്ത് അഫ്സലിന് മനസ്സിലാകാന്‍ വേണ്ടിയാണ് ഇപ്പോൾ പറയുന്നത് എന്നും സായി വിഡിയോയിൽ പറയുന്നുണ്ട്.
അതേസമയം ജാസ്മിന് ബിഗ് ബോസിനകത്ത് കാണിക്കുന്ന പല കാര്യങ്ങളും പുറത്ത് നില്‍ക്കുന്ന അഫ്സലിന് വിഷമം ഉണ്ടാക്കുന്നത് സ്വാഭാവികമാണ് എന്നും സായി പറയുന്നു. ജാസ്മിന്റെ ഉപ്പയ്ക്ക് ആരോഗ്യ പ്രശ്നം വന്ന സമയത്ത് ബിഗ് ബോസിലേക്ക് തന്റെ മകളെ വിളിച്ച സംഭവം ഇത്രയും കോമഡിയും ഫേക്ക് നാടകമാണ് എന്ന തരത്തിലും പ്രചരിപ്പിച്ചത് വിവിയാണ്. മറ്റൊരു സാഹചര്യത്തിൽ അഫ്സലിനെയടക്കം മാനിപ്പുലേറ്റ് ചെയ്ത് ജാസ്മിനുമായുള്ള പേഴ്സണല്‍ ചാറ്റടക്കം പുറത്ത് വിടീച്ചതും ഇതേ വിവിയാണെന്നും വിവിയ്ക്ക് ജാസ്മിനോട് താൽപര്യമുണ്ടായിരുന്നുവെന്നും സായി പറയുന്നു.
ജാസ്മിൻ വിഷയത്തിൽ മാത്രമല്ല , റോബിന്റേയും ആരതിയുടേയും വിഷയത്തില്‍ വരെ വിവി കളിച്ച കളികളെല്ലാം പുറത്ത് വരുന്നുണ്ടെന്നും സായി പറയുന്നു. അതേസമയം, സായി ഉന്നയിച്ച ജാസ്മിനുമായി ബന്ധപ്പെടുത്തിയുള്ള ആരോപണത്തെ വിവി പൂർണ്ണമായി നിഷേധിക്കുകയാണ്. ഒരു നോട്ടം കൊണ്ട് പോലും ജാസ്മിനെ ആ രീതിയില്‍ കാണുകയോ ആ രീതിയില്‍ സംസാരിക്കുകയോ ചെയ്തിട്ടില്ല. തന്റെ ഒരു നല്ല ഫ്രണ്ടായിട്ടെ ജാസ്മിനെ എന്നും കണ്ടിട്ടുള്ളതെന്നും വിവി വിശദീകരണവുമായി രംഗത്തെത്തി.
