മിനി കൂപ്പറിനോടാണ് ഇപ്പോള്‍ താരങ്ങള്‍ക്ക് പ്രിയമെന്നു തോന്നുന്നു. മമ്മൂട്ടിയ്ക്കും കുഞ്ചാക്കോ ബോബനും പിറകെ നടന്‍ ജയസൂര്യയും സ്വന്തമാക്കിയിരിക്കുകയാണ് ഒരു സുന്ദരന്‍ മിനികൂപ്പര്‍. ജയസൂര്യയുടെ മിനി കൂപ്പര്‍ കുറച്ചുകൂടി ‘എക്സ്ക്ലൂസീവ്’ ആണ്. കാരണം, ഇതേ പ്രത്യേകതകള്‍ ഉള്ള മിനി കൂപ്പര്‍ ഇന്ത്യയില്‍ മറ്റാര്‍ക്കും ഇല്ല.
മിനികൂപ്പറിന്റെ ഏറ്റവും പുതിയ പതിപ്പായ മിനി ക്ലബ് മാന്‍ ഇന്ത്യന്‍ സമ്മര്‍ എഡിഷനാണ് ജയസൂര്യ സ്വന്തമാക്കിയിരിക്കുന്നത്. ആകെ 15 മോഡലുകളാണ് മിനികൂപ്പര്‍ ഇന്ത്യന്‍ വിപണിയില്‍ എത്തിച്ചിരിക്കുന്നത്. ഏകദേശം 54 ലക്ഷം രൂപയാണ് ഇതിന്റെ എക്സ്ഷോറൂം വില.
കൊച്ചിയിലെ മിനി ഡീലര്‍ഷിപ്പില്‍ നിന്നാണ് ജയസൂര്യ ഈ എക്സ്ക്ലൂസീവ് അതിഥിയെ സ്വന്തമാക്കിയത്. ഭാര്യ സരിതയ്ക്കും മക്കളായ ആദിയ്ക്കും വേദയ്ക്കുമൊപ്പം എത്തിയാണ് താരം കാര്‍ ഏറ്റുവാങ്ങിയത്.കഴിഞ്ഞ ജൂലായില്‍ ആണ് കുഞ്ചാക്കോ ബോബന്‍ മിനി കൂപ്പര്‍ സ്വന്തമാക്കിയത്. മിനി കൂപ്പറിന്റെ സ്പെഷ്യല് എഡിഷന്‍ തന്നെയായിരുന്നു ചാക്കോച്ചനും സ്വന്തമാക്കിയത്. മിനികൂപ്പറിന്റെ അറുപതാം വാര്‍ഷികത്തോട് അനുബന്ധിച്ച്‌ വിപണിയിലെത്തിച്ച മോഡലായിരുന്നു ഇത്. ഈ സ്പെഷ്യല് എഡിഷനില്‍ വരുന്ന കാറുകള്‍ ആകെ 20 എണ്ണമായിരുന്നു ഇന്ത്യയില്‍ ഇറക്കിയത്, കേരളത്തില്‍ നാലും. അതിലൊന്നാണ് ചാക്കോച്ചന്‍ സ്വന്തമാക്കിയത്. കൂപ്പര്‍ എസിന്റെ മൂന്ന് ഡോര്‍ വകഭേദമാണ് സ്പെഷ്യല് എഡിഷനിലുള്ളത്. ഏകദേശം 40 ലക്ഷം രൂപയാണ് വാഹനത്തിന്റെ എക്സ്ഷോറൂം വില. മിനി കൂപ്പര്‍ എസ് ആണ് മമ്മൂട്ടിയുടെ പക്കലുള്ള മോഡല്‍.
