അഞ്ച് വർഷത്തിന് ശേഷം കരൺ ജോഹർ എത്തുന്നത് വ്യത്യസ്ത പ്രണയകഥയുമായി?
വർഷങ്ങൾക്ക് ശേഷം പുതിയ ചിത്രം പ്രഖ്യാപിച്ചിരിക്കുകയാണ് ബോളിവുഡിലെ
ഹിറ്റ് സംവിധായകൻ കരൺ ജോഹർ. ഏത് തരത്തിലുള്ള ചിത്രം ആയിരിക്കും
എന്നാണ് ആരാധകർ ഉറ്റുനോക്കുന്നത്. റോക്കി ഓർ റാണി കി പ്രേം കഹാനി എന്നാണ് ചിത്രത്തിന്
പേരിട്ടിരിക്കുന്നത്. അതു കൊണ്ടുതന്നെ ഒരു പ്രണയകഥയാണ് ചിത്രം
പറയുന്നതെന്ന് ഉറപ്പായി.
എന്നാൽ വെറമൊരു പ്രണയകഥയല്ല ഇതെന്ന് കരൺ തന്നെ പറയുന്നു. അഞ്ച് വർഷത്തിന്
ശേഷം എത്തുമ്പോൾ കരൺ ജോഹർ എന്ത് അത്ഭുതമായിരിക്കും കാത്തുവയ്ക്കുക
എന്നതുതന്നെയാണ് ബി ടൗണിൽ ഇപ്പോൾ ചർച്ച. രൺവീർ സിങ്ങും ആലിയഭട്ടും ആണ്
ചിത്രത്തിൽ നായികാ നായകൻമാരാകുന്നത്. ഗള്ളിബോയ്ക്ക് ശേഷം ഹിറ്റ് ജോഡികൾ
വീമ്ടും എത്തുകയാണ്. ധർമേന്ദ്ര , ജയ ബച്ചൻ, ശബാന അസ്മി തുടങ്ങിയവരും
പ്രധാന വേഷത്തിൽ എത്തുന്നു.
1988ൽ പുറത്തിറങ്ങിയ മർദോം വാലി ബാത് എന്ന ചിത്രത്തിന് ശേഷം ആദ്യമായാണ്
ധർമേന്ദ്രയും ശബാന ആസ്മിയും ഒരുമിച്ച് അഭിനയിക്കുന്നത്. ചിത്രത്തിൽ
ആലിയഭട്ടിന്‍റെ മുത്തച്ഛനും മുത്തശ്ശിയും ആയാണ് ഇരുവരും അഭിനിയിക്കുന്നത്.
ഇഷിത മൊയ്‍ത്ര, ശശാങ്ക് ഖെയ്‍താന്‍, സുമിത് റോയ് എന്നിവർ ചേർന്നാണ് രചന.
2016ൽ രൺബീർ കപൂർ, ഐശ്വര്യറായ്, അനുഷ്ക ശർമ്മ എന്നിവർ ഒരുമിച്ച
യെ ദിൽ ഹെ മുഷ്കിൽ ആണ് കരണിന്‍റേതായി പുറത്തിറങ്ങിയ അവസാന ചിത്രം.
ധർമ പ്രൊഡക്ഷൻസ് എന്ന പേരിൽ നിരവധി ഹിറ്റ് ചിത്രങ്ങൾ ഇതിനിടയിൽ
നിർമിച്ചു. ഒപ്പം ആന്തോളജി ചിത്രങ്ങളിൽ ചെറുചിത്രങ്ങളും സംവിധാനം ചെയ്തു.
