കരീന സീതയാവേണ്ട; ട്വിറ്ററിൽ താരത്തെ അധിക്ഷേപിച്ച് ക്യാമ്പയിൻ
ബോളിവുഡ് താരം കരീന കപൂറിനെതിരെ ട്വിറ്ററിൽ ബഹിഷ്കരണ ആഹ്വാനം. രാമായണ കഥ അടിസ്ഥാനമാക്കി
ഒരുങ്ങുന്ന സീത- ദ ഇൻകാർനേഷനിൽ , സീതയായി കരീന എത്തുമെന്ന അഭ്യൂഹങ്ങൾക്ക് പിന്നാലെയാണ് ക്യാമ്പയിൻ.
താരത്തെ അധിക്ഷേപിക്കുന്ന തരത്തിലാണ് പല ട്വീറ്റുകളും.
സീതയാവാൻ ഒരു ഹിന്ദു നടി മതിയെന്ന് ചിലർ വാദിക്കുന്നു. കങ്കണ , യാമി ഗൗതം തുടങ്ങിയവരെ പരിഗണിക്കണമെന്ന്
മറ്റൊരു വിഭാഗം ആവശ്യപ്പെടുന്നു. സീതയെക്കാൾ ശൂർപ്പണഖ വേഷമാണ് കരീനയ്ക്ക് ചേരുക എന്നുവരെ ചിലർ
അവഹേളിക്കുന്നുണ്ട്.
ഹിന്ദുക്കൾക്കെതിരെ ബോളിവുഡ് മാഫിയ വിഷം പ്രചരിപ്പിക്കുന്നു. സെയ്ഫ്ഫ് അലിഖാൻ താണ്ഡവിലൂടെ
ഹിന്ദു വികാരം വ്രണപ്പെടുത്തിയെന്നും ഇനി അത് അനവുദിക്കാനാവില്ല എന്നിങ്ങനെ നീളുന്നു ബോയ്ക്കോട്ട്
കരീന കപൂർ ക്യാമ്പയിനിലെ ട്വീറ്റുകൾ. എന്നാൽ വിദ്വേഷമുണ്ടാക്കുന്ന തരത്തിലുള്ള ട്വീറ്റുകളോട് താരം പ്രതികരിച്ചിട്ടില്ല.
അലൗകിക് ദേശായി ആണ് ചിത്രം സംവിധാനം ചെയ്യുന്നത്. 12 കോടി രൂപയാണ് കരീന പ്രതിഫലം ചോദിച്ചെന്ന
തരത്തിൽ വാർത്തകൾ വന്നിരുന്നു. എന്നാൽ സിനിമയുടെ ചർച്ചകൾ അവസാനഘട്ടത്തിലാണെന്നും താരങ്ങളെ
തീരുമാനിച്ചിട്ടില്ലെന്നുമാണ് അണിയറ പ്രവർത്തകർ പ്രതികരിച്ചത്.
