മലയാളത്തിന്റെ സൂപ്പർസ്റ്റാർ മോഹൻലാൽ ആദ്യമായി സംവിധായക കുപ്പായമിടുന്ന ചിത്രം ബറോസിനു വേണ്ടിയുള്ള കാത്തിരിപ്പിലാണ് താരത്തിന്റെ ആരാധകരും സിനിമ പ്രേമികളും. ബിഗ് ബഡ്ജറ്റിൽ ഒരുങ്ങുന്ന ചിത്രത്തെ സംബന്ധിക്കുന്ന അപ്ഡേറ്റുകൾ എല്ലാം ഞൊടിടയ്ക്കുള്ളിലാണ് ഓൺലൈനിൽ എപ്പോഴും വൈറലാവാറുള്ളത്. ഇപ്പോഴിതാ ബറോസിന്റെ ഏറ്റവും പുതിയൊരു അപ്‍ഡേറ്റാണ്ഇത്തരത്തിൽ ചര്‍ച്ചയാകുന്നത്.
ചിത്രത്തിന്റെ ഫൈനല്‍ മിക്സിംഗ് പൂർത്തിയായെന്നും സംവിധായകനും ലാലേട്ടന്റെ ഏറ്റവും അടുത്ത സുഹൃത്തുമായ പ്രിയദർശന്റെ ഉടമസ്ഥതയിലുള്ള ചെന്നൈ ഫോര്‍ ഫ്രെയിംസിലാണ് ചിത്രത്തിന്റെ ഡോള്‍ബി അറ്റ്‍മോസ് മിക്സിംഗ് നടത്തിയത് എന്നുമാണ് പുറത്തുവരുന്നത് വിവരം. ടി കെ രാജീവ് കുമാറാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചത്.
അതേസമയം ‘ബറോസ്’ ക്രിസ്തുമസ് റിലീസായി ഡിസംബർ 19 ന് തിയേറ്ററിലെത്തുമെന്ന റിപ്പോർട്ടുകളുണ്ട്. ‘മൈ ഡിയർ കുട്ടിച്ചാത്തൻ’ സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് മോഹൻലാൽ സിനിമയൊരുക്കുന്നത്. ആന്റണി പെരുമ്പാവൂരാണ് ചിത്രത്തിന്റെ നിർമാണം.മോഹൻലാൽ തന്നെയാണ് സിനിമയിലെ പ്രധാന കഥാപാത്രമായ ബറോസിനെ അവതരിപ്പിക്കുന്നത്.
