ഇന്ത്യൻ എയർഫോഴ്സിൽ ഫൈറ്റർ പൈലറ്റ് ഗ്രൂപ്പ് ക്യാപ്റ്റൻ പ്രശാന്ത് ബാലകൃഷ്ണൻ നായരാണ് നടി ലെനയുടെ ഭർത്താവ്. പ്രശാന്തിനെപ്പോലെ ഒരാളെ കിട്ടിയില്ലായിരുന്നെങ്കിൽ വിവാഹം കഴിക്കാൻ തോന്നില്ലായിരുന്നുനുവെന്നും തങ്ങളുടെ രണ്ടുപേരുടെയും ശീലങ്ങൾ ഒരുപോലെയായതുകൊണ്ട് തന്നെ വിവാഹ ശേഷം ഒരു അഡ്ജസ്റ്റ്മെന്റിന്റെയും ആവശ്യമില്ലായിരുന്നുവെന്നും പറയുകയാണ് നടിയിപ്പോൾ. ആർക്കുമില്ലാത്ത കുറച്ചു ശീലങ്ങൾ തങ്ങൾക്കുണ്ടെന്നും തങ്ങളുടെ പ്രണയം തനി പൈങ്കിളി ആണെന്നും നടി പറയുന്നു.
‘കൊച്ചുകുട്ടികളെപ്പോലെയാണ് ഞങ്ങൾ ജീവിക്കുന്നത്. കുട്ടികൾക്ക് ആ നിമിഷത്തിലെ കാര്യമേയുള്ളൂ . ഞങ്ങളും അങ്ങനെയാണ്. അതാണ് ലൈഫിന്റെ ഭംഗി. വാലെന്റൈൻസ് ഡേയ്ക്ക് ടെഡീബിയറും ചോക്ലേറ്റുമൊക്കെ സമ്മാനിക്കുന്ന പൈങ്കിളി പ്രണയമാണ് ഞങ്ങളുടേത്. സർപ്രൈസ് ഒക്കെ ഉണ്ട്. ലൗലെറ്റർ എഴുതാൻ ഫ്രിഡ്ജിൽ ഒരു ബോർഡുണ്ട്’ ലെന പറയുന്നു.
അതേസമയം സ്പിരിച്വാലിറ്റിയാണ് തന്നെയും പ്രശാന്തിനെയും കോർത്തിണക്കുന്നതെന്നും തങ്ങളുടെ ശീലങ്ങൾ ഏകദേശം ഒരുപോലെയാണെന്നും നടി പറയുന്നു. ‘എല്ലാവർക്കുമില്ലാത്ത കുറേ ശീലങ്ങളുണ്ടെനിക്ക്. അഞ്ചരയ്ക്കും ആറ് മണിക്കുമിടയിൽ ഡിന്നർ കഴിക്കും. അങ്ങനെ ആരെയും ഞാൻ കണ്ടിട്ടില്ല. എന്നും രാവിലെയോ വൈകിട്ടോ മെഡിറ്റേഷനിൽ ഇരിക്കും. വായിക്കുന്ന പുസ്തകങ്ങൾ, കഴിക്കുന്ന ഭക്ഷണങ്ങളൊക്കെ വ്യത്യസ്തമാണ്. ഞാൻ ഭയങ്കര ഹെൽത്ത് കോൺഷ്യസായി ഭക്ഷണം കഴിക്കുന്നയാളാണ്. ബക്വീറ്റ്, കിനോ അങ്ങനെ എല്ലാവരും കഴിക്കാത്ത കുറേ സാധനങ്ങളുണ്ട്. രാത്രി ഒമ്പത്, ഒമ്പതരയാകുമ്പോൾ കിടന്നുറങ്ങും. ഇത്രയും ശീലങ്ങളുള്ള വേറെയാരെയും എനിക്ക് പരിചയമില്ല. ഞാനും പ്രാശാന്തും കണ്ടുമുട്ടുമ്പോഴേ ഞങ്ങളുടെ ശീലങ്ങൾ ഒരുപോലെയാണ്. ഒരു അഡ്ജസ്റ്റ്മെന്റിന്റെയും ആവശ്യമില്ല.’- ലെന പറയുന്നു.
