ന്യൂഡൽഹി∙ സൊമാലിയൻ തീരത്തുനിന്ന് 15 ഇന്ത്യക്കാരടക്കമുള്ള ലൈബീരിയൻ കപ്പല്‍ തട്ടിക്കൊണ്ടുപോയി. തട്ടിക്കൊണ്ടു പോയ കപ്പലിനായി തിരച്ചിൽ തുടങ്ങിയതായി ഇന്ത്യൻ നാവികസേന പറഞ്ഞു . നാവികസേനയുടെ വിമാനം കപ്പലിലുള്ള നാവികരുമായി ബന്ധപ്പെട്ടിരുന്നു. ഇന്നലെ വൈകിട്ടാണ് കപ്പൽ തട്ടിക്കൊണ്ടുപോയതായി സൂചന കിട്ടിയത്.
ലൈബീരിയൻ പതാക ഘടിപ്പിച്ച ‘എംവി ലില നോർഫോൾക്ക്’ എന്ന കപ്പലാണ് തട്ടിക്കൊണ്ടുപോയത്. ഇന്ത്യൻ നാവികസേനയുടെ വിമാനങ്ങൾ നിരീക്ഷണം നടത്തുന്നുണ്ടെന്നും കപ്പലിലുണ്ടായിരുന്ന ജീവനക്കാരുമായി ആശയവിനിമയം നടത്തിയതായും സൈനിക വൃത്തങ്ങളെ ഉദ്ധരിച്ച് വാർത്താ ഏജൻസിസായ എഎൻഐ ആണ് റിപ്പോർട്ട് ചെയ്തത്. തട്ടിക്കൊണ്ടു പോയതു സംബന്ധിച്ച കൂടുതൽ അറിവുകൾ വെളിപ്പെടുത്തിയിട്ടില്ല.
