ആറ്റിങ്ങല്‍: ഭാഗ്യം പലര്‍ക്കും പല രീതിയിലാണ്. വളരെ അപ്രതീക്ഷിതമായി വന്നു ചേരുന്ന വലിയ ഭാഗ്യങ്ങളുമുണ്ട്. കല്ലമ്പുഴ ദേവീ മൂര്‍ത്തിനട ക്ഷേത്രകാര്യദര്‍ശി സി ബിജുകുമാറിനെ തേടിയെത്തിയതും അപ്രതീക്ഷിതമായ ഒരു സൗഭാഗ്യമായിരുന്നു. കേരള സംസ്ഥാന ഭാഗ്യക്കുറിയുടെ ഭാഗ്യമിത്ര പ്രതിമാസ ഭാഗ്യക്കുറിയുടെ ഒന്നാം സമ്മാനമാണ് നിനച്ചിരിക്കാത്ത നേരത്ത് അദ്ദേഹത്തെ തേടിയെത്തിയത്.
ഭാഗ്യക്കുറിയുടെ ഒന്നാം സമ്മാനമായ ഒരു കോടി രൂപയാണ് ബിജുകുമാറിന് സ്വപ്‌ന ഭാഗ്യമായി എത്തിച്ചേര്‍ന്നത്. ബി എം 4 സീരീസിലുള്ള ബി ഇ 293339 എന്ന ഭാഗ്യക്കുറിയാണ് ഒന്നാം സമ്മാനത്തിന് അര്‍ഹമായത്. ഏഴാം തീയതിയായിരുന്നു നറുക്കെടുപ്പ് നടന്നത്. സമ്മാനം ലഭിച്ച വിവരം കഴിഞ്ഞ ദിവസം ലോട്ടറി കച്ചവടക്കാരന്‍ അറിയിക്കുമ്പോഴാണ് ബിജുകുമാര്‍ അറിഞ്ഞത്.
വലിയകുന്ന് ഗവ. പോളിടെക്‌നിക്കിന് സമീപം ലക്ഷ്മീ ഭവനില്‍ ബിജുകുമാര്‍ കഴിഞ്ഞ 19 വര്‍ഷങ്ങളാണ് കൊല്ലമ്പുഴ മൂര്‍ത്തിനടയുടെ ക്ഷേത്രകാര്യദര്‍ശിയാണ്. അഞ്ച് ദിവസം മുമ്പ് ക്ഷേത്രത്തില്‍# ഇരിക്കുമ്പോഴാണ് ബിജുകുമാര്‍ കിളിമാനൂര്‍ സ്വദേശിയായ ഷാജിയില്‍ നിന്നും നൂറ് രൂപയുടെ ലോട്ടറി ടിക്കറ്റ് എടുത്തത്.
സരിതയാണ് ബിജുകുമാറിന്റെ ഭാര്യ. മിഥിലാ ബിജു,. നന്ദനാ ബിജു എന്നിങ്ങനെ രണ്ട് മക്കളുമുണ്ട്. ദേവീ കടാക്ഷമാണ് ലോട്ടറി ടിക്കറ്റിന്റെ രൂപത്തിലെത്തിയതെന്നാണ് ബിജുകുമാര്‍ പറയുന്നത്. ലഭിക്കുന്ന പണം ഉപയോഗിച്ച് ക്ഷേത്രത്തില്‍ അടിയന്തിരമായി തീര്‍ക്കേണ്ട അറ്റകുറ്റ പണികള്‍ തീര്‍ക്കാനാണ് പ്രധാന ആവിശ്യം എന്ന് അദ്ദേഹം പറയുന്നു. ബാക്കി തുകയേ സ്വന്തം ആവശ്യത്തിന് ഉപയോഗിക്കൂ എന്നും ബിജുകുമാര്‍ പറഞ്ഞു.
