വില്ലനാകാൻ മമ്മൂട്ടി? ഷൂട്ടിങ് അടുത്ത മാസം തുടങ്ങുമെന്ന് റിപ്പോർട്ട്
മെഗാസ്റ്റാർ മമ്മൂട്ടി വില്ലനായി അഭിനയിക്കാൻ ഒരുങ്ങുന്നെന്ന് റിപ്പോർട്ട്. തെലുങ്ക് ചിത്രത്തിലായിരിക്കും
മമ്മൂട്ടി വില്ലനാവുന്നത്. കഥയിൽ തൃപ്തനായതുകൊണ്ട് മമ്മൂട്ടി അഭിനയിക്കാൻ തയ്യാറായെന്നാണ് സൂചന.
ഔദ്യോഗിക പ്രഖ്യാപനം ഉടൻ ഉണ്ടായേക്കും. അഖിൽ അക്കിനേനി ആയിരിക്കും ചിത്രത്തിലെ നായകൻ.
ഏജന്റ് എന്നാണ് ചിത്രത്തിന് പേരിട്ടിരിക്കുന്നത്. സെയ്‍രാ നരസിംഹ റെഡ്ഡി എന്ന ചിത്രത്തിന്‍റെ സംവിധായകൻ
സുരേന്ദർ റെഡ്ഡിയാണ് ചിത്രം സംവിധാനം ചെയ്യുന്നത്. കന്നഡ താരം ഉപേന്ദ്രയെ ആണ് ആദ്യം വില്ലനായി പരിഗണിച്ചത്.
എന്നാൽ പിന്നീട് ഇത് മമ്മൂട്ടിയിലേക്ക് എത്തുകയായിരുന്നു എന്ന് തെലുങ്ക് മാധ്യമങ്ങൾ പറയുന്നു.
യാത്രയെന്ന ചിത്രത്തിലാണ് മമ്മൂട്ടി ഇതിനുമുമ്പ് തെലുങ്കിൽ അഭിനിയിച്ചത്.
അടുത്ത മാസം പകുതിയോടെ ഷൂട്ടിങ് ആരംഭിക്കാൻ ആണ് അണിയറപ്രവർത്തകർ ആലോചിക്കുന്നത്.
ഒരു സ്പൈ ഏജന്‍റാണ് നായക കഥാപാത്രം.ചിത്രത്തിൽ നിർണായക സ്വാധീനമുള്ളയാളാണ് വില്ലൻ കഥാപാത്രം.
ഹൈദരാബാദിലും വിദേശത്തും ആയിരിക്കും ചിത്രീകരണം . ദ പ്രീസ്റ്റ് , വൺ എന്നീ ചിത്രങ്ങളാണ് മലയാളത്തിൽ
മമ്മൂട്ടിയുടേതായി അവസാനം പുറത്തിറങ്ങിയത്.
