കോവിഡ് കാലത്തെ കാത്തിരിപ്പിനൊടുവില്‍ നാളെ റിലീസ് ചെയ്യുന്ന തമിഴ് സൂപ്പര്‍ താരം വിജയ് നായകനായ ‘മാസ്റ്റര്‍’ സിനിമയിലെ ചില രംഗങ്ങള്‍ ചോര്‍ന്നു. ക്ലൈമാക്സ് രംഗങ്ങളാണ് കഴിഞ്ഞദിവസങ്ങളില്‍ സമൂഹ മാധ്യമങ്ങളില്‍ പ്രചരിച്ചത്. വീഡിയോ ആരും ഷെയര്‍ ചെയ്യരുതെന്ന് സംവിധായകന്‍ ലോകേഷ് കനകരാജ് അഭ്യര്‍ഥിച്ചു.
‘ഒന്നര വര്‍ഷത്തെ കഠിനപ്രയത്നത്തിലൂടെയാണ് മാസ്റ്റര്‍ നിങ്ങളുടെ മുന്നിലേക്ക് എത്തിക്കുന്നത്. സിനിമ തിയറ്ററില്‍ നിങ്ങള്‍ ആസ്വദിക്കുമെന്നാണ് ഞങ്ങളുടെ പ്രതീക്ഷ. സിനിമയിലെ ലീക്കായ ഭാഗങ്ങള്‍ നിങ്ങള്‍ക്ക് കിട്ടുകയാണെങ്കില്‍ അത് പങ്കുവെക്കരുത്’ -ലോകേഷ് കനകരാജ് ട്വിറ്ററില്‍ കുറിച്ചു.
ഇളയദളപതി വിജയിയും മക്കള്‍ സെല്‍വന്‍ വിജയ് സേതുപതിയും ഒന്നിക്കുന്ന സിനിമ കോവിഡിന് ശേഷം തിയറ്ററുകളില്‍ റിലീസ് ചെയ്യുന്ന ആദ്യ സിനിമയാണ്. വിജയും വിജയ് സേതുപതിയും ആദ്യമായി ഒന്നിക്കുന്ന ചിത്രം കൂടിയാണ് മാസ്റ്റര്‍. കേരളത്തിലടക്കം ചിത്രത്തിന്റെ റിലീസുണ്ട്. 100 കോടി രൂപയാണ് ചിത്രത്തിന്റെ ബജറ്റ്. 2020 ഏപ്രില്‍ ഒമ്ബതിനായിരുന്നു ഈ ചിത്രത്തിന്റെ റിലീസ് ആദ്യം തീരുമാനിച്ചിരുന്നത്.
ലോകേഷ് കനഗരാജ് സംവിധാനം ചെയ്യുന്ന ചിത്രത്തില്‍ വിജയ്, വിജയ് സേതുപതി എന്നിവരെ കൂടാതെ മാളവിക മോഹനന്‍, അര്‍ജുന്‍ ദാസ്, ആന്‍ഡ്രിയ ജെറമിയ, ശാന്താനു ഭാഗ്യരാജ് എന്നിവരും ചിത്രത്തിലുണ്ട്. അനിരുദ്ധാണ് ചിത്രത്തിനായി സംഗീത സംവിധാനം നിര്‍വഹിക്കുന്നത്.
