പാപനാശം 2 വിൽ ഗൗതമിക്ക് പകരം മീന? ഔദ്യോഗിക പ്രഖ്യാപനം ഉടൻ
ദൃശ്യം 2 വിജയത്തിന് പിന്നാലെ തമിഴ് റീമേക്ക് ഉടൻ ഷൂട്ടിങ് തുടങ്ങുമെന്ന് റിപ്പോർട്ട് . കമൽ ഹാസനെ
നായകനാക്കി പാപനാശം എന്ന പേരിലായിരുന്നു തമിഴിൽ ചെയ്തത്. കമൽ ഹാസൻ തയ്യാറായാൽ ഉടൻ
ചിത്രത്തിന്‍റെ ഷൂട്ടിങ് തുടങ്ങുമെന്ന് സംവിധായകൻ ജിത്തു ജോസഫ് അറിയിച്ചിരുന്നു. ചിത്രത്തിന്‍റെ
തെലുങ്ക് പതിപ്പിന്‍റെ ഷൂട്ടിങ് പൂർത്തിയായിരുന്നു.
മോഹൻ ലാൽ ചിത്രം റീമേക്ക് ചെയ്തപ്പോൾ കമൽഹാസനും ഗൗതമിയുമാണ് പാപനാശത്തിൽ പ്രധാന
വേഷത്തിൽ എത്തിയത്. ചിത്രത്തിന്‍റെ രണ്ടാംഭാഗത്തിൽ ഗൗതമി ഉണ്ടാവില്ല എന്നാണ് പുതിയ
റിപ്പോർട്ടുകൾ. മീനയായിരിക്കും കമൽഹാസന്‍റെ ഭാര്യയായി അഭിനയിക്കുക എന്നാണ് വിവരം.
മലയാളം, തെലുങ്ക് ചിത്രങ്ങളിൽ മീനയാണ് നായികയായി എത്തിയത്.
13 വർഷമായി ഒരുമിച്ച് ജീവിക്കുകയായിരുന്നു കമലഹാസനും ഗൗതമിയും. ആ സമയത്താണ് ഇരുവരും
ചിത്രത്തിന്‍റെ ആദ്യ ഭാഗത്തിൽ അഭിനയിച്ചത്. ഇരുവരുടെയും പ്രകടനം ഏറെ ശ്രദ്ധിക്കപ്പെടുകയും
ചെയ്തിരുന്നു. 2016ൽ ആണ് അഭിപ്രായ വ്യത്യാസം മൂലം ഇരുവരും പിരിഞ്ഞിരിക്കുന്നു. പിന്നാലെ
പ്രതിഫലം നൽകിയില്ലെന്ന ആരോപണവുമായി ഗൗതമി രംഗത്തെത്തുകയും ചെയ്തു.
ലോകേഷ് കനകരാജിന്‍റെ വിക്രം ആണ് കമൽഹാസൻ അടുത്തതായി അഭിനയിക്കുന്ന ചിത്രം.
വിക്രം ഷൂട്ടിങ് തുടങ്ങുന്നതിന് മുന്നേ പാപനാശം 2 പൂർത്തിയാക്കാനാണ് ആലോചന. അണിയറ
പ്രവർത്തകരെ ഉൾപ്പടെ ഉടൻ പ്രഖ്യാപിച്ചേക്കും.
