ലോക്ക്ഡൗണ്‍ സമയത്താണ് നടന്‍ മോഹന്‍ലാല്‍ തന്റെ കൊച്ചിയിലെ വീട്ടില്‍ പച്ചക്കൃഷി ആരംഭിക്കുന്നത്. തക്കാളിയും പച്ചമുളകും പാവയ്ക്കയും ഉള്‍പ്പടെയുള്ളവ നട്ടുവളര്‍ത്തിയ കൃഷിത്തോട്ടം താരം നേരത്തെ ആരാധകരെ പരിചയപ്പെടുത്തിയിരുന്നു. ഇപ്പോള്‍ ഇതാ വീണ്ടും പച്ചക്കറി വിളവെടുത്തിരിക്കുകയാണ് താരം. സോഷ്യല്‍ മീഡിയയില്‍ പങ്കുവെച്ച വിഡിയോയിലൂടെയാണ് താരം തന്റെ കൃഷിയിടത്തിന്റെ വിശേഷങ്ങള്‍ പങ്കുവെച്ചത്.
നീല ഷര്‍ട്ടും കറുത്ത മുണ്ടും ഉടുത്ത് കൃഷിയിടത്തിലേക്ക് ഇറങ്ങുകയാണ് താരം. ആദ്യം ചെടികള്‍ക്ക് വെള്ളമൊഴിച്ച്‌ പരിപാലിച്ച ശേഷം വിളവെടുക്കാന്‍ ഇറങ്ങി. തക്കാളി, ചൊരയ്ക്ക, പടവലങ്ങ, പാവയ്ക്ക, പീച്ചിങ്ങ തുടങ്ങിയ പച്ചക്കറികള്‍ പറിച്ച്‌ കൊട്ടയിലാക്കുകയാണ് താരം. താരത്തിന്റെ പച്ചക്കറി തോട്ടത്തിന്റെ സംരക്ഷകനായ ദാസിനെയും ഒപ്പം കാണാം.
താന്‍ വീട്ടില്‍ വരുമ്ബോള്‍ എല്ലാം ഇവിടെ നിന്നുള്ള പച്ചക്കറികളാണ് കഴിക്കുന്നത് എന്നാണ് താരം പറയുന്നത്. കൂടാതെ പുതിയ പച്ചക്കറികള്‍ കൃഷിചെയ്യാനുള്ള തയാറെടുപ്പിലാണ്. എല്ലാവര്‍ക്കും ഇതുപോലെ പച്ചക്കറി കൃഷി ചെയ്യാനാകുമെന്നും വീട്ടില്‍ സ്ഥലമില്ലെങ്കില്‍ ടെറസില്‍ കൃഷി ചെയ്യണമെന്നും താരം ആരാധകരോട് താരം പറഞ്ഞു.
