വിവാഹശേഷം അഭിനയം നിർത്തി അമേരിക്കയിലേക്ക് താമസം മാറിയോ എന്ന ആരാധകരുടെ ചോദ്യത്തിന് മറുപടിയുമായി നടി ലെന. താൻ ഇപ്പോൾ ഇന്ത്യയിൽ തിരിച്ചെത്തി കൊച്ചിയിൽ താമസിക്കുകയാണെന്ന് നടി വ്യക്തമാക്കി. ജീത്തു ജോസഫ് സംവിധാനംചെയ്യുന്ന ‘വലതുവശത്തെ കള്ളൻ’ എന്ന ചിത്രത്തിലൂടെ താൻ തിരിച്ചുവരികയാണെന്നും നടി അറിയിച്ചു.
‘അടുത്തിടെ ശ്രദ്ധിച്ചതാണ്, ഞാൻ അമേരിക്കയിലേക്ക് താമസം മാറിയതാണോ, അഭിനയത്തിൽനിന്ന് വിട്ടുനിന്നതാണോ എന്ന കാര്യത്തിൽ സിനിമാ മേഖലയിലെ സഹപ്രവർത്തകർക്കും ആരാധകർക്കും ഒരുപാട് ആശയക്കുഴപ്പമുണ്ട്. ഞാൻ ഇപ്പോൾ ഇന്ത്യയിലേയ്ക്ക് മടങ്ങിയെത്തി കൊച്ചിയിൽ താമസിക്കുന്നു. അഭിനയത്തിലേക്കും തിരിച്ചെത്തിയിട്ടുണ്ട്’, നടി സാമൂഹികമാധ്യമങ്ങളിൽ കുറിച്ചു.
‘എന്റെ കം-ബാക്ക് ചിത്രം ‘വലതുവശത്തെ കള്ളൻ’ സംവിധാനംചെയ്ത ജീത്തു ജോസഫിന് ഹൃദയം നിറഞ്ഞ നന്ദി. ചിത്രം ജനുവരി 30-ന് റിലീസ് ചെയ്യും. നിങ്ങൾ നൽകിയ എല്ലാ സ്നേഹത്തിനും പിന്തുണയ്ക്കും നന്ദി’, അവർ കൂട്ടിച്ചേർത്തു.
2024 ജനുവരിയിൽ ലെനയും ഗഗൻയാൻ ബഹിരാകാശയാത്രിക സംഘത്തിലെ എയർഫോഴ്സ് ഗ്രൂപ്പ് ക്യാപ്റ്റൻ പ്രശാന്ത് ബാലകൃഷ്ണനുമായുള്ള വിവാഹം നടന്നിരുന്നു. വിവാഹവിവരം ഏറെ നാളുകൾക്കുശേഷമായിരുന്നു ലെന പുറത്തുവിട്ടത്. പത്തുമാസത്തോളം ലെന പ്രശാന്തിനൊപ്പം അമേരിക്കയിലായിരുന്നു.
