മുംബൈ: നഗരത്തിലെ ബഹുനില അപ്പാര്‍ട്ട്മെൻ്റ് കോംപ്ലക്സിൽ വൻ തീപിടുത്തം. ഫ്ലാറ്റിൻ്റെ 19-ാം നിലയിലാണ് തീപിടുത്തമുണ്ടായത്. അവിഘ്ന പാര്‍ക്ക് സൊസൈറ്റിയിലെ കെട്ടിടത്തിലാണ് തീപിടുത്തം റിപ്പോര്‍ട്ട് ചെയ്തതെന്നും തീയണയ്ക്കാനുള്ള ശ്രമം തുടരുകയാണെന്നുമാണ് വിവരം.
അപകടത്തിൽ ഒരു മരണം സ്ഥിരീകരിച്ചതായി റിപ്പോര്‍ട്ടുകളുണ്ട്. തീയണയ്ക്കാനായി 14 ഫയര്‍ എൻജിനുകളും പരേലിലെത്തിയിട്ടുണ്ട്. തീപിടുത്തമുണ്ടായ കെട്ടിടത്തിൻ്റെ 19-ാം നിലയിൽ നിന്ന് ഒരാള്‍ താഴേയ്ക്ക് ചാടുന്നതിൻ്റെ ദൃശ്യങ്ങളും പുറത്തു വന്നിട്ടുണ്ട്. നഗരത്തിൽ കിലോമീറ്ററുകള്‍ അകലെ വരെ കറുത്ത പുക ദൃശ്യമാണെന്നാണ് റിപ്പോര്‍ട്ടുകള്‍. 30 വയസുള്ള അരുൺ തിവാരിയാണ് അപകടത്തിൽ മരിച്ചതെന്നും ഇയാളെ 12.45 ന് മരിച്ച നിലയിൽ ആശുപത്രിയിൽ എത്തിക്കുകയായിരുന്നുവെന്നും കെഎഎം ആശുപത്രി അധികൃ‍തര്‍ അറിയിച്ചു. സ്ഥലത്ത് മുംബൈ മേയര്‍ കിഷോരി പഡ്നേക്കറും മറ്റു മുതിര്‍ന്ന ഉദ്യോഗസ്ഥരും എത്തി രക്ഷാപ്രവര്‍ത്തനങ്ങള്‍ ഏകോപിപ്പിക്കുന്നുണ്ട്. കെട്ടിടത്തിൽ നിന്ന് 26 പേരെ രക്ഷിച്ചതായി ഉദ്യോഗസ്ഥരെ ഉദ്ധരിച്ച് ടൈംസ് ഓഫ് ഇന്ത്യ റിപ്പോർട്ട് ചെയ്തു.
തീപിടുത്തത്തെക്കുറിച്ച് വിവരം ലഭിച്ച ഉടൻ തന്നെ ഫയർ ഫോഴ്സ് സ്ഥലത്തെത്തിയെന്നും രക്ഷാപ്രവർത്തനം തുടങ്ങിയെന്നും മേയർ പറഞ്ഞു. ഇതിനിടെ ഒരാൾ ഭയന്നു താഴേയ്ക്ക് ചാടുകയായിരുന്നുവെന്നും അവർ പറഞ്ഞു. ഇക്കാര്യത്തിൽ അധികൃതരുടെ ഭാഗത്തു നിന്ന് വീഴ്ചയുണ്ടായിട്ടില്ലെന്നും മേയർ പറഞ്ഞതായി എൻഡിടിവി റിപ്പോർട്ട് ചെയ്തു. തീപിടുത്തം ഉണ്ടാകാനുള്ള കാരണം എന്താണെന്ന് ഇതുവരെ വ്യക്തമായിട്ടില്ല.
തീപിടുത്തമുണ്ടായ ഉടൻ ഇവിടെ പരിശോധിക്കാനായി എത്തിയ സുരക്ഷാജീവനക്കാരനാണ് താഴെ വീണു മരിച്ചതെന്നാണ് ടൈംസ് ഓഫ് ഇന്ത്യ റിപ്പോർട്ട്. തീപിടുത്തത്തെപ്പറ്റി അന്വേഷിക്കാനും ബിഎംസി ഉത്തരവിട്ടിട്ടുണ്ട്.
ഇതിനിടെ തൊട്ടുമുകളിലെ നിലയിലേയ്ക്കും തീ പടർന്നെന്നാണ് റിപ്പോർട്ടുകൾ. കെട്ടിടത്തിൻ്റെ ആദ്യത്തെ ഏഴു നിലകളിൽ വാഹനങ്ങൾക്കുള്ള പാർക്കിങ് സൌകര്യം മാത്രമാണുള്ളത്. കെട്ടിടത്തിൻ്റെ ഏറ്റവും മുകൾനില വരെ ആളുകൾ താമസിക്കുന്നുണ്ട്. ഇതിനോടകം തന്നെ കെട്ടിടത്തിലെ ഭൂരിഭാഗം താമസക്കാരെയും പുറത്തിറക്കാൻ കഴിഞ്ഞെന്നും തീ നിയന്ത്രണവിധേയമാക്കിയെന്നും രക്ഷാപ്രവർത്തകർ മാധ്യമങ്ങളോടു പറഞ്ഞു. ആദ്യം ലെവൽ മൂന്ന് തീപിടുത്തമാണ് ഉണ്ടായതെന്നായിരുന്നു വിശദീകരണമെങ്കിലും ഇത് പിന്നീട് ലെവൽ 4 ആയി ഉയർത്തുകയായിരുന്നു.
