നിഗൂഢത ഒളിപ്പിച്ച കോൾഡ് കേസ്; വീണ്ടും പൊലീസ് വേഷത്തിൽ തിളങ്ങി പൃഥ്വിരാജ്
ആരാധകരുടെ കയ്യടി നേടി പൃഥ്വിരാജിന്‍റെ പുതിയ ചിത്രം കോൾഡ് കേസ്. ആമസോൺ പ്രൈമിൽ റിലീസ്
ചെയ്ത ചിത്രത്തിന് മികച്ച പ്രതികരണമാണ് ലഭിക്കുന്നത്. എസ് പി സത്യജിത്ത് എന്ന കഥാപാത്രമായാണ്
പൃഥ്വിരാജ് എത്തുന്നത്. ഇൻവെസ്റ്റിഗേഷൻ ത്രില്ലറിനൊപ്പം ഹൊററിനു കൂടി പ്രാധാന്യം നൽകിയാണ്
ചിത്രം ഒരുക്കിയിരിക്കുന്നത്.
പരസ്യസംവിധായകനും ഛായാഗ്രാഹകനുമായ തനു ബാലക് ആണ് ചിത്രം സമവിധാനം ചെയ്തിരിക്കുന്നത്.
അരുവി എന്ന ചിത്രത്തിലൂടെ ശ്രദ്ധേയയായ അദിതി ബാലൻ ആണ് നായിക. പഞ്ച് ഡയലോഗുകൾക്കും
ആക്ഷൻ രംഗങ്ങൾക്കുമപ്പുറം വളരെ പക്വതയോടെ കേസന്വേഷണം നടത്തുന്ന പൊലീസ് ഓഫീസറാണ്
എസ്.പി.സത്യജിത്ത്. ആറ് വർഷത്തിന് ശേഷമാണ് പൃഥ്വിരാജ്
പൊലീസ് വേഷത്തിൽ എത്തുന്നത്.
കായലിൽ വലയിടുന്ന ഒരാൾക്ക് പ്ലാസ്റ്റിക് കവറിൽ പൊതിഞ്ഞ നിലയിൽ ഒരു തലയോട്ടി കിട്ടുന്നു.
ഇതേക്കുറിച്ച് അന്വേഷിക്കാൻ എത്തുന്ന പ്രത്യേക പൊലീസ് സംഘത്തിന്‍റെ തലവനാണ് സത്യജിത്ത്.
കേസന്വേഷണത്തൊപ്പം മേധ എന്ന മാധ്യമപ്രവർത്തകയ്ക്ക് ഉണ്ടാകുന്ന വ്യക്തിപരമായ
അനുഭവങ്ങളും ചിത്രത്തിൽ അവതരിപ്പിക്കുന്നു. സൂപ്പർ നാച്വറൽ സംഭവങ്ങളെക്കുറിച്ച്
പ്രോഗ്രാം ചെയ്യുന്ന മേധയ്ക്കും അത്തരം അനുഭവങ്ങൾ ഉണ്ടാകുന്നു.സങ്കീർണതകളില്ലാതെ
ഇതിന്‍റെ ചുരുളഴിക്കുന്നിടത്ത് സിനിമ അവസാനിക്കുന്നു.
സുചിത്ര പിള്ള, അലൻസിയർ എന്നിവർക്കൊപ്പം അന്തരിച്ച നടൻ അനിൽ നെടുമങ്ങാടിന്‍റെ
സാന്നിധ്യവും ശ്രദ്ധേയമാണ്. പ്രത്യേക അന്വേഷണ സംഘത്തിലെ പൊലീസുകാരനായാണ് അനിൽ
അഭിനയിച്ചിരിക്കുന്നത്. ശ്രീനാഥ് .വി.നാഥ് ആണ് തിരക്കഥ. പ്രകാശ് അലക്സ് ആണ് സംഗീത സംവിധാനം.
ജോമോൻ ടി. ജോൺ, ഗിരീഷ് ഗംഗാധരൻ എന്നിവരാണ് ഛായാഗ്രഹണം. ആന്‍റോ ജോസഫ് ആണ്
നിർമാണം.
