നാഗ് ചൈതന്യ ബി ടൗണിൽ ; ആമിർഖാനൊപ്പം ‘ലാൽ സിംഗ് ഛദ്ദ’ തുടങ്ങി
ബോളിവുഡിൽ അരങ്ങേറ്റം കുറിച്ച് തെലുങ്കിലെ സൂപ്പർ താരം നാഗ് ചൈതന്യ. ആമിർഖാനൊപ്പം
ലാൽസിംഗ് ഛദ്ദയിലാണ് നാഗ് ചൈതന്യ അഭിനയിക്കുന്നത്. ലഡാക്കിലെ ഷൂട്ടിങ് ലൊക്കേഷനിൽ നിന്നും
ആമിർ തന്നെയാണ് ചിത്രം പങ്കുവച്ചത്. ഇരുവരും സൈനിക വേഷത്തിലാണ് ഉള്ളത്. ആമിറിനും
കിരൺ റാവുവിനും ഒപ്പമുള്ള ഫോട്ടോ നാഗചൈതന്യയും സാമൂഹിക മാധ്യമങ്ങളിൽ പോസ്റ്റ് ചെയ്തു.
1994ൽ പുറത്തിറങ്ങിയ ഹോളിവുഡ് ചിത്രം ഫോറസ്റ്റ് ഗംപിന്‍റെ റീമേക്ക് ആണ് ലാൽസിംഗ് ഛദ്ദ. അദ്വൈത് ചന്ദനാണ്
സംവിധാനം. കരീനാകപൂർ ആണ് നായികയായി എത്തുന്നത്. ആമിർ അവതരിപ്പിക്കുന്ന
കഥാപാത്രത്തിന്‍റെ ആത്മസുഹൃത്തായ ബാല എന്ന കഥാപാത്രമായാണ് നാഗ് ചൈതന്യ
എത്തുന്നത്. കഠിനാധ്വാനം ചെയ്താണ് ആർമി ഓഫീസറുടെ ശരീരപ്രകൃതിക്ക് നാഗ്ചൈതന്യ
നേടിയെടുത്തത്. നേരത്തെ ഈ റോൾ വിജയ് സേതുപതി ചെയ്യുമെന്ന് അഭ്യൂഹങ്ങൾ
ഉണ്ടായിരുന്നു. ലഡാക്കിൽ 20 ദിവസത്തിലധികം ചിത്രീകരണം നടക്കും.
ലവ് സ്റ്റോറി എന്ന തെലുങ്ക് ചിത്രമാണ് നാഗ് ചൈതന്യയുടേതായി ഇനി പുറത്തിറങ്ങാനുള്ളത്.
ശേഖർ കമ്മുല സംവിധാനം ചെയ്യുന്ന ചിത്രത്തിൽ സായ് പല്ലവിയാണ് നായിക. ലവ്സ്റ്റോറിയുടെ
ആദ്യഗാനം അടുത്തിടെ പുറത്തുവിട്ടപ്പോൾ ഹിറ്റ് ചാർട്ടിൽ ഇടം പിടിച്ചിരുന്നു. ‘താങ്ക് യൂ’ ചിത്രവും
ഷൂട്ടിങ് പൂർത്തിയാക്കിയിരിക്കുകയാണ്. വിക്രം കുമാർ സംവിധാനം ചെയ്യുന്ന ചിത്രത്തിൽ
രാഷി ഖന്നയാണ് നാഗ് ചൈതന്യയുടെ നായിക.
