കാലിക്കറ്റിലെ പ്രവേശനവിഭാഗത്തിന് പുതിയ വെബ്സൈറ്റ്
കോഴ്സും കോളേജും എളുപ്പം തിരഞ്ഞെടുക്കാം
കാലിക്കറ്റ് സർവകലാശാലയുടെ പ്രവേശനവിഭാഗത്തിന് വിദ്യാർഥി സൗഹൃദവും സമഗ്രവുമായ പുതിയ പോർട്ടൽ തുറന്നു. https://admission.uoc.ac.in എന്നതാണ് വിലാസം. ബിരുദം, പി.ജി., പി.എച്ച്.ഡി. എന്നിവയുൾപ്പെടെ മുഴുവൻ കോഴ്സുകളുടേയും പ്രവേശന രജിസ്ട്രേഷൻ ഇനി ഇതുവഴിയാകും. കമ്പ്യൂട്ടറിലും മൊബൈൽ ഫോണിലും അനായാസം ഉപയോഗിക്കാവുന്ന പുതുക്കിയ പോർട്ടലിന്റെ ഉദ്ഘാടനം വൈസ് ചാൻസലർ ഡോ എം.കെ. ജയരാജ് നിർവഹിച്ചു. സർവകലാശാലക്കു കീഴിലുള്ള മുഴുവൻ കോളേജുകളുടെയും കോഴ്സുകളുടെയും വിവരങ്ങൾ അനുയോജ്യമായ രീതിയിൽ സെലക്ട് ചെയ്യുന്നതിന് ഒന്നിലധികം ഫിൽറ്ററുകൾ വെബ്സൈറ്റിൽ ഉൾപ്പെടുത്തിയിട്ടുണ്ട്. ഗവ., എയ്ഡഡ്, അൺഎയ്ഡഡ്, വനിത, കമ്മ്യൂണിറ്റി കോളേജ് എന്നിവ ജില്ലാ അടിസ്ഥാനത്തിൽ ഫിൽറ്റർ ചെയ്ത് അനുയോജ്യമായ കോളേജ് തിരഞ്ഞെടുക്കാൻ വിദ്യാർഥികൾക്ക് സാധിക്കും. ഓരോ കോളേജിലെയും കോഴ്സുകൾ, സീറ്റുകളുടെ എണ്ണം, കാറ്റഗറി ടൈപ്പ് (എയ്ഡഡ്/സ്വാശ്രയം) എന്നിവയും തരം തിരിച്ചു ലഭ്യമാണ്. കോളേജുകളുടെ ഗൂഗിൾ മാപ്പ് ലൊക്കേഷനുകൾ, ഹോസ്റ്റൽ സൗകര്യങ്ങൾ, വെബ്സൈറ്റ് വിലാസം എന്നിവയുമുണ്ട്. വിദ്യാർത്ഥികൾക്ക് വേണമെങ്കിൽ കോഴ്സുകളെ മുൻനിർത്തി കോളേജുകളെയും തിരിച്ചും കോഴ്സുകളുടെ യോഗ്യതകൾ അലോട്ടുമെന്റിന് ആധാരമായ ഇന്ഡക്സിങ് മാനദണ്ഡങ്ങൾ എന്നിവ മുൻകൂട്ടി തീരുമാനിക്കാനും പ്രവേശനടപടികൾ എളുപ്പത്തിലാക്കാനും പോർട്ടൽ സഹായകമാവും. കഴിഞ്ഞ വർഷത്തെ അലോട്ടുമെന്റിലെ അവസാന ഇൻഡക്സ് മാർക്ക് വിവരങ്ങൾ റിസർവേഷൻ കാറ്റഗറി അനുസരിച്ച് അറിയാനും സൗകര്യമുണ്ട്. കോവിഡ് സാഹചര്യം കണക്കിലെടുത്താണ് വിദ്യാർഥികൾക്കും കോളേജധികൃതർക്കും കൂടുതൽ സൗകര്യമായ തരത്തിൽ കുറഞ്ഞ സമയത്തിനുള്ളിൽ പോർട്ടൽ തയ്യാറാക്കിയതെന്ന് കമ്പ്യൂട്ടർ സെന്റർ ഡയറക്ടർ ഡോ. വി.എൽ. ലജീഷ് അറിയിച്ചു. അഡ്മിഷൻ സംബന്ധിച്ച മുഴുവൻ ഫീസുകളും ഓൺലൈൻ വഴി അടയ്ക്കാനുള്ള സംവിധാനവും പോർട്ടലിലുണ്ട്. കോളേജുകളുടെയും നോഡൽ ഓഫീസർമാരുടെയും ഇ-മെയിൽ, ഫോൺ നമ്പർ ഉപയോഗപ്പെടുത്തികൊണ്ട് കോളേജിൽ നേരിട്ടു വരാതെ തന്നെ പ്രവേശനാവശ്യങ്ങൾ നിറവേറ്റാനാവും.
