ജോജി, പ്രേമലു, കുമ്പളങ്ങി നൈറ്റ്സ് തുടങ്ങി നിരവധി സൂപ്പർഹിറ്റ് സിനിമകൾ മലയാളികൾക്ക് സമ്മാനിച്ച നിർമാണ കമ്പനിയാണ് ഭാവന സ്റ്റുഡിയോസ്. ഇവരുടേതായി അവസാനം പുറത്തിറങ്ങിയ ഗിരീഷ് എ ഡി ചിത്രം ‘പ്രേമലു’ ബോക്സ് ഓഫീസിൽ വമ്പൻ വിജയമാണ് കൊയ്തത്. മികച്ച പ്രതികരണം നേടിയ സിനിമ 100 കോടിക്കും മുകളിൽ നേടിയിരുന്നു. വലിയ വിജയത്തെത്തുടർന്ന് സിനിമയ്‌ക്കൊരു രണ്ടാം ഭാഗവും പ്രഖ്യാപിച്ചിരുന്നു. ഗിരീഷ് എഡിയുമായി അടുത്തതായി ഒന്നിക്കുന്ന സിനിമ ‘പ്രേമലു 2’ അല്ലെന്ന് ദിലീഷ് പോത്തൻ അറിയിച്ചിരുന്നു.
ഇതിന് പിന്നാലെ ഗിരീഷ് എ ഡി സംവിധാനത്തിൽ നിവിൻ പോളി – മമിതാ ബൈജു ചിത്രമാണ് അടുത്തതായി ഒരുങ്ങുന്നതെന്നാണ് സിനിമയോട് ചേർന്ന് നിൽക്കുന്ന അടുത്ത വ്യത്തങ്ങൾ റിപ്പോർട്ട് ചെയ്യുന്നത്. ലോകേഷിന്റെ എൽ സി യുവിലെ വില്ലന് ശേഷം അടുത്തതായി ഗിരീഷ് എ ഡിയുടെ റൊമാന്റിക് നായകനാകുമോ നിവിൻ എന്നാണ് ആരാധകർ ചോദിക്കുന്നത്. നടൻ തിരികെ ട്രാക്കിലേക്ക് മടങ്ങി എത്തിയതിന്റെ സന്തോഷവും ആരാധകർ പങ്കുവയ്ക്കുന്നുണ്ട്. അധികം വൈകാതെ സിനിമയുടെ ഔദ്യോഗിക അറിയിപ്പും ഉണ്ടാകുമെന്നാണ് റിപ്പോർട്ടുകൾ.
