ഒരു ലാൽ ജോസ് സിനിമയിലൂടെ മലയാളി മനസുകളിലേക്ക് കയറി വന്ന് ഏറെ പ്രിയങ്കരിയായി മാറിയ നടിയാണ് അനുശ്രീ. ചെയ്ത കഥാപാത്രങ്ങളുടെ പ്രത്യേകത കൊണ്ടും സിനിമകളുടെ ജനപ്രിയത കൊണ്ടും പിന്നീടങ്ങോട്ട് അനുശ്രീ മലയാളികൾക്ക് ഏറ്റവുമടുത്തൊരാളായി മാറുകയായിരുന്നു. ഇക്കഴിഞ്ഞ ദിവസം സൈബറിടത്തിൽ വൈറലായ ഒരു വിഡിയോയാണ് ഇത്തരത്തിൽ താരത്തെ മലയാളികൾക്ക് കൂടുതൽ പ്രിയങ്കരിയും ആരാധ്യയും ആയി മാറ്റിയിരിക്കുന്നത്.
ആലപ്പുഴയിലെ ഒരു വസ്ത്രവ്യാപാര സ്ഥാപനത്തിന്റെ ഉദ്ഘാടനത്തിനിടെ ഒരു നറുക്കെടുപ്പും അതിന്റെ സമ്മാന വിതരണവും അന്നേദിവസം സംഘാടകർ ഒരുക്കിയിരുന്നു. ഉദ്ഘാടന ചടങ്ങിനായി സ്ഥലത്ത് എത്തിയതായിരുന്നു നടി ഒപ്പം ഫുട്ബോൾ താരം ഐഎം വിജയനും ഉണ്ടായിരുന്നു. നറുക്കെടുപ്പിൽ ലഭിച്ച നമ്പറും പേരും അവതാരക മൈക്കിലൂടെ വിളിച്ചുപറയുകയായിരുന്നു. 10,000 രൂപയായിരുന്നു സമ്മാനം. എന്നാൽ, തനിക്കാണ് സമ്മാനം ലഭിച്ചതെന്ന് തെറ്റിദ്ധരിച്ച ഒരു വയോധികൻ സദസിൽ നിന്ന് സ്റ്റേജിലേക്ക് കയറിപോവുകയായിരുന്നു. ഏറെ പ്രതീക്ഷയോടെ സ്റ്റേജിലേക്ക് കയറേണ്ടി വന്ന വൃദ്ധന് തനിക്കല്ല സമ്മാനം എന്നറിഞ്ഞതോടെ പൊതുമധ്യത്തിൽ നിരാശനായി തിരിച്ചിറങ്ങേണ്ടി വന്നു. സംഭവം തത്സമയം വേദിയിൽ കണ്ടുനിന്ന നടി ഇത് കണ്ടതോടെ ഇമോഷണൽ ആവുകയായിരുന്നു. വേദിയിൽ വച്ച് നടി കരയുന്നതും പ്രചരിക്കുന്ന വിഡിയോയിൽ കാണാം.
അനുശ്രീയുടെ വിഷമം മനസിലാക്കിയ കടയുടമ വേദിയിൽ വച്ചുതന്നെ വൃദ്ധന് സമ്മാനം പ്രഖ്യാപിച്ചു. പിന്നീട് അനുശ്രീയും അദ്ദേഹത്തിന് ഒരു തുക കൈമാറി. ‘ആ ചേട്ടന് പൈസ കൊടുത്തില്ലെങ്കിൽ എനിക്ക് ഉറങ്ങാൻ പറ്റില്ല’ എന്ന് അനുശ്രീ പറയുന്നതും വൈറൽ വീഡിയോയിലുണ്ട്. സംഭവത്തിന് പിന്നാലെ നിരവധിപേരാണ് അനുശ്രീയെ പ്രശംസിച്ചുകൊണ്ട് രംഗത്തെത്തിയത്.
