ആസിഫ് അലി, അനശ്വര രാജൻ എന്നിവരെ പ്രധാന കഥാപാത്രങ്ങളാക്കി ജോഫിന്‍ ടി ചാക്കോ സംവിധാനം ചെയ്തു വേണു കുന്നപ്പിള്ളി നിർമ്മിച്ച ‘രേഖാചിത്രം’ 2025ലെ ആദ്യ ബ്ലോക്ക്ബസ്റ്റർ ഹിറ്റായി രേഖപ്പെടുത്തി. മലയാളത്തില്‍ അപൂര്‍വ്വമായ ആള്‍ട്ടര്‍നേറ്റ് ഹിസ്റ്ററി എന്ന സബ് ജോണറില്‍ വന്ന ഈ ചിത്രം ഇതിനകം തന്നെ മുടക്കുമുതലിന്റെ അഞ്ചിരട്ടി നേടി കഴിഞ്ഞു. ഇപ്പോഴിതാ ചിത്രത്തെ പ്രശംസിച്ച രംഗത്ത് തിരിക്കുകയാണ് നട ദുൽഖർ സൽമാനും.
രേഖാചിത്രം ഗംഭീര ചിത്രമാണെന്നും ആരെങ്കിലും സിനിമ കാണാൻ വിട്ടു പോയെങ്കിൽ ഉറപ്പായും പോയി കാണണമെന്നും പറഞ്ഞ താരം ചിത്രത്തിന്റെ പ്രധാന അണിയറ പ്രവർത്തകരെ പേരെടുത്തു പറഞ്ഞും അഭിനന്ദിച്ചു. ഇൻസ്റ്റാഗ്രാം സ്റ്റോറിയിലൂടെ ആയിരുന്നു താരത്തിന്റെ പ്രശംസ.
ദുൽഖറിന്റെ വാക്കുകൾ:
രേഖാചിത്രം എന്ന അതി ഗംഭീരമായൊരു സിനിമ കണ്ടു. ആരെങ്കിലും ഈ സിനിമ കാണാൻ വിട്ടു പോയെങ്കിൽ ഉറപ്പായും പോയി കാണണം. ഇതൊരു ത്രില്ലർ സിനിമയാണ്. ഇതിൽ നിഗൂഢതകളുണ്ട്. മലയാളം സിനിമാസ്വാദകർക്ക് മാത്രം ആസ്വദിക്കാനാകുന്ന ഗൃഹാതുരത്വമുണ്ട് ഇതിൽ. ഒപ്പം അവശ്വസനീയമായ പ്രകടനങ്ങളുമായി എന്റെ പ്രിയപ്പെട്ടവരും.
ആസിഫ്.. ഈ ചിത്രത്തിലും കഥാപാത്രത്തിലും മനസ് അർപ്പിച്ചതിന് എല്ലാവിധ സ്നേഹവും അർഹിക്കുന്നു. നിരപരാധിയായ ഇരയുടെ മരണത്തിന് പിന്നിലുള്ള നിഗൂഢതകൾ പുറത്തു കൊണ്ടുവന്ന് അവർക്ക് നീതി കിട്ടുന്നതിന് വേണ്ടിയുള്ള പരിശ്രമങ്ങളിലെ നിരാശയും വേദനയും മനോധൈര്യവുമെല്ലാം ഞങ്ങളെ നിങ്ങളുടെ കാഴ്ചക്കാരാക്കി മാറ്റി. രേഖയെ അവതരിപ്പിച്ച അനശ്വരയിൽ ഒരുപാട് പ്രതീക്ഷകളും നിഷ്കളങ്കതയും ഉണ്ടായിരുന്നു. വിൻസന്റായി അമ്പരപ്പിക്കുന്ന പ്രകടനമാണ് മനോജേട്ടാ നിങ്ങൾ കാഴ്ചവച്ചത്. വിൻസന്റ് ശരിക്കും ഭയപ്പെടുത്തി. മറ്റെല്ലാ അഭിനേതാക്കളും അതി ഗംഭീരമായിരുന്നു. എല്ലാവരുടെ അവരവരുടെ കഥാപാത്രങ്ങളോട് നീതി പുലർത്തിയിട്ടുണ്ട്. ജോഫിൻ, അപ്പു, മുജീബ്, ഷമീർ, സമീറ തുടങ്ങി സിനിമയുടെ മുഴുവൻ ടെക്നീഷ്യൻസിന്റെയും പ്രകടനം മാതൃകാപരമാണ്. ഇനിയും ഇത്തരം മികച്ച വർക്കുകൾ മലയാളത്തിന് സമ്മാനിക്കാൻ നിങ്ങൾക്ക് സാധിക്കട്ടെ!
