കരിയറിലെ വെല്ലുവിളിയേറിയ റോളുമായി നടൻ സിജു വിൽസൺ. വിനയൻ സംവിധാനം ചെയ്യുന്ന ‘പത്തൊൻപതാം നൂറ്റാണ്ട്’ എന്ന ചരിത്ര സിനിമയിലെ നായകനായ ആറാട്ടുപുഴ വേലായുധപ്പണിക്കർ എന്ന വേഷമാണ് സിജു വിൽസൺ അവതരിപ്പിക്കുക.

ഗോകുലം മൂവീസിനു വേണ്ടി ഗോകുലം ഗോപാലനാണ് ബിഗ് ബജറ്റ് ചിത്രം നിർമിക്കുന്നത്. പത്തൊമ്പതാം നൂറ്റാണ്ടിലെ ഏറ്റവും വലിയ സാഹസികനും പോരാളിയുമായിരുന്ന നവോത്ഥാന നായകൻ ആറാട്ടുപുഴ വേലായുധപ്പണിക്കരും, തിരുവിതാംകൂറിനെ വിറപ്പിച്ച തസ്കരവീരൻ കായംകുളം കൊച്ചുണ്ണിയും, മാറുമറയ്ക്കൽ സമരനായിക നങ്ങേലിയും മറ്റനേകം ചരിത്ര പുരുഷൻമാരും കഥാപാത്രങ്ങളാകുന്ന ചിത്രം തൻറെ ഡ്രീം പ്രോജക്‌ട് ആണെന്ന് വിനയൻ വ്യക്തമാക്കിയിരുന്നു. 2020 സെപ്റ്റംബർ മാസത്തിലാണ് ചിത്രം പ്രഖ്യാപിക്കുന്നത്. കോവിഡ് പ്രതിസന്ധി ഒഴിഞ്ഞാൽ ഡിസംബർ മാസം ചിത്രീകരണം തുടങ്ങണം എന്നായിരുന്നു അണിയറപ്രവർത്തകരുടെ പ്രതീക്ഷ.

ഉണ്ണി മുകുന്ദൻ നായകനാകുന്ന ‘മേപ്പടിയാൻ’ ചിത്രത്തിന്റെ ഫസ്റ്റ്‌ലുക്ക് പോസ്റ്റർ പുറത്ത്. മോഹൻലാൽ, പൃഥ്വിരാജ് തുടങ്ങിയ താരങ്ങളുടെ ഔദ്യോഗിക സോഷ്യൽ മീഡിയ പേജുകളിലൂടെയാണ് ഫസ്റ്റ്‌ലുക്ക് പുറത്തുവിട്ടത്. നാട്ടിൻപുറത്തെ ചായക്കടയിൽ നിന്നും ചായ കുടിക്കുന്ന ഉണ്ണിയും സൈജു കുറുപ്പും കോട്ടയം രമേശുമാണ് ഫസ്റ്റ്‌ലുക്കിൽ പ്രത്യക്ഷപ്പെട്ടിരിക്കുന്നത്.

വിഷ്ണു മോഹൻ തിരക്കഥയെഴുതി സംവിധാനം ചെയ്യുന്ന മേപ്പടിയാൻ ഉണ്ണി മുകുന്ദൻ ആദ്യമായി നിർമ്മിക്കുന്ന ചിത്രം കൂടിയാണ്. താരത്തിന്റെ ഉടമസ്ഥതയിലുള്ള ഉണ്ണി മുകുന്ദൻ ഫിലിംസാണ് ചിത്രം നിർമ്മിക്കുന്നത്. ഫാമിലി എന്റടെയ്‌നറായി ഒരുക്കുന്ന ചിത്രം ജയകൃഷ്ണൻ എന്ന സാധാരണക്കാരനായ യുവാവിന്റെ ജീവിതം പറയുന്നതാണ്.

ഇന്ദ്രൻസ്, അജു വർഗ്ഗീസ്, കലാഭവൻ ഷാജോൺ, അഞ്ജു കുര്യൻ, നിഷ സാരംഗ്, അപർണ ജനാർദ്ദനനൻ, കുണ്ടറ ജോണി, മേജർ രവി, ശ്രീജിത്ത് രവി, കോട്ടയം രമേഷ്, പൗളി വൽസൻ, കൃഷ്ണപ്രസാദ്, മനോഹരി അമ്മ തുടങ്ങി നിരവധി താരങ്ങളും ചിത്രത്തിൽ അഭിനയിക്കുന്നുണ്ട്. കഴിഞ്ഞ വർഷം വിദ്യാരംഭ ദിനത്തിലാണ് ചിത്രത്തിന്റെ ഷൂട്ടിംഗ് പാലായിലും പരിസരപ്രദേശങ്ങളിലുമായി ആരംഭിച്ചത്. ചിത്രത്തിനായി സിക്‌സ് പാക്ക് വെടിഞ്ഞ് ഉണ്ണി മുകുന്ദൻ ശരീരഭാരം വർദ്ധിപ്പിച്ചിരുന്നു.

നടി ശിവദ തന്റെ കുടുംബവും കരിയറും ഒന്നിച്ചു കൊണ്ടുപോകുന്ന താരങ്ങളില്‍ ഒരാളാണ്. മുരളി കൃഷ്ണനാണ് ശിവദയുടെ ഭര്‍ത്താവ്. ഇരുവര്‍ക്കും അരുന്ധതി എന്ന് പേരുള്ള ഒരു മകളുമുണ്ട്. സോഷ്യല്‍ മീഡിയകളിലും ഏറെ സജീവമാണ് നടി. അടുത്തിടെ ഒരു മാഗസിന് നല്‍കിയ അഭിമുഖത്തില്‍ താരം അമ്മയായ നിമിഷങ്ങളെ കുറിച്ച്‌ തുറന്ന് പറഞ്ഞിരുന്നു.

ശിവദയുടെ വാക്കുകള്‍ ഇങ്ങനെ;

ജീവിതത്തിലെ അമ്മ വേഷവും സ്‌ക്രീനിലെ തിരക്കുകളുമെല്ലാം ആസ്വദിക്കുന്നയാളാണ് താന്‍. സിനിമ തിരക്കുകളില്‍ നിന്നും എല്ലാം മാറി നിന്ന് ആയിരുന്നു അമ്മയാവാന്‍ തയ്യാറെടുത്തത്. താനും ഭര്‍ത്താവ് മുരളിയും ചെന്നൈയില്‍ ആയിരുന്നപ്പോഴാണ് ആ സന്തോഷ വാര്‍ത്ത അറിയുന്നത്. അത് ആസ്വദിച്ച്‌ തീരുന്നതിന് മുമ്പ് ഭര്‍ത്താവിന് വിദേശത്തേക്ക് പോകേണ്ടതായി വന്നു. മൂന്നാം മാസത്തില്‍ വീട്ടിലറിയിക്കാമെന്നായിരുന്നു കരുതിയത്. വീട്ടുകാരെല്ലാം നാട്ടിലായതിനാല്‍ അവരെ ടെന്‍ഷനടിപ്പിക്കേണ്ടെന്നാണ് കരുതിയത്. സിംപിളായിരിക്കും ഇതെന്നായിരുന്നു ഞാന്‍ കരുതിയത്. വിചാരിച്ച പോലെ എളുപ്പമായിരുന്നില്ല കാര്യങ്ങള്‍. മുരളി കൂടെയില്ലാതെ തന്നെ കഴിയുന്നത് നടക്കുന്നില്ലെന്ന് മനസ്സിലാക്കിയതോടെയായിരുന്നു അച്ഛനേയും അമ്മയേയും ചെന്നൈയിലേക്ക് വിളിച്ചത്

അമ്മമാരുടെ മൂഡ് ഉള്ളിലുള്ള മക്കളെ ബാധിക്കുമെന്ന് മുന്‍പ് കേട്ടിരുന്നു. തുടക്കം മുതല്‍ തന്നെ ഛര്‍ദിയുണ്ടായിരുന്നു. ആ ദിവസങ്ങള്‍ ഓര്‍ക്കാനേ വയ്യ. ഗര്‍ഭകാലത്ത് എല്ലാ മാസവും ഒന്നോ രണ്ടോ ദിവസം ആശുപത്രിയില്‍ കിടക്കേണ്ടി വന്നിരുന്നു. ശാരീരിക ബുദ്ധിമുട്ടുകള്‍ ഒരു തരത്തിലും കുഞ്ഞിനെ ബാധിക്കരുത് എന്നാഗ്രഹിച്ചിരുന്നു. അഞ്ചു മാസം മുതല്‍ യോഗ ചെയ്തു. മാനസികപിരിമുറുക്കം കുറയ്ക്കാന്‍ അത് ഏറെ സഹായിച്ചു. സംഭവബഹുലമായ ഒന്‍പത് മാസം കഴിഞ്ഞ് അരുന്ധതിയെ പ്രസവിക്കുന്ന അന്ന് രാവിലെ കൂടി യോഗ ചെയ്തിട്ടാണ് ആശുപത്രിയിലേക്ക് പോയത്. ആണ്‍കുട്ടിയായാലും പെണ്‍കുട്ടിയായാലും ആരോഗ്യമുള്ള കുഞ്ഞായിരിക്കണം എന്നേ ആഗ്രഹിച്ചിട്ടുള്ളൂ. വേദന തുടങ്ങിയപ്പോള്‍ മുതല്‍ പ്രസവസമയം വരെ മുരളി ഒപ്പമുണ്ടായിരുന്നു. എനിക്ക് ഇപ്പോഴും ഓര്‍മയുണ്ട്. കുഞ്ഞ് പുറത്തേക്ക് വരാന്‍ തയാറായി. കുഞ്ഞിന്റെ തല കാണുന്നുണ്ട് നന്നായി പുഷ് ചെയ്യൂ എന്ന് ഡോക്ടര്‍ പറഞ്ഞപ്പോള്‍ അതുവരെ എന്റെ സൈഡില്‍ എന്നെ ആശ്വസിപ്പിച്ച്‌ നിന്ന മുരളി വാവയെ കാണാനുള്ള ആവേശത്തിലായി.

മുരളിയുടെ ആ മുഖഭാവങ്ങള്‍ ഇപ്പോഴും എന്റെ മനസ്സില്‍ നിന്നു മാഞ്ഞിട്ടില്ല. സത്യം പറഞ്ഞാല്‍ മുരളിയുടെ മുഖം കണ്ടാണ് ആ സന്തോഷം ഞാന്‍ അറിയുന്നത്. പൊക്കിള്‍കൊടി പോലും മുറിക്കുന്നതിനു മുന്‍പേ മുരളി കുഞ്ഞിനെ കയ്യില്‍ വാങ്ങി എന്റെ നേരെ നീട്ടി. ഞാനവളുടെ നെറുകയില്‍ ഉമ്മ വച്ചു. അതുവരെ കരഞ്ഞു കൊണ്ടിരുന്ന അവള്‍ പെട്ടെന്ന് കരച്ചില്‍ നിര്‍ത്തി. അതുവരെ നമ്മള്‍ ‘മാതൃത്വത്തിന്റെ ഫീല്‍’ എന്നൊക്കെ വായിച്ചിട്ടേയുള്ളൂ. ആ നിമിഷം ഞാന്‍ അത് തിരിച്ചറിഞ്ഞുവെന്നും ശിവദ പറയുന്നു.

ബോളിവുഡിന്റെ പ്രിയപ്പെട്ട നടിയാണ് കരീന കപൂര്‍ ഖാന്‍. ഭര്‍ത്താവ് സെയ്ഫ് അലി ഖാനും കരീനയും തങ്ങളുടെ രണ്ടാമത്തെ കുഞ്ഞിനായുള്ള കാത്തിരിപ്പിലാണ്. ദമ്പതികളുടെ ആദ്യ മകന്‍ തൈമുര്‍ അലി ഖാനാണ്. ഇപ്പോള്‍ ഗര്‍ഭകാലത്ത് യോഗ ചെയ്യുന്ന ചിത്രങ്ങള്‍ പങ്കുവെച്ചിരിക്കുകയാണ് കരീന. യോഗ ചെയ്യുന്നത് മനസ്സിന് ശാന്തത നല്‍കുമെന്ന അടിക്കുറിപ്പോടെയാണ് നടി ചിത്രങ്ങള്‍ പങ്കുവെച്ചിരിക്കുന്നത്. പ്രമുഖ ബ്രാന്‍ഡിന്റെ ഫോട്ടോഷൂട്ടിനായിട്ടായിരുന്നു ചിത്രങ്ങള്‍.

ഗര്‍ഭാവസ്ഥയില്‍ നേരത്തെയും നടി ഫോട്ടോഷൂട്ടുകളില്‍ പങ്കെടുത്തിട്ടുണ്ട്. ആ ചിത്രങ്ങളും സോഷ്യല്‍ മീഡിയകളില്‍ വൈറല്‍ ആയിരുന്നു. ഗര്‍ഭകാലം ഒന്നില്‍നിന്നുമുള്ള മാറിനില്‍ക്കലല്ല എന്ന് താരം വ്യക്തമാക്കുന്നു. ഗര്‍ഭാവസ്ഥയ്ക്ക് അനുയോജ്യമായ വസ്ത്രങ്ങള്‍ ഫാഷനില്‍ യാതൊരു വിട്ടുവീഴ്ചയില്ലാതെ കരീന ധരിക്കുന്നുണ്ട്.

കഴിഞ്ഞ ഓഗസ്റ്റിലാണ് രണ്ടാം കുഞ്ഞിനായുള്ള കാത്തിരിപ്പിലാണ് തങ്ങള്‍ എന്ന് കരീനയും ഭര്‍ത്താവ് സെയ്ഫ് അലി ഖാനും ആരാധകരെ അറിയിക്കുന്നത്. ആദ്യ മകന്‍ തൈമുര്‍ അലി ഖാന്റെ ചിത്രങ്ങളും വീഡിയോകളും സോഷ്യല്‍ മീഡിയകളില്‍ വൈറലാണ്.

വിഷ്ണു ഉണ്ണികൃഷ്ണനെ നായകനാക്കി സുജിത് ലാല്‍ ഒരുക്കുന്ന ചിത്രമാണ് ‘രണ്ട്’. ‘ഫൈനല്‍സ്’ എന്ന ചിത്രത്തിനു ശേഷം ഹെവന്‍ലി മൂവീസിന്റെ ബാനറില്‍ സുജിത് ലാല്‍ സംവിധാനം ചെയ്യുന്ന ചിത്രമാണിത്. സമകാലിക രാഷ്ട്രീയാന്തരീക്ഷങ്ങളെ സ്പര്‍ശിച്ചു പോകുന്ന ഒരു പൊളിറ്റിക്കല്‍ സറ്റയറാണ് ചിത്രം.

‘വാവ’ എന്ന ഓട്ടോ ഡ്രൈവറായി വിഷ്ണു ഉണ്ണിക്കൃഷ്ണനെത്തുമ്പോൾ അന്ന രേഷ്മ രാജന്‍ ചിത്രത്തിലെ നായികയായി എത്തുന്നു. ഗ്രാമീണ കുടുംബാന്തരീക്ഷത്തിലാണ് ചിത്രം ഒരുങ്ങുന്നത്. ഏറ്റുമാനൂരും പരിസര പ്രദേശങ്ങളിലുമായി ഷൂട്ടിംഗ് പുരോഗമിക്കുന്ന ചിത്രത്തില്‍ ടിനിടോം, ഇര്‍ഷാദ്, കലാഭവന്‍ റഹ്മാന്‍, സുധി കോപ്പ, ബാലാജി ശര്‍മ്മ, ഗോകുലന്‍, സുബീഷ് സുധി,രാജേഷ് ശര്‍മ്മ തുടങ്ങിയവരും വേഷമിടുന്നു.

സ്വാതന്ത്ര്യം അര്‍ധരാത്രിയില്‍ എന്ന സിനിമയ്‌ക്കു ശേഷം ടിനു പാപ്പച്ചന്‍ സംവിധാനം ചെയ്യുന്ന അജഗജാന്തരം ഫെബ്രുവരി 26 ന് തിയറ്ററുകളിലെത്തും. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ നടന്‍ മമ്മൂട്ടി പുറത്തുവിട്ടു. ഉത്സവപ്പറമ്ബിലേയ്ക്ക്‌ ഒരു ആനയും പാപ്പാനും ഒപ്പം ഒരു കൂട്ടം യുവാക്കളും എത്തുന്നതും തുടര്‍ന്നവിടെ 24 മണിക്കൂറിനുള്ളില്‍ നടക്കുന്ന ആകാംഷ നിറഞ്ഞ സംഭവങ്ങളുമാണ് ‘അജഗജാന്തരം’ എന്ന ചിത്രത്തിന്റെ പശ്ചാത്തലം.

ആന്റണി വര്‍ഗീസ് (പെപ്പെ) സിനിമയില്‍ കേന്ദ്ര കഥാപാത്രത്തെ അവതരിപ്പിക്കുന്നു. മമ്മൂട്ടി പുറത്തിറക്കിയ ഫസ്റ്റ് ലുക്കില്‍ ആന്റണി വര്‍ഗീസ്, അര്‍ജുന്‍ അശോക്, സുധി കോപ്പ, ലുക്‌മാന്‍ എന്നിവര്‍ക്കൊപ്പം ചിത്രത്തിന്റെ തിരക്കഥാകൃത്തുക്കള്‍ കൂടിയായ വിനീത് വിശ്വം, കിച്ചു ടെല്ലസ് എന്നിവരും ഉണ്ട്.

എമ്മാനുവല്‍ ജോസഫും അജിത് തലാപ്പിള്ളിയും ചേര്‍ന്നാണ് ഈ ചിത്രം നിര്‍മിച്ചിരിക്കുന്നത്.ചെമ്പന്‍ വിനോദ് ജോസ്, ജാഫര്‍ ഇടുക്കി, രാജേഷ് ശര്‍മ, സാബു മോന്‍, ടിറ്റോ വില്‍സണ്‍, സിനോജ് വര്‍ഗീസ്, ശ്രീരഞ്ജിനി തുടങ്ങിയവര്‍ ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.ഛായാഗ്രഹണം ജിന്റോ ജോര്‍ജ്, സംഗീതം ജസ്റ്റിന്‍ വര്‍ഗീസ്, എഡിറ്റര്‍ ഷമീര്‍ മുഹമ്മദ്‌, സൗണ്ട് ഡിസൈന്‍ രംഗനാഥ് രവി, ആര്‍ട്ട്‌ ഗോകുല്‍ ദാസ് എന്നിവരാണ്.