സംവിധായകന്‍ ഷാനവാസ് നരണിപ്പുഴയുടെ അപ്രതീക്ഷിത വിയോഗം അവിശ്വസനീയമാണെന്ന് നടന്‍ ജയസൂര്യ. സൂഫിയും സുജാതയും സെറ്റില്‍ വച്ചാണ് സംവിധായകനുമായി താന്‍ അടുക്കുന്നത്. ഇദ്ദേഹത്തെ നേരത്തെ അറിയാമല്ലോ എന്ന തരത്തിലുള്ള അടുപ്പമാണ് തനിക്ക് ഷാനവാസിനോട് തോന്നിയത് എന്നാണ് ജയസൂര്യ മനോരമയോട് പ്രതികരിക്കുന്നത്.

ഒരുപാടു നല്ല നിമിഷങ്ങള്‍ ഷാനവാസിനൊപ്പം ലൊക്കേഷനില്‍ ഉണ്ടായി. ഈ അടുത്ത ദിവസങ്ങളില്‍ ചില സ്വപ്‌നങ്ങള്‍ അദ്ദേഹം പങ്കുവച്ചിരുന്നു. ചില തിരക്കഥയുടെ പണിപ്പുരയിലായിരുന്നു, സ്വപ്നങ്ങള്‍ പലതും ബാക്കിവച്ചാണ് അദ്ദേഹത്തിന്റെ വിയോഗം. ഇനിയും ഒരുപാട് പ്രണയകാവ്യങ്ങള്‍ ആ തൂലികയില്‍ നിന്നും പിറക്കാന്‍ കൊതിച്ചു കാത്തിരിപ്പുണ്ടെന്നും ജയസൂര്യ പറയുന്നു.

ചില സൗഹൃദങ്ങള്‍ ജീവിതാവസാനം വരെയുള്ളതാണ്. ഷാനവാസിനോടൊപ്പമുള്ള നല്ല ഓര്‍മ്മകള്‍ ഒരിക്കലും വിട്ടുപോകില്ല. എന്നും ആ ചിരിച്ച മുഖം ഉള്ളിലുണ്ടാകും എന്നും ജയസൂര്യ പറഞ്ഞു. ഷാനവാസ് സംവിധാനം ചെയ്ത സൂഫിയും സുജാതയും ചിത്രത്തില്‍ ജയസൂര്യ ആയിരുന്നു നായകന്‍. കോവിഡ് പശ്ചാത്തലത്തില്‍ ഒ.ടി.ടി. റിലീസായെത്തിയ ആദ്യ മലയാള ചിത്രമായിരുന്നു സൂഫിയും സുജാതയും.

ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബുവായിരുന്നു നിര്‍മാണം. മൂന്നാമത്തെ സിനിയുമായി ബന്ധപ്പെട്ട ജോലികള്‍ അട്ടപ്പാടിയില്‍ പുരോഗമിക്കുന്നതിനിടെയാണ് ഹൃദയാഘാതം ഉണ്ടായത്. തുടര്‍ന്ന് കോയമ്ബത്തൂരുള്ള ആശുപത്രിയില്‍ പ്രവേശിപ്പിക്കുകയായിരുന്നു. വിദഗ്ധ ചികിത്സയ്ക്കായി ഇന്നലെ കൊച്ചിയിലെ സ്വകാര്യ ആശുപത്രിയില്‍ എത്തിച്ചിരുന്നു. ഇന്നലെ 10.20ന് ആണ് മരണം സംഭവിച്ചത്.

മലയാളികളുടെ പ്രിയപ്പെട്ട ഗായികയും സംഗീത സംവിധായികയുമാണ് സയനോര ഫിലിപ്. പലപ്പോഴും നിറത്തിന്റെ പേരില്‍ താന്‍ മാറ്റി നിര്‍ത്തപ്പെട്ടിട്ടുണ്ടെന്ന് പറയുകയാണ് താരം. ഒരു സ്വകാര്യ ചാനലിലെ പ്രത്യേക പരിപാടിയിലാണ് സയനോര ഇക്കാര്യം തുറന്ന് പറഞ്ഞത്. സ്‌കൂള്‍ കാലഘട്ടം മുതല്‍ നേരിടുന്ന അവഗണന ഗായിക ആയപ്പോഴും തുടരുകയാണെന്ന് താരം പറയുന്നു. പല വലിയ ഷോകളില്‍ നിന്നും തന്നെ മാറ്റി നിര്‍ത്തിയിട്ടുണ്ടെന്ന് സയനോര പറയുന്നു.

സയനോരയുടെ വാക്കുകള്‍ ഇങ്ങനെ, ‘മാറ്റി നിര്‍ത്തപ്പെട്ടതാണോ എന്നെനിക്കറിയില്ല. പക്ഷെ തഴയപ്പെട്ടതായി തോന്നിയിട്ടുണ്ട്. വലിയ ഷോകള്‍ നടക്കുമ്പോള്‍ എന്നെ വിളിക്കാറില്ല. അത് എന്തുകൊണ്ടാണെന്ന് നമ്മള്‍ തീര്‍ച്ചയായും നോക്കിക്കാണേണ്ടതാണ്. പക്ഷെ അതൊക്കെ സമൂഹത്തിന്റെ തന്നെ പ്രശ്‌നങ്ങളാണ്. നമ്മള്‍ വളര്‍ന്ന് വരുമ്പോള്‍ പഠിച്ച ചില പാഠങ്ങള്‍, കാലങ്ങളായി അറിഞ്ഞ് വരുന്ന കാര്യങ്ങളെല്ലാം ശരിയാണോ തെറ്റാണോ എന്ന ചോദ്യം ചോദിക്കാനുള്ള തിരിച്ചറിവ് എല്ലാവരിലും ഉണ്ടാവണം. അത് തെറ്റാണെങ്കില്‍ നമ്മള്‍ അത് മനസിലാക്കാനും പഠിക്കണം. അത്തരം ചെറിയ കാര്യങ്ങളാണ് ഞാന്‍ എപ്പോഴും പറഞ്ഞിട്ടുള്ളത്. ഞാന്‍ അത്തരം കാര്യങ്ങള്‍ ചൂണ്ടിക്കാണിക്കാറുണ്ട്. പക്ഷെ അതിനനുസരിച്ച് അവര്‍ മാറിയോ എന്നെനിക്കറിയില്ല.ജീവിതത്തില്‍ അവഗണിക്കാന്‍ ഒരുപാട് ആളുകള്‍ ഉണ്ടാവും. താന്‍ തഴയപ്പെടേണ്ട വ്യക്തിയാണെന്ന് സ്വയം തോന്നുമ്പോഴാണ് പ്രശ്‌നം. അല്ലാതെ മാറ്റി നിര്‍ത്തുന്നവര്‍ ഒരു വിഷയമല്ല. സ്വന്തം കഴിവ് മനസിലാക്കാന്‍ കഴിഞ്ഞാല്‍ മുന്നോട്ട് തന്നെ പോവുക. വ്യക്തി എന്ന രീതിയില്‍ വളരാന്‍ സ്വയം പരിശ്രമിക്കണം.’

സ്‌കൂളില്‍ പഠിക്കുന്ന കാലത്ത് നിറത്തിന്റെ പേരില്‍ തഴയപ്പെട്ടിട്ടുണ്ട്. ചെറുപ്പത്തില്‍ ഡാന്‍സിനോട് ഇഷ്ടമുണ്ടായിട്ടും കളിക്കാന്‍ സാധിച്ചിട്ടില്ല. സ്‌കൂളിലെ ഡാന്‍സ് ഗ്രൂപ്പിലുണ്ടായിട്ടും നിറമില്ലാത്തതിന്റെ പേരില്‍ ഒഴിവാക്കപ്പെട്ടിട്ടുണ്ട്. സയനോരയെ ഉള്‍പ്പെടുത്താന്‍ പറ്റില്ല, കാരണം മറ്റ് കുട്ടികള്‍ക്കൊക്കെ നിറമുണ്ട് എന്നൊക്കെ പറഞ്ഞിട്ടുണ്ട്. അന്നും എനിക്ക് അത്തരം കാര്യങ്ങള്‍ അത്ഭുതമായിരുന്നു. ഒരാളുടെ നിറം നോക്കിയാണോ ഇഷ്ടപ്പെടുന്നതെന്ന് ഞാന്‍ ആലോചിച്ചിരുന്നു. പിന്നെയാണ് സൗഹൃദങ്ങളില്‍ പോലും നിറത്തിന് വലിയ പ്രാധാന്യമുണ്ടെന്ന പൊള്ളുന്ന സത്യം ഞാന്‍ മനസിലാക്കിയത്.

നമ്മള്‍ എപ്പോഴും ഒരാള്‍ ചെയ്യുന്ന തെറ്റിനെ ചൂണ്ടിക്കാണിക്കാനാണ് ശ്രമിക്കുന്നത്. അല്ലാതെ ആ തെറ്റ് എങ്ങിനെ ഉണ്ടായെന്ന് ആരും പരിശോധിക്കുന്നില്ല. എത്രയോ കാലമായി സമൂഹത്തില്‍ നടന്നുകൊണ്ടിരിക്കുന്ന കാര്യങ്ങളാണിതെല്ലാം. ഒരമ്മക്ക് കറുത്ത കുട്ടി ജനിക്കുമ്പഴേക്കും, ‘അയ്യോ കുട്ടി കറുത്തല്ലോ’ എന്ന് പറയുന്ന സമൂഹത്തിലാണ് നമ്മള്‍ ജീവിക്കുന്നത്. അത്തരത്തിലുള്ള സമൂഹത്തില്‍ നിന്ന് സ്വയം നമുക്കെന്തെങ്കിലും ചെയ്യാന്‍ കഴിയുമെന്ന വിശ്വാസം ഉണ്ടാക്കിയെടുക്കാന്‍ വലിയ ബുദ്ധിമുട്ടാണ്. എന്നാല്‍ ഇപ്പോള്‍ ചെറിയ രീതിയിലുള്ള മാറ്റങ്ങള്‍ ഉണ്ടാവുന്നുണ്ട്. പലരും ഇരുണ്ട നിറത്തെ സ്‌നേഹിക്കുന്നു.

തന്നോട് നിറമില്ലാത്തു കൊണ്ട് ഡാന്‍സിനെടുക്കില്ലെന്ന് പറഞ്ഞ ടീച്ചറെ അല്ല കുറ്റപ്പെടുത്തേണ്ടത്. മറിച്ച് അവര്‍ വളര്‍ന്ന് വന്ന സാഹചര്യവും, കണ്ട് വളര്‍ന്നതുമൊക്കെയാണ് അതിന് കാരണം. കാഴ്ച്ചപ്പാടിന്റെ പ്രശ്‌നമാണത്. കാഴ്ച്ചപ്പാട് മാറ്റിയാല്‍ തന്നെ അത് ശരിയാകുമെന്നാണ് സയനോര അഭിപ്രായപ്പെട്ടത്. തന്നെ വലിയ പരിപാടികളില്‍ നിന്ന് മനപ്പൂര്‍വ്വം മാറ്റി ന്ിര്‍ത്തിയതാണെന്ന് വിശ്വസിക്കുന്നില്ല. പക്ഷെ അവഗണിക്കപ്പെട്ട അവസരങ്ങളുമുണ്ടായിട്ടുണ്ട്. അതെല്ലാം പഴയകാര്യങ്ങളാണ്. അതില്‍ തളരാതെ യാത്ര എപ്പോഴും മുന്നോട്ട് തന്നെയായിരിക്കണം.’

കോവിഡ് ബാധിതയായി മെഡിക്കല്‍ കോളേജ് ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയില്‍ കഴിയുന്ന കവയിത്രി സുഗതകുമാരി ടീച്ചര്‍ (86) അന്തരിച്ചു. ഇന്നു രാവിലെ 10.52നായിരുന്നു അന്ത്യം. ശ്വസനപ്രക്രിയ പൂര്‍ണമായും വെന്റിലേറ്റര്‍ സഹായത്തിലായിരുന്നു. ഹൃദയത്തിന്റെ പ്രവര്‍ത്തനത്തിനും തകരാര്‍ സംഭവിച്ചിരുന്നു. മരുന്നുകളോട് തൃപ്തികരമായി പ്രതികരിക്കുന്നില്ലായിരുന്നു.

വിദഗ്ധ ഡോക്ടര്‍മാരുടെ സംഘത്തിന്റെ സൂക്ഷ്മ നിരീക്ഷണത്തിലായിരുന്നു സുഗതകുമാരി ടീച്ചര്‍. തിങ്കളാഴ്ചയാണ് സുഗതകുമാരിയെ തലസ്ഥാനത്തെ സ്വകാര്യ ആശുപത്രിയില്‍ നിന്നും മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. കോവിഡ് സ്ഥിരീകരിച്ച സുഗതകുമാരി ടീച്ചര്‍ ആശുപത്രിയിലെത്തുമ്ബോള്‍ ബ്രോങ്കോ ന്യുമോണിയയെ തുടര്‍ന്നുള്ള ശ്വാസതടസമാണ് പ്രധാന പ്രശ്നമായി ഉണ്ടായിരുന്നത്. ആശുപത്രിയില്‍ പ്രവേശിപ്പിച്ചയുടന്‍ വിദഗ്ധ ഡോക്ടര്‍മാരുടെ സംഘം പരിശോധിക്കുകയും തീവ്രപരിചരണത്തില്‍ വെന്റിലേറ്ററിലേയ്ക്ക് മാറ്റുകയും ചെയ്തിരുന്നു.

മലയാളത്തിലെ എക്കാലത്തെയും മികച്ച ചിത്രങ്ങളിലൊന്നായ മണിച്ചിത്രത്താഴ് പുറത്തിറങ്ങിയിട്ട് ഡിസംബര്‍ 23ന് 27 വര്‍ഷം തികയുകയാണ്. 27വര്‍ഷം പിന്നിട്ടിട്ടും ചിത്രത്തിലെ നാഗവല്ലി എന്ന കഥാപാത്രത്തെ ഓര്‍ക്കാത്ത ഒരു ദിവസം പോലുമില്ലെന്ന് പറയുകയാണ് ചിത്രത്തിലെ നായിക ശോഭന. സോഷ്യല്‍ മീഡിയയിലൂടെയാണ് ശോഭന മണിച്ചിത്രത്താഴിനെക്കുറിച്ചുള്ള ഓര്‍മ പങ്കുവച്ചത്.

‘മണിച്ചിത്രത്താഴ്’ എന്ന, എക്കാലത്തെയും മെഗാ ഹിറ്റ് സിനിമയുടെ 27ാം പിറന്നാള്‍ ആണ് നാളെ. ഒരു ബ്ലോക്ക്ബസ്റ്റര്‍ സിനിമ എന്നതിലുപരി, ചലച്ചിത്രനിര്‍മ്മാണകലയ്ക്ക് ഇന്നും ഒരു റഫറന്‍സ് ഗ്രന്ഥമായി ഈ ചിത്രം നിലകൊള്ളുന്നു. എന്റെ ജീവിത യാത്രയില്‍ ഈ ചിത്രം വലിയ ഒരു മുതല്‍ക്കൂട്ട് തന്നെയായിരുന്നു. ഇന്നും അതെ. നാഗവല്ലിയെ കുറിച്ച്‌ ഓര്‍മ്മിപ്പിക്കപ്പെടാതെ ഒരു ദിവസം പോലും കടന്നു പോകുന്നില്ല എന്ന് തന്നെ പറയാം. സ്രഷ്ടാവ് ശ്രീ ഫാസിലിന് എല്ലാ നന്മകളും നേരുന്നു.’ശോഭന ഇന്‍സ്റ്റഗ്രാമില്‍ കുറിച്ചു.1993 ഡിസംബര്‍ 23നാണ് ‘മണിച്ചിത്രത്താഴ്’ തിയേറ്ററുകളിലെത്തിയത്.

നിരവധി സീരിയലുകളിലൂടെ കുടുംബപ്രേക്ഷകരുടെ മനം കവര്‍ന്ന നടി മൃദുല വിജയ് വിവാഹിതയാകുന്നു. വരനും സീരിയല്‍ താരമാണ്.. മഴവില്‍ മനോരയിലെ മഞ്ഞില്‍ വിരിഞ്ഞ പൂവ് പരമ്പരയിലൂടെ ശ്രദ്ധ നേടിയ നടന്‍ യുവകൃഷ്ണനാണ് മൃദുലയ്ക്ക് താലി ചാര്‍ത്തുന്നത്. ഇവരുടെ വിവാഹനിശ്ചയം ഡിസംബര്‍ 23 ബുധനാഴ്ച തിരുവനന്തപുരത്ത് വെച്ചു നടക്കും. ഇരുവരുടെയും പൊതു സുഹൃത്ത് വഴി വന്ന ആലോചനയാണ് വിവാഹത്തിന് വഴി മാറുന്നത്.

2015 മുതല്‍ സീരിയല്‍ അഭിനയത്തില്‍ സജീവമായ മൃദുല വിജയ് പ്രേക്ഷകരുടെ പ്രിയ താരമാണ്. നിരവധി സീരിയലുകളില്‍ നായികയായി തിളങ്ങിയ താരമാണ് മൃദുല. തിരുവനന്തപുരം സ്വദേശിയായ മൃദുലയുടെ അച്ഛനമ്മമാര്‍ വിജയകുമാറും റാണിയുമാണ. ഏക സഹോദരി പാര്‍വ്വതി. സംഗീത-നൃത്ത അദ്ധ്യാപികയായ കൃഷ്ണവേണിയാണ് യുവയുടെ അമ്മ. നന്ദിനിയും നന്ദിതയുമാണ് ചേച്ചിമാര്‍.

നടന്‍ സോനു സൂദിനായി അമ്ബലം പണിത് തെലങ്കാനയിലെ സിദ്ദിപ്പെട്ട് ജില്ലയിലെ ഡുബ്ബ താന്‍ഡ ഗ്രാമവാസികള്‍. താരത്തിന്റെ പ്രതിമ പ്രതിഷ്ഠിച്ചഅമ്പലത്തിന്റെ ഉദ്ഘാടനം ഞായറാഴ്ചയാണ് നടന്നത്. കോവിഡ് കാലത്ത് സോനു സൂദ് ചെയ്ത പ്രവര്‍ത്തനങ്ങള്‍ക്കുള്ള ആദരമാണ് ഈ പ്രവര്‍ത്തി. വൈറസ് വ്യാപന നാളുകളില്‍ ആയിരക്കണക്കിന് ആളുകള്‍ക്കാണ് നടന്‍ സഹായവുമായി എത്തിയത്. ലോക്ഡൗണില്‍ സ്വന്തം നാടുകളിലേക്ക് മടങ്ങാന്‍ തൊഴിലാളികള്‍ക്ക് ബസ് ഒരുക്കിയും പലര്‍ക്കും സാമ്പത്തിക സഹായം ചെയ്തുമെല്ലാം നടന്‍ മുന്നിട്ടിറങ്ങിയിരുന്നു.

പ്രതിമയ്ക്ക് മുന്നില്‍ ആരതിയുഴിയുകയും നാടിന്റെ തനത് നൃത്ത രൂപങ്ങളും പരിപാടികളും അവതരിപ്പിക്കുകയും ചെയ്തു. ജില്ലാ അധികാരികളുടെ സഹായത്തോടെയാണ് ഈ ഉദ്യമമെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. സോനു മഹാമാരിയുടെ നാളില്‍ നിരവധി പേര്‍ക്ക് സഹായം ചെയ്‌തെന്നും അദ്ദേഹത്തിനായി ഇങ്ങനൊരു കാര്യം ചെയ്യാനായതില്‍ സന്തോഷമുണ്ടെന്നുമാണ് ഗ്രാമവാസികള്‍ പറയുന്നത്. എന്നാല്‍ ഈ പ്രവര്‍ത്തി വളരെയധികം വികാരമുളവാക്കുന്നതാണെന്ന് പറഞ്ഞ സോനു താന്‍ ഇതിന് അര്‍ഹനല്ലെന്നും ട്വിറ്ററില്‍ പ്രതികരിച്ചു. അടുത്തിടെ പാവപ്പെട്ടവരെയും അന്തര്‍സംസ്ഥാന തൊഴിലാളികളെയും സഹായിക്കുന്നതിനായി മുംബൈയിലുള്ള തന്റെ രണ്ട് കടകളും ആറ് ഫ്‌ലാറ്റുകളും വിറ്റ് താരം 10 കോടി രൂപ സമാഹരിച്ചിരുന്നു

വിവാഹത്തിന്റെ ഒന്‍പതാം വാര്‍ഷികം ആഘോഷിച്ചിരിക്കുകയാണ് മലയാളത്തിന്റെ സ്വന്തം ദുല്‍ഖര്‍ സല്‍മാനും ഭാര്യ അമാല്‍ സൂഫിയയും. ഒന്നിച്ചുള്ള ജീവിതം ഒരു ദശാബ്ദത്തിലേക്ക് കടക്കുമ്ബോള്‍ ഹൃദ്യമായ വാക്കുകള്‍ കുറിച്ചാണ് ദുല്‍ഖര്‍ അമാലിനോടുള്ള സ്നേഹം പ്രകടിപ്പിച്ചിരിക്കുന്നത്.

“സന്തോഷം നിറഞ്ഞ ഒന്‍പത് വര്‍ഷങ്ങള്‍!! ഒരു ദശകത്തോട് അടുക്കുന്നു! കൂടുതല്‍ അടുക്കുകയും ശക്തമാവുകയും ഒന്നിച്ച്‌ വളരുകയും ചെയ്തിരിക്കുന്നു. സൂപ്പര്‍ ഗ്ലൂ പോലെ എന്തോ ഒന്ന് നമ്മളെ എപ്പോഴും അടുപ്പിച്ചു നിര്‍ത്തുന്നു. ഒരു ദശാബ്ദം നീണ്ട നമ്മുടെ യാത്ര, ജീവിതത്തില്‍ ഇടറുമ്ബോഴെല്ലാം പരസ്പരം ചേര്‍ത്തു പിടിച്ച്‌ മുന്നോട്ടു തന്നെ നടക്കുന്നു. ഒന്നിച്ച്‌ ശക്തരായി നില്‍ക്കുന്നു…”, ദുല്‍ഖര്‍ കുറിച്ചു.

2011 ഡിസംബര്‍ 22നാണ് ദുല്‍ഖറും അമാലും വിവാഹിതരായത്. ഒരു ആര്‍ക്കിടെക്‌ട് കൂടിയാണ് അമാല്‍.