മോന്‍സന്‍ മാവുങ്കലിന്‍റെ സാമ്പത്തിക ഇടപാടില്‍ നടന്‍ ബാലയ്ക്ക് നേരിട്ട് ബന്ധമുണ്ടെന്ന ആരോപണവുമായി പരാതിക്കാരന്‍ എം.ടി.ഷമീര്‍.

എന്നാല്‍ ‍ആരോപണം ബാല നിഷേധിച്ചു. മുന്‍ ഡ്രൈവര്‍ അജിയും മോന്‍സനും തമ്മിൽ തെറ്റിയപ്പോള്‍ പരിഹരിക്കാനായി ബാല ഇടപെട്ടുവെന്നാണ് എം.ടി.ഷമീറിന്‍റെ ആരോപിക്കുന്നത്. അജിയും ബാലയും തമ്മിലുള്ള ഫോണ്‍ സംഭാഷണവും ഷമീര്‍ പുറത്തുവിട്ടുരുന്നു.ബാലയും മോന്‍സനും തമ്മിലുള്ള സാമ്പത്തിക ഇടപാടുകളെക്കുറിച്ചും അന്വേഷിക്കണമെന്ന് പരാതിക്കാരനായ എം.ടി. ഷമീർ പറഞ്ഞു. എന്നാല്‍ മോന്‍സന് മോഹന്‍ലാലിനെ പരിചയപ്പെടുത്തിയത് താനല്ലെന്ന് നടന്‍ ബാല പറ​ഞ്ഞു. അജി–മോന്‍സന്‍ തര്‍ക്കത്തില്‍ ഇടപെട്ടത് ഡ്രൈവര്‍ അജിയുടെ ആവശ്യപ്രകാരമാണെന്നും ബാല.

ഇടുക്കി വണ്ടന്‍മേട് പാലത്തറ വീട്ടില്‍ പി.എം. സുരേഷ് (46) ഇനി 5 പേരിലൂടെ ജീവിക്കും. എറണാകുളം രാജഗിരി ആശുപത്രിയില്‍ വച്ച് മസ്തിഷ്‌ക മരണം സംഭവിച്ച സുരേഷിന്റെ അവയവങ്ങള്‍ ബന്ധുക്കള്‍ ദാനം ചെയ്തു. കരള്‍, രണ്ട് വൃക്കകള്‍, രണ്ട് കണ്ണുകള്‍ എന്നിവയാണ് ദാനം ചെയ്തത്. കേരള സര്‍ക്കാരിന്റെ മരണാന്തര അവയവദാന പദ്ധതിയായ മൃതസഞ്ജീവനി (കെ.എന്‍.ഒ.എസ്.) വഴിയാണ് അവയവദാന പ്രക്രിയ നടത്തിയത്. തീവ്രമായ വേദനയ്ക്കിടയിലും അവയവദാനത്തിനായി മുന്നോട്ട് വന്ന കുടുംബത്തെ ആദരവറിയിച്ചു.

ലോഡിംഗ് തൊഴിലാളിയായ സുരേഷ് സെപ്റ്റംബര്‍ 24ന് രാത്രിയോടെ വണ്ടന്‍മേട്ടിലെ ജോലി സ്ഥലത്തെ സ്റ്റെപ്പില്‍ നിന്നും തെന്നി താഴേക്ക് വീണാണ് അപകടമുണ്ടായത്. ഉടന്‍ തന്നെ അടുത്തുള്ള സ്വകാര്യ ആശുപത്രിയിലേക്ക് കൊണ്ടുപോയി. തലയ്ക്ക് ഗുരുതരമായി പരിക്കേറ്റതിനാല്‍ 25ന് എറണാകുളം രാജഗിരി ആശുപത്രിയിലെത്തിച്ചു. ചികിത്സകള്‍ പുരോഗമിക്കമേ കഴിഞ്ഞ ദിവസം മസ്തിഷ്‌ക മരണമടയുകയായിരുന്നു.

അവയവദാനത്തിന് ഭാര്യ ബിന്ദു സുരേഷ്, മക്കള്‍ അജീഷ് (22), വിനീഷ് (19), വീണ (17) എന്നിവര്‍ സ്വമേധയാ രംഗത്ത് വരികയായിരുന്നു. അച്ഛന്‍ തന്നെ അവയവദാനത്തിന്റെ മഹത്വത്തെ കുറിച്ച് പറഞ്ഞിരുന്നതായി മകനും ഹോട്ടല്‍ മാനേജ്‌മെന്റ് വിദ്യാര്‍ത്ഥിയുമായ വിനീഷ് പറഞ്ഞു.

കരള്‍ തിരുവനന്തപുരം കിംസ് ആശുപത്രിയില്‍ അതീവ ഗുരുതരാവസ്ഥയിലുള്ള സൂപ്പര്‍ അര്‍ജന്റ് രോഗിയ്ക്കാണ് നല്‍കുന്നത്. ഒരു വൃക്ക കോട്ടയം മെഡിക്കല്‍ കോളേജ്, ഒരു വൃക്ക ലേക്ഷോര്‍ കൊച്ചി, കണ്ണുകള്‍ എല്‍.എഫ്. അങ്കമാലി എന്നിവിടങ്ങളില്‍ ചികിത്സയിലുള്ള അവയവങ്ങള്‍ യോജിച്ച രോഗികള്‍ക്കാണ് നല്‍കുന്നത്.

അവയവദാന പ്രക്രിയയ്ക്കും സുഗമമായ യാത്രയ്ക്കും വേണ്ട ക്രമീകരണങ്ങളെല്ലാം ഒരുക്കിയിട്ടുണ്ട്. ഇക്കാര്യം മുഖ്യമന്ത്രിയുടെ ശ്രദ്ധയില്‍പ്പെടുത്തിയിട്ടുണ്ട്. മുഖ്യമന്ത്രിയുടെ നിര്‍ദേശാനുസരണം പോലീസ് ഉദ്യോഗസ്ഥര്‍ ഗ്രീന്‍ ചാനല്‍ ക്രമീകരണമൊരുക്കിയിട്ടുണ്ട്. കെ.എന്‍.ഒ.എസ്. നോഡല്‍ ഓഫീസര്‍ ഡോ. നോബിള്‍ ഗ്രേഷ്യസിന്റെ നേതൃത്വത്തിലുള്ള സംഘമാണ് അവയവദാന പ്രക്രിയയ്ക്ക് മേല്‍നോട്ടം വഹിക്കുന്നത്.

മത്സ്യത്തൊഴിലാളി ജാഗ്രത നിർദ്ദേശം

28-09-2021 ന് കേരള- ലക്ഷദ്വീപ് തീരങ്ങളിൽ മത്സ്യബന്ധനത്തിന് പോകാൻ പാടുള്ളല്ല എന്ന് കേന്ദ്ര കാലാവസ്ഥ വകുപ്പ് അറിയിച്ചു.

28-09-2021 : കേരള- ലക്ഷദ്വീപ് തീരങ്ങളിൽ മണിക്കൂറിൽ 40 മുതൽ 50 കി.മീ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

പ്രത്യേക ജാഗ്രത നിർദേശം

28-09-2021 : തെക്ക് പടിഞ്ഞാറൻ അറബിക്കടലിൽ മണിക്കൂറിൽ 40 മുതൽ 50 കി.മീ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

മേൽ പറഞ്ഞ ദിവസങ്ങളിൽ പ്രസ്തുത പ്രദേശങ്ങളിൽ മത്സ്യബന്ധനത്തിന് പോകാൻ പാടുള്ളല്ല.

15 വർഷത്തെ തിരച്ചിലിനൊടുവിൽ ലഭിച്ചു 40 ലക്ഷം വിലമതിക്കുന്ന വജ്രം!

മധ്യപ്രദേശിലെ പന്ന ജില്ലയിലുള്ള  വജ്രഖനിയിൽനിന്നും 40 ലക്ഷം രൂപ വിലമതിക്കുന്ന വജ്രം കണ്ടെത്തി. 8.22 കാരറ്റുള്ള വജ്രമാണ് കണ്ടെത്തിയത്. 15 വർഷം നീണ്ട തിരച്ചിലിനൊടുവിലാണ് നാലു തൊഴിലാളികൾക്ക് വജ്രം ലഭിച്ചത്. വജ്ര ഖനനത്തിന് ഇന്ത്യയിൽ തന്നെ ഏറ്റവും പേരുകേട്ട സ്ഥലമാണ് ഈ പ്രദേശം. പതിറ്റാണ്ടുകളായി ഇവിടെ വജ്രഖനികൾ പ്രവർത്തിക്കുന്നുണ്ട്. വലിയ തോതിലുള്ള ഖനന പദ്ധതികൾക്ക് പുറമേ സ്വന്തം നിലയിലും കൂട്ടംചേർന്നുമെല്ലാം ഭാഗ്യം തേടി ഇവിടേക്കെത്തുന്നവർ ഏറെയാണ്.
സർക്കാരിൽ നിന്നും ഭൂമി  പാട്ടത്തിനെടുത്താണ് പലരും ഭാഗ്യം പരീക്ഷിക്കുന്നത്. സ്വന്തംനിലയിൽ വജ്രം തേടുന്നവർ പിക്കാസ് പോലെയുള്ള ചെറിയ ആയുധങ്ങൾ ഉപയോഗിച്ചാണ് മണ്ണ് നീക്കം ചെയ്ത് പരിശോധനകൾ നടത്തുന്നത്.സമാനമായ രീതിയിൽ ഭൂമി പാട്ടത്തിനെടുത്ത രത്തൻലാൽ പ്രജാപതിയെയും കൂട്ടുകാരെയുമാണ് ഇത്തവണ ഭാഗ്യം കടാക്ഷിച്ചത്. ഇവർ നാലുപേരും ചേർന്ന് 15 വർഷമായി വജ്രം ഖനനം നടത്തി വരികയായിരുന്നു. ആറു മാസങ്ങൾക്കു മുൻപ് ഹിരാപുർ തപാരിയൺ എന്ന സ്ഥലത്ത് ഇവർ പാട്ടത്തിനെടുത്ത ഭൂമിയിൽ നിന്നുമാണ് ഇപ്പോൾ വജ്രം ലഭിച്ചിരിക്കുന്നത്.
കണ്ടെത്തിയ വജ്രം പന്നയിലെ സർക്കാർ നിയന്ത്രണത്തിലുള്ള ഡയമണ്ട് ഓഫീസിന് കൈമാറ്റം ചെയ്യും. സെപ്റ്റംബർ 21ന് അത് ലേലത്തിൽ വയ്ക്കുമ്പോൾ കിട്ടുന്ന തുകയിൽ നിന്നും 11.5 % നികുതി കഴിച്ച് ബാക്കി തുക ഖനനം നടത്തിയവർക്ക് ലഭിക്കും.കഴിഞ്ഞമാസം പ്രകാശ് മജുംദാർ എന്ന കർഷകന് പന്നയിൽ നിന്നും 6. 47 കാരറ്റ് വജ്രം ലഭിച്ചിരുന്നു. 2016 ലെ കണക്കുകൾ പ്രകാരം 952 ഖനികളാണ് പന്നയിലുള്ളത്. ഇവയിൽനിന്നെല്ലാമായി ഇതുവരെ ആകെ 835 കാരറ്റ് വജ്രം കണ്ടെത്തിയിരുന്നു. ഇവയ്ക്കു പുറമേ നിയമാനുസൃതമല്ലാത്ത ധാരാളം ഖനികളും പന്നയിൽ പ്രവർത്തിക്കുന്നുണ്ടെന്നുള്ളതും മറ്റൊരു യാഥാർഥ്യം.

കോവിഡ് നഷ്ടപരിഹാര പട്ടികയിൽ പ്രവാസികളെയും ഉൾപ്പെടുത്തണമെന്ന ആവശ്യവുമായി പ്രവാസി സംഘടനകൾ.

അബുദാബി : കോവിഡ് ബാധിച്ച് ഗൾഫിൽ മരിച്ച ഇന്ത്യക്കാർക്കും നഷ്ടപരിഹാരം നൽകണമെന്ന് പ്രവാസി സംഘടനകൾ. ഇന്ത്യയ്ക്കു കോടികളുടെ വിദേശ നാണ്യം നേടിത്തരുന്ന, നാടിന്റെ ആവശ്യങ്ങൾക്ക് കൈമെയ് മറന്നു സഹായിക്കുന്ന പ്രവാസികളെ നഷ്ടപരിഹാര പട്ടികയിൽ ഉൾപ്പെടുത്താത്തത് ഖേദകരമാണെന്നും ഇക്കാര്യത്തിൽ അടിയന്തര നടപടിയുണ്ടാകണമെന്നും ആവശ്യപ്പെട്ടു. 
കേന്ദ്ര, സംസ്ഥാന സർക്കാരുകൾക്ക് ഒട്ടേറെ നിവേദനം നൽകിയിട്ടും മുഖംതിരിക്കുന്ന സമീപനം ശരിയല്ലെന്നും പറ‍ഞ്ഞു.ഗൾഫ് രാജ്യങ്ങളിൽ മാത്രം 3500 – ൽ അധികം ഇന്ത്യക്കാരാണ് മരിച്ചത്. പകുതിയോളം മലയാളികളാണ്. അനൗദ്യോഗിക കണക്കുപ്രകാരം വിദേശത്തു മരിച്ച ഇന്ത്യക്കാരുടെ എണ്ണം 5000 ൽ അധികമാണ്.മരിച്ച പ്രവാസികളിൽ പലരും നിർധനരും കുടുംബത്തിന്റെ ഏക വരുമാന സ്രോതസ്സുമായിരുന്നു. ഇക്കാര്യം ചൂണ്ടിക്കാട്ടി ജൂലൈയിൽ കേന്ദ്ര, സംസ്ഥാന സർക്കാരുകൾക്കും പ്രവാസികാര്യ സഹമന്ത്രി വി മുരളീധരനും ഇന്ത്യൻ കോൺസൽ ജനറൽ ഡോ. അമൻ പുരിക്കും നിവേദനം നൽകിയെങ്കിലും ഒരു നടപടിയും ഉണ്ടായിട്ടില്ലെന്ന് യുഎഇ കെഎംസിസി നാഷനൽ കമ്മിറ്റി പ്രസിഡന്റ് ഡോ. പുത്തൂർ റഹ്മാൻ പറഞ്ഞു.
സുപ്രീംകോടതിയുടെ ഇടപെടലിലൂടെ കേന്ദ്രം ഇപ്പോൾ പ്രഖ്യാപിച്ച നഷ്ടപരിഹാര തുക നാമമാത്രമാണെന്നും തുക വർധിപ്പിക്കണമെന്നും ആവശ്യപ്പെട്ടു.
നഷ്ടപരിഹാര പട്ടികയിൽ പ്രവാസികളെ ഉൾപ്പെടുത്താത് മനുഷ്യത്വരഹിതമാണെന്ന് യുഎഇ യുവകലാസാഹിതി അസിസ്റ്റന്റ് സെക്രട്ടറി റോയ് ഐ.വർഗീസ് പറഞ്ഞു. കുടുംബത്തിന്റെ വരുമാന സ്രോതസ് നഷ്ടപ്പെട്ടതോടെ അനാഥരായ കുടുംബങ്ങൾക്ക് കൈത്താങ്ങാകാൻ കേന്ദ്ര, സംസ്ഥാന സർക്കാരുകൾക്ക് ബാധ്യതയുണ്ട്. കേന്ദ്രം പ്രഖ്യാപിച്ച നഷ്ടപരിഹാരം എത്രയും വേഗം നൽകാൻ സംസ്ഥാന സർക്കാർ നടപടിയെടുക്കണമെന്നും ആവശ്യപ്പെട്ടു.
പ്രവാസികളെയും നഷ്ടപരിഹാര പട്ടികയിൽ ഉൾപ്പെടുത്തുന്നതുവരെ നിയമപോരാട്ടം തുടരുമെന്ന് ഈ വിഷയത്തിൽ സുപ്രീം കോടതിയെ സമീപിച്ച യുഎഇയിലെ സാമൂഹിക പ്രവർത്തകൻ അഡ്വ. ടി.കെ ഹാഷിക് പറഞ്ഞു.ദുരിതാശ്വാസ മാനദണ്ഡം അനുസരിച്ച് 4 ലക്ഷം രൂപയാണ് നഷ്ടപരിഹാരമായി നൽകുന്നത്.
കോവിഡ് മഹാമാരിയായി ലോകം പ്രഖ്യാപിച്ച സ്ഥിതിക്ക് കുറഞ്ഞത് 4 ലക്ഷം രൂപയെങ്കിലും നൽകണമെന്നും ആവശ്യപ്പെട്ടു.നാട്ടിലാണെങ്കിലും ഗൾഫിലാണെങ്കിലും മരിച്ചത് മനുഷ്യരാണ്. നാട്ടിൽ തൊഴിലില്ലാത്തതുമൂലം ഗൾഫിൽ എത്തിപ്പെട്ടവരാണവർ. ഇക്കാരണത്താൽ നഷ്ടപരിഹാരത്തിന് വിവേചനം കാണിക്കുന്നത് കടുത്ത അനീതിയാണെന്ന് ഷാർജ ഇന്ത്യൻ അസോസിയേഷൻ പ്രസിഡന്റ് ഇ.പി ജോൺസൺ പറഞ്ഞു. കുടുംബനാഥൻ മരിച്ചതോടെ അനാഥമായ കുടുംബങ്ങളെ ചേർത്തുപിടിക്കേണ്ടത് സർക്കാരിന്റെ ബാധ്യതയാണെന്നും മാന്യമായ തുക നഷ്ടപരിഹാരം നൽകണമെന്നും ആവശ്യപ്പെട്ടു.നാടിന്റെ അഭിവൃദ്ധിയിൽ പ്രവാസികളുടെ പങ്ക് വിസ്മരിക്കാവുന്നതല്ല.
വികസനത്തിനു മാത്രമല്ല ഏതു ദുരിതഘട്ടങ്ങളിലും കൈമെയ് മറന്നു സഹായിക്കുന്ന പ്രവാസികൾ മരിച്ചാൽ സഹായിക്കേണ്ടത് സർക്കാരിന്റെ കടമയാണെന്ന് വിവിധ സംഘടനകൾ ആവശ്യപ്പെട്ടു.കേന്ദ്രസർക്കാരിന്റെ കണക്ക് പ്രകാരം ജൂലൈ വരെ വിദേശ രാജ്യങ്ങളിൽ മരിച്ച ഇന്ത്യക്കാരുടെ എണ്ണം 3,570 ആണ്.

ഗുലാബ് ചുഴലിക്കാറ്റ് ;കേരളത്തിൽ ശക്തമായ മഴ തു‌ടരുന്നു.ജാഗ്രത നിർദ്ദേശം.

തിരുവനന്തപുരം: ഗുലാബ് ചുഴലിക്കാറ്റിന്റെ പ്രഭാവാത്താൽ കേരളത്തിലും ശക്തമായ മഴ തുടരുകയാണ്.അടുത്ത മൂന്ന് മണിക്കൂറിൽ  കേരളത്തിൽ എല്ലാ ജില്ലകളിലും ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.തെക്കൻകേരളത്തിൽ പരക്കെ മഴയുണ്ടാകുമെന്നാണ് മുന്നറിയിപ്പ്.
നിലവിലെ സ്ഥിതിയിൽ ഇന്ന് കൂടി കേരളത്തിൽ മഴ തുടരുമെന്നാണ് അറിയിപ്പ്.
കഴിഞ്ഞ ദിവസങ്ങളിൽ മണിക്കൂറിൽ 50 കീ മി വരെ വേഗതയിൽ കാറ്റ് വീശാൻ സാധ്യതയുള്ളതിനാൽ കേരളാതീരത്ത് മത്സ്യതൊഴിലാളികൾ കടലിൽ പോകുന്നത് വിലക്കിയിരുന്നു. 
ഞായറാഴ്ച രാത്രിയിലുണ്ടായ ശക്തമായ മഴയിലും കാറ്റിലും തെക്കൻ കേരളത്തിലെ പല തീരങ്ങളിലും മൽസ്യ ബന്ധന ഉപകരണങ്ങൾ തകർന്നിരുന്നു. നങ്കൂരമിട്ടിരുന്ന വള്ളങ്ങളും തകർന്നിരുന്നു. ലക്ഷങ്ങളുടെ നഷ്ടമാണ് കണക്കാക്കുന്നത്.
ഗുലാബിന് പിന്നാലെ തന്നെ ബംഗാൾ ഉൾക്കടലിൽ മറ്റൊരു ന്യൂനമർദ്ദം കൂടി രൂപപ്പെടാൻ സാധ്യതയുള്ളതായി കാലാവസ്ഥാ വിദഗ്ദ്ധർ വ്യക്തമാക്കി. അങ്ങനെയെങ്കിൽ സെപ്തംബർ മാസത്തിൽ ബംഗാൾ ഉൾക്കടലിൽ രൂപപ്പെടുന്ന നാലാമത്തെ ന്യൂനമർദ്ദമായിരിക്കും. അത് ഒരു ചുഴലിക്കാറ്റും മൂന്ന് ന്യൂനമർദ്ദവുമാണ് കഴിഞ്ഞ 26 ദിവസത്തിനിടെ ബംഗാൾ കടലിൽ രൂപപ്പെട്ടത്.