കോവിഡ് പ്രതിരോധം ;മൂന്നാം ഡോസ് വാക്സീൻ നൽകാനൊരുങ്ങി സൗദി.

റിയാദ് : അറുപത് വയസും അതിൽ കൂടുതലും പ്രായമുള്ളവർക്ക് കോവിഡ് വൈറസിനെതിരെ പ്രതിരോധശേഷി വർധിപ്പിക്കുന്നതിന് മൂന്നാം ഡോസ് വാക്സീൻ നൽകുമെന്ന് സൗദി ആരോഗ്യ മന്ത്രാലയം ഞായറാഴ്ച അറിയിച്ചു. വിട്ടുമാറാത്ത രോഗമുള്ളവർ, വൃക്ക തകരാറിലായവർ, അവയവമാറ്റ ശസ്ത്രക്രിയക്ക് വിധേയമായവർ തുടങ്ങി ഉയർന്ന അപകടസാധ്യതയുള്ളവർക്ക് ബൂസ്റ്റർ ഡോസുകൾ നൽകാൻ ആരംഭിച്ചതായി മന്ത്രാലയം നേരത്തേ അറിയിച്ചിരുന്നു.
എന്നാൽ ഇപ്പോൾ പ്രായപരിധിയനുസരിച്ച് 60 നു മുകളിലുള്ള എല്ലാവർക്കും ബൂസ്റ്റർ ഡോസ് നൽകാൻ തയാറെടുക്കുകയാണെന്ന് മന്ത്രാലയ വക്താവ് ഡോ. മുഹമ്മദ് അൽ-അബ്ദുൽ ആലി പത്രസമ്മേളനത്തിൽ പറഞ്ഞു .രാജ്യത്ത് ഇതുവരെ 41 ദശലക്ഷത്തിലധികം കോവിഡ് -19 വാക്സീൻ ഡോസുകൾ നൽകിയിട്ടുണ്ട്. ഇവരിൽ ഏകദേശം 18.3 ദശലക്ഷം പേർ രണ്ട് ഡോസും പൂർത്തിയാക്കിയവരാണ്. രണ്ടാം ഡോസ് വാക്സിനേഷൻ സ്വീകരിച്ച് എട്ട് മാസം പൂർത്തിയായവർക്കാണ് മൂന്നാമത്തെ ബൂസ്റ്റർ ഡോസ് നൽകുകയെന്നും മന്ത്രാലയ വക്താവ് വ്യക്തമാക്കി. രണ്ട് ഡോസുകൾ ഇനിയും പൂർത്തിയാക്കാത്തവർ എത്രയും വേഗം അവ സ്വീകരിക്കണമെന്ന് അദ്ദേഹം അഭ്യർഥിച്ചു.
പകർച്ചവ്യാധിയെ നേരിടുന്നതിൽ ഇനിയുള്ള ഘട്ടത്തിലും നമ്മെ സഹായിക്കുന്ന ഏറ്റവും പ്രധാനപ്പെട്ട ഘടകം വാക്സിനേഷൻ ആണെന്ന് അദ്ദേഹം ഓർമിപ്പിച്ചു. സൗദിയിൽ തുടർച്ചയായ അഞ്ച് ദിവസങ്ങളിലും ആകെ അൻപതിൽ താഴെ പേർക്കാണ് പുതുതായി കോവിഡ് സ്ഥിരീകരിച്ചത്. ഇന്നലെ ഇത് 44 മാത്രമായിരുന്നു.
രോഗം പടരുന്നത് തടയാൻ രാജ്യം ഏർപ്പെടുത്തിയിട്ടുള്ള മുൻകരുതലുകൾ നടപടികൾ പാലിക്കുന്നുണ്ടെന്ന് ഉറപ്പുവരുത്താൻ നിരീക്ഷണ ക്യാംപയിനുകൾ ശക്തമായി തുടരും.
അഭ്യന്തര മന്ത്രാലയത്തിന്റെ പുതിയ കണക്കനുസരിച്ച് കഴിഞ്ഞ ഒരാഴ്ചക്കുള്ളിൽ 19,870 ലംഘനങ്ങൾ രേഖപ്പെടുത്തിയതായി അധികൃതർ അറിയിച്ചു. പ്രതിരോധ പ്രോട്ടോക്കോളുകളും, ഇക്കാര്യത്തിൽ അധികൃതർ പുറപ്പെടുവിച്ച നിർദേശങ്ങളും പാലിക്കാൻ മന്ത്രാലയം പൗരന്മാരോടും താമസക്കാരോടും ആവശ്യപ്പെട്ടു.
ആരോഗ്യ, സുരക്ഷാ നടപടികൾ പാലിക്കുന്നത് നിരീക്ഷിക്കുന്നതിനുള്ള ശ്രമങ്ങൾ സൗദി മുനിസിപ്പാലിറ്റികളും ത്വരിതപ്പെടുത്തി.
പൊതു സുരക്ഷ ഉറപ്പുവരുത്തുന്നതിനും രോഗവ്യാപനം തടയുന്നതിനും എല്ലാ വാണിജ്യ സൗകര്യങ്ങളും നിയന്ത്രണങ്ങൾ പാലിക്കണമെന്ന് മുനിസിപ്പാലിറ്റികൾ ആവശ്യപ്പെട്ടു. 940 എന്ന കോൾ സെന്റർ നമ്പർ വഴി ലംഘനങ്ങൾ അറിയിക്കാൻ അധികൃതർ പൊതുജനങ്ങളോട് ആവശ്യപ്പെട്ടു.
പൊതു, സ്വകാര്യ മേഖലകളിൽ കഴിഞ്ഞ ഒരു മാസത്തിനിടെ 87,500 നിരീക്ഷണ ട്രിപ്പുകൾ പൂർത്തിയാക്കിയതായി മാനവ വിഭവശേഷി, സാമൂഹിക വികസന മന്ത്രാലയ വക്താവ് പറഞ്ഞു. നിലവിൽ, 88 ശതമാനം പൊതുമേഖലയിലെയും 85 ശതമാനം സ്വകാര്യമേഖലയിലെയും ജീവനക്കാർ രണ്ട് വാക്സീൻ ഡോസുകളും സ്വീകരിച്ചവരാണെന്നും അധികൃതർ വ്യക്തമാക്കി.

ഗൂഗിളിന് ഇന്ന് 23ാം പിറന്നാൾ; ആഘോഷമാക്കി സോഷ്യൽ മീഡിയ.

23ാം പിറന്നാൾ നിറവിൽ ഗൂഗിൾ. ഗൂഗിൾ എന്നത് നമ്മുടെ ഭാഗമായി മാറിക്കഴിഞ്ഞിട്ട് വർഷങ്ങളായി. എന്ത് സംശയം വന്നാലും ഗൂഗിൾ ഗുരുവിനോട് ചോദിക്കെന്ന പല്ലവിയും നമുക്കിടയിൽ സാധാരണയായി. ഇന്ന് ഗൂഗിളിൽ കയറിയവരെല്ലാം ശ്രദ്ധിച്ച ഒരു കാര്യം ഉണ്ട്. സ്വന്തമായി തന്റെ 23ാം പിറന്നാൾ ആഘോഷിക്കുകയാണ് താരം. ഇതിനായി ഗൂഗിൾ അവതരിപ്പിച്ച ഡൂഡിലും വ്യത്യസ്തമാണ്. മനോരഹരമായ കേക്കിന് സമീപത്തായി ഗൂഗിൾ എന്നെഴുതി ഇരുപത്തി മൂന്നാം വയസ്സും സൂചിപ്പിച്ചാണ് ഡൂഡിൽ തയ്യാറാക്കിയിരിക്കുന്നത്. ഗൂഗിളിന് പിറന്നാൾ ആശംസകളുമായി സോഷ്യൽ മീഡിയയും സജീവമാണ്.
വിവരസാങ്കേതിക വിദ്യ രംഗത്ത് ഗൂഗിൾ കൊണ്ടുവന്ന മാറ്റങ്ങളും വഹിച്ച് പങ്കും വളരെ വലുതാണ്. ഒരു സാധാരണക്കാരന് വളരെ വിദൂരമായി നിന്ന സാങ്കേതിക വിദ്യയെല്ലാം ഗൂഗിൾ അവർക്ക് സാധ്യമാക്കി കൊടുത്തു എന്നുവേണം പറയാൻ.ലോകത്തിലെ തന്നെ മികച്ച സെർച്ച് എൻജിനായി ഗൂഗിൾ വളർന്നതിന് പിന്നിലെ കരങ്ങൾ ലാറി പേജ്, സെര്‍ജി ബ്രിന്ന് എന്ന യുവാക്കളാണ്.
1998 പിഎച്ച്ഡി വിദ്യാർത്ഥികളായ ഇരുവരും ചേർന്ന് ഗൂഗിളിന് രൂപം നൽകിയത്. ഇവരുടെ ഗവേഷണ വിഷയമെന്ന നിലയ്ക്കാണ് 1996 ജനുവരിയിലായിരുന്നു ഇവർ ഈ ഗവേഷണത്തിനു തുടക്കമിട്ടത്. അങ്ങനെ നീണ്ട ശ്രമത്തിനൊടുവിൽ 1997 സെപ്റ്റംബർ 15ന് ഗൂഗിൾ എന്ന ഡൊമെയിൻ നാമം രജിസ്റ്റർചെയ്യുകയും ഒരുവർഷത്തിനു ശേഷം കാലിഫോർണിയയിൽ ഒരു സുഹൃത്തിന്റെ ഗാരേജിൽ ഇരുവരും ചേർന്ന് തങ്ങളുടെ കമ്പനിയുടെ പ്രവർത്തനമാരംഭിക്കുകയും ചെയ്തു.വിവിധ സെർച്ച് എഞ്ചിനുകളിലൂടെ ഇരുപത് കോടിയിൽപ്പരം അന്വേഷണങ്ങളാണ് ഓരോ ദിവസവും ഗൂഗിളിൽ എത്തുന്നത്. തുടക്കത്തിൽ വെബ് സെർച്ച് എൻജിൻ മാത്രമായി അവതരിപ്പിച്ച ഗൂഗിളിൽ ഇപ്പോൾ ചിത്രങ്ങൾ, വീഡിയോ, വാർത്തകൾ, ഓൺലൈൻ ബിസിനസ്സുകൾ തുടങ്ങി ലഭ്യമാകാത്തതായി ഒന്നും തന്നെയില്ല എന്നുവേണം പറയാൻ. പരസ്യ വിതരണ രംഗത്തും നിറ സാന്നിധ്യമാണ് ഇന്ന് ഗൂഗിൾ .

തൊണ്ടയാട് നിർമാണത്തിലുള്ള കെട്ടിടത്തിന്റെ സ്ലാബ് തകർന്ന് വീണ് തൊഴിലാളികൾ മരിച്ച സംഭവത്തിൽ അന്വേഷണം പ്രഖ്യാപിച്ചു

കോഴിക്കോട് തൊണ്ടയാട് നിർമാണത്തിലുള്ള കെട്ടിടത്തിന്റെ സ്ലാബ് തകർന്ന് വീണ് തൊഴിലാളികൾ മരിച്ച സംഭവത്തിൽ അന്വേഷണം പ്രഖ്യാപിച്ചു. ലേബർ കമ്മീഷണറോട് അന്വേഷണം നടത്തി റിപ്പോർട്ട് നൽകാൻ തൊഴിൽ മന്ത്രി വി ശിവൻകുട്ടി നിർദേശം നൽകി.

കെട്ടിട നിർമാണവുമായി ബന്ധപ്പെട്ട് സുരക്ഷാ മാനദണ്ഡങ്ങൾ പൂർണമായി പാലിച്ചിരുന്നോ എന്ന് പ്രത്യേകം അന്വേഷിക്കാനും നിർദേശം നൽകിയിട്ടുണ്ട്.തമിഴ്നാട് സ്വദേശികളായ കാർത്തിക് സലിം എന്നിവരാണ് മരിച്ചത്.കഴിഞ്ഞ ദിവസമാണ് തൊണ്ടയാട് ബൈപ്പാസിന് സമീപം നിർമാണത്തിലിരുന്ന കെട്ടിടത്തിലാണ് അപകടമുണ്ടായത്.

കെട്ടിടത്തിന് താഴെ ജോലികളിൽ ഏർപ്പെട്ടിരുന്നവർക്ക് മേൽ മുകളിൽ നിന്നും സ്ലാബ് പൊട്ടിവീഴുകയായിരുന്നു. പരിക്കേറ്റവർ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. ഇതര സംസ്ഥാന തൊഴിലാളികളാണ് ഇവിടെയുള്ള തൊഴിലാളികളിൽ കൂടുതലും. ഇവർ തന്നെയാണ് പരിക്കേറ്റവരെ സമീപത്ത് തന്നെയുള്ള മെഡിക്കൽ കോളേജിൽ എത്തിച്ചത്.

ആനപ്പാന്തം ഊരിൽ ആവേശമായി കരിമ്പ് ദൃശ്യ കലാക്യാമ്പ്

ചാലക്കുടി ഫോറസ്റ്റ് ഡിവിഷൻ വെള്ളിക്കുളങ്ങര ഫോറസ്റ്റ് റേഞ്ച് പരിധിയിലെ ആനപ്പാന്തം ഊരിൽ കാടാർ വിഭാഗത്തിലെ കുട്ടികൾക്കായി സംസ്ഥാന വനവികസന ഏജൻസിയുടെ നേതൃത്വത്തിൽ നടത്തുന്ന കരിമ്പ് ദൃശ്യകലാ ക്യാമ്പ് ശ്രദ്ധേയമാകുന്നു.

നാല് മുതൽ പന്ത്രണ്ട് വരെയുള്ള ക്ലാസിലെ കുട്ടികൾക്കായി കോവിഡ് കാലത്തെ മാനസിക സമ്മർദ്ദം കുറക്കുന്നതിന് വേണ്ടി കാലടി സംസ്കൃത സർവ്വകലാശാല ദൃശ്യകലാ വിഭാഗം പൂർവ്വ വിദ്യാർത്ഥി കൂട്ടായ്മയായ ട്രസ്പാസേഴ്സിന്റെ സഹകരണത്തോടെയാണ് ക്യാമ്പ് നടത്തുന്നത്.

കുട്ടികൾക്ക് കളിമൺ രൂപങ്ങളുടെ നിർമ്മാണം, ചിത്രകല തുടങ്ങിയവയിൽ പരിശീലനം നൽകുന്നു. മറ്റത്തൂർ
ഗ്രാമപഞ്ചായത്ത്‌ പ്രസിഡന്റ്‌ അശ്വതി വിബി ക്യാമ്പ് ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ദിവ്യ സുധീഷ്, ചാലക്കുടി ഡിവിഷണൽ ഫോറസ്റ്റ് ഓഫീസർ സംബുദ്ധ മജുംദാർ, പരിയാരം ഫോറസ്റ്റ് റേഞ്ച് ഓഫീസർ ടി എസ് മാത്യു, ജോയി കാവുങ്ങൽ, ഡിവിഷൻ കോഡിനേറ്റർ ഇ പി പ്രസീത തുടങ്ങിയവർ പങ്കെടുത്തു.