ന്യൂഡല്‍ഹി: ഗായിക കെ.എസ്. ചിത്രയുടെ ‘ഉണ്ണി വാവാവോ…’ എന്ന ഗാനം പാടി ബോളിവുഡ് താരം ആലിയാ ഭട്ട്. ജിദ്ദയിലെ റെഡ് സീ ഇന്റര്‍നാഷനല്‍ ഫിലിം ഫെസ്റ്റിവലിലാണ് ആലിയ പാട്ടു പാടിയത്. മകള്‍ റാഹയുടെ ആയ പാടുന്ന ഈ പാട്ട് ഭര്‍ത്താവും നടനുമായ രണ്‍ബീര്‍ കപൂര്‍ പഠിപ്പിച്ചതാണെന്ന് മുന്‍പ് ആലിയ ടിവി ഷോയില്‍ പറഞ്ഞിരുന്നു.

ഫിലിം ഫെസ്റ്റിവലിന്റെ ഭാഗമായി നടന്ന ചോദ്യോത്തരവേളയില്‍ സദസ്സിലുണ്ടായിരുന്നവരുടെ ആവശ്യപ്രകാരം ആലിയ പാട്ടു പാടുകയായിരുന്നു.ആലിയാ ഭട്ടിന് ഗോള്‍ഡന്‍ ഗ്ലോബ്‌സ് ഹൊറൈസണ്‍ പുരസ്‌കാരവും നല്‍കി. ഒമര്‍ ഷെരീഫ് അവാര്‍ഡിന് അര്‍ഹനായ ടുണീഷ്യന്‍ നടന്‍ ഹെന്ദ് സബ്രിയേയും ചടങ്ങില്‍ ആദരിച്ചു. മിഡില്‍ ഈസ്റ്റ്, ഏഷ്യ, വടക്കേ ആഫ്രിക്ക എന്നിവിടങ്ങളിലെ സര്‍ഗാത്മക മികവിനെ ആദരിക്കുന്നതാണ് ഈ രണ്ട് ബഹുമതികളും.

റാസി, ഗംഗുബായ് കത്തിയവാടി, റോക്കി ഔര്‍ റാണി കി പ്രേം കഹാനി, ഹാര്‍ട്ട് ഓഫ് സ്റ്റോണ്‍ തുടങ്ങിയ സിനിമകളിലൂടെ ശ്രദ്ധേയയാണ് ആലിയാ ഭട്ട്. ലോറന്‍സ് ഓഫ് അറേബ്യ, ഡോക്ടര്‍ ഷിവാഗോ തുടങ്ങിയ ക്ലാസിക്കുകള്‍ക്ക് പേരുകേട്ട ഇതിഹാസ ഈജിപ്ഷ്യന്‍ നടനും മൂന്ന് തവണ ഗോള്‍ഡന്‍ ഗ്ലോബ് ജേതാവുമായ ഒമര്‍ ഷെരീഫിന്റെ പേരിലുള്ള അവാര്‍ഡ് ലഭിച്ചതില്‍ സന്തോഷമുണ്ടെന്ന് ആലിയ പറഞ്ഞു.  

നടിയെ ആക്രമിച്ച കേസിൽ ദിലീപിനെ വെറുതെ വിടാൻ വേണ്ടി പ്രാർത്ഥിച്ചെന്നും വഴിപാടുകൾ നേർന്നിട്ടുണ്ടെന്നും നടൻ ദേവൻ. ഒരു യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

‘സത്യം ജയിച്ചു, നീതി ജയിച്ചു, ന്യായം ജയിച്ചു എന്നല്ലാതെ വേറൊന്നുമില്ല. കുറച്ച് താമസിച്ചെങ്കിലും സത്യം ജയിക്കുമെന്ന് തന്നെയായിരുന്നു എന്റെ വിശ്വാസം. ഞാൻ വാസ്തവത്തിൽ പ്രാർത്ഥിച്ചിരുന്നു. കഴിഞ്ഞ രണ്ടുമൂന്നുദിവസമായി ഹൃദയം തുറന്ന് ഈശ്വരനോട് പ്രാർത്ഥിച്ചു. ദിലീപിന് അനുകൂലമായിട്ടുള്ള വിധി വരണേ ദൈവമേയെന്ന് ഞാൻ പ്രാർത്ഥിച്ചു. പല ക്ഷേത്രങ്ങളിലും വഴിപാടുകൾ നേർന്നിട്ടുണ്ട്. അത് എന്റെ പൂർണമായ വിശ്വാസമാണ്. കാരണം, ദിലീപെന്ന വ്യക്തിയുടെ നന്മകൾ മറക്കാൻ പാടില്ല.

ദിലീപ് ഇങ്ങനെയൊക്കെ ചെയ്‌തെന്ന് തൊണ്ണൂറ് ശതമാനം ആളുകളും വിശ്വസിക്കുന്നില്ല. പക്ഷേ വളരെ ചുരുക്കം പേർ, പ്രത്യേകിച്ച് മീഡിയ ദിലീപിനെതിരെയാണ്. അതിജീവിതയുടെ കൂടെ നിൽക്കണമെന്ന് പറയുന്നത് ഇപ്പോഴൊരു ഫാഷനാണ്. ആരാണ് ഈ അതിജീവിത എന്നുപറഞ്ഞയാൾ? അതിജീവിതയ്ക്ക് എന്താണൊരു നിർവചനം?

ഇപ്പോൾ പുരുഷനെ സംബന്ധിച്ച് വളരെ ഭയപ്പെടേണ്ട കാലഘട്ടമാണിത്. ഒരു പെണ്ണ് വിചാരിച്ചാൽ നിങ്ങളുടെ പേരിൽ ഒരു കേസ് കൊടുത്താൽ മതിയല്ലോ, കഴിഞ്ഞല്ലോ. അപ്പോൾ മീഡിയ മുഴുവൻ നിങ്ങൾക്ക് എതിരായിരിക്കും. ടിവിയിലൊക്കെ വന്നിരുന്ന് കാച്ചുന്നത് കേൾക്കാറുണ്ട്. നീതി കിട്ടിയില്ലല്ലോയെന്ന്. ഇവിടെയൊരു നീതിന്യായവ്യവസ്ഥയുണ്ട്. കേസ് ഇത്രയും നീണ്ടുപോകാൻ കാരണമെന്താണ്? ഒമ്പത് വർഷമായില്ലേ. കോടതി വളരെ ശ്രദ്ധാപൂർവം, എന്തെങ്കിലും തെളിവുണ്ടോയെന്ന് കണ്ടെത്താൻ വെയ്റ്റ് ചെയ്തു. ഈ കോടതിയിൽ വിശ്വാസമില്ലെന്നാണ് പ്രോസിക്യൂഷൻ പറഞ്ഞത്. എന്ത് വിഡ്ഡിത്തമാണത്. വാദിക്കും പ്രതിക്കും ആവശ്യമുള്ള രീതിയിൽ കോടതിയെ മാറ്റാൻ പറ്റുമോ. സുപ്രീം കോടതിയിൽ പോയപ്പോൾ വലിച്ച് മുഖത്തേക്ക് എറിഞ്ഞില്ലേ. ഒൻപത് വർഷമായി ആ ജഡ്ജ് ഇതിനുവേണ്ടി കാത്തിരുന്നു. അവർ മാക്സിമം പ്രോസിക്യൂഷനും പൊലീസിനും സമയം കൊടുത്തു. എത്രപ്രാവശ്യമാണ് നീട്ടിയത്. തെളിവില്ലെന്ന് ബോദ്ധ്യപ്പെട്ടതോടെയാണ് എട്ടാം തീയതി വിധി പ്രഖ്യാപിച്ചത്. ‘- ദേവൻ പറഞ്ഞു.

ഒളിവ് വാസത്തിന് ശേഷം പാലക്കാട് വോട്ടുചെയ്യാനെത്തി എംഎല്‍എ രാഹുല്‍ മാങ്കൂട്ടത്തില്‍. 15 ദിവസത്തെ ഒളിവുജീവിതം അവസാനിപ്പിച്ചാണ് രാഹുല്‍ വോട്ടുചെയ്യാനെത്തിയത്. പാലക്കാട് കുന്നത്തൂര്‍മേട് സ്‌കൂളിലെ രണ്ടാംനമ്പര്‍ ബൂത്തില്‍ രാഹുല്‍ വ്യാഴാഴ്ച വൈകുന്നേരത്തോടെ എത്തി വോട്ട് ചെയ്തു. രാഹുലിനെതിരേ രണ്ട് കേസുകളില്‍ ഒന്നില്‍ മുന്‍കൂര്‍ ജാമ്യം ലഭിക്കുകയും മറ്റൊന്നില്‍ അറസ്റ്റ് തടയുകയും ചെയ്ത പശ്ചാത്തലത്തിലാണ് രാഹുല്‍ വോട്ടുചെയ്യാനെത്തിയത്.

നടിയെ ആക്രമിച്ച കേസിലെ കോടതി വിധിയിൽ പ്രതികരിച്ച് നടൻ ടൊവിനോ തോമസ്. അതിജീവിതക്ക് നീതി ലഭിക്കുകയെന്നതാണ് ഏറ്റവും പ്രധാനപ്പെട്ട കാര്യമെന്നും കുറ്റവാളികള്‍ ശിക്ഷിക്കപ്പെടണമെന്നും ടൊവിനോ തോമസ് പറഞ്ഞു. ഇതുമായി ബന്ധപ്പെട്ട് കേസ് ഫയലോ കൃത്യം നടന്നകാര്യമോ ഒന്നും അറിയില്ല. ഇപ്പോഴത്തെ കോടതി വിധിയെ വിശ്വസിക്കണമെന്നാണ് തോന്നുന്നത്. അതിനും അപ്പുറത്തേക്ക് എന്തെങ്കിലും ഉണ്ടെങ്കിൽ അതിനായി താനും കാത്തിരിക്കുകയാണെന്നും ടൊവിനോ തോമസ് പറഞ്ഞു. അപ്പീൽ പോകുന്നത് നല്ല കാര്യമാണ്. ആര് തെറ്റ് ചെയ്താലും ശിക്ഷിക്കപ്പെടണമെന്നും ടൊവിനോ തോമസ് പറഞ്ഞു. ഇരിങ്ങാലക്കുട നഗരസഭ 22 ാം വാര്‍ഡിലാണ് ടൊവിനോ തോമസിന് വോട്ട്. കുടുംബസമേതം ഇവിടെ എത്തി വോട്ട് രേഖപ്പെടുത്തിയശേഷണാണ് മാധ്യമങ്ങളോട് ടൊവിനോ പ്രതികരിച്ചത്.

നടി ആക്രമിക്കപ്പെട്ട കേസില്‍ ദിലീപ് കുറ്റക്കാരനല്ലെന്ന കോടതി വിധിക്ക് പിന്നാലെ നടനോട് മാപ്പ് ചോദിച്ച് സംവിധായകന്‍ ആലപ്പി അഷ്‌റഫ്. ചാനല്‍ ചര്‍ച്ചകളില്‍ ദിലീപിനെ വിമര്‍ശിച്ചതിനും വേദനിപ്പിക്കുന്ന തരത്തിലുള്ള പരാമര്‍ശങ്ങള്‍ നടത്തിയതിനുമാണ് ആലപ്പി അഷ്‌റഫ് മാപ്പ് ചോദിച്ചത്.

‘കണ്ടതും കേട്ടതും’ എന്ന തന്റെ യുട്യൂബ് ചാനലില്‍ പങ്കുവെച്ച വീഡിയോയിലാണ് സംവിധായകന്‍ ഇക്കാര്യം പറയുന്നത്. അതിജീവിതയുടെ ദുരവസ്ഥയെ കുറിച്ച് സംസാരിച്ച ആലപ്പി അഷ്‌റഫ് ദിലീപിനെ വെറുതെവിട്ട കോടതിവിധിയെ സ്വാഗതം ചെയ്യുകയും ചെയ്തു. കേസില്‍ ഗൂഢാലോചനക്കുറ്റം തെളിയിക്കാന്‍ കഴിയാത്തത് പ്രോസിക്യൂഷന്റേയും ഭരണകൂടത്തിന്റേയും പരാജയമാണെന്നും അദ്ദേഹം പറഞ്ഞു.

ഈ സംഭവം നടന്നത് അറിഞ്ഞപ്പോള്‍ തന്നെ തനിക്ക് ദിലീപിന്റെ മേല്‍ സംശയം തോന്നിയിരുന്നുവെന്നും ദിലീപുമായി അടുത്ത ബന്ധമുള്ള മിമിക്രി താരം ദുബായില്‍ ഒരു ഷോയില്‍വെച്ച് നടന്ന ചില സംഭവങ്ങളെ കുറിച്ച് തനിക്ക് സൂചന തന്നിരുന്നുവെന്നും ആലപ്പി അഷ്‌റഫ് പറയുന്നു. ഈ സംഭവത്തിന് ക്രിമിനല്‍ ഗൂഢാലോചനയുണ്ടെന്ന് മഞ്ജു വാര്യര്‍ ആദ്യമായി വെളിപ്പെടുത്തിയപ്പോള്‍ തന്റെ സംശയം കൂടുതല്‍ ബലപ്പെട്ടുവെന്നും പിന്നീട് ബൈജു പൗലോസിനെപ്പോലെ ക്ലീന്‍ ഇമേജുള്ള പൊലീസ് ഉദ്യോഗസ്ഥരും കീഴ്‌ക്കോടതിയും ഹൈക്കോടതിയും വരെ പ്രഥമദൃഷ്ട്യാ തെളിവുണ്ട് എന്ന് ആവര്‍ത്തിച്ച് കൊണ്ടാണ് അദ്ദേഹത്തിന് ജാമ്യം നിഷേധിച്ചതെന്നും ആലപ്പി അഷ്ഫറ് പറയുന്നു.

ഒരു സാധാരണ പൗരന്‍ എന്ന നിലയിലും ദിലീപിന്റെ മുന്‍ ചെയ്തികള്‍ അറിയാവുന്ന വ്യക്തി എന്ന നിലയിലും നമ്മുടെ നീതിന്യായ വ്യവസ്ഥയും സിസ്റ്റവും പറയുന്നത് വിശ്വസിക്കണമോ അതോ ചാനലില്‍ വന്നിരുന്ന് പ്രസംഗിക്കുന്ന പിആര്‍ വര്‍ക്കേഴ്‌സ് പറയുന്നത് വിശ്വസിക്കണമോ എന്ന ചിന്തയുണ്ടായിരുന്നു. സത്യത്തിനും നീതിക്കും വേണ്ടി നിലകൊള്ളുന്നവര്‍ ബന്ധങ്ങള്‍ മറന്ന് സംസാരിക്കേണ്ടി വരുമെന്നും ആലപ്പി അഷ്റഫ് വ്യക്തമാക്കുന്നു.

‘എനിക്ക് ദിലീപിനോട് വ്യക്തിപരമായി യാതൊരു വിരോധവുമില്ല. നല്ലൊരു കലാകാരന്‍ എന്ന നിലയില്‍ ഇഷ്ടവുമായിരുന്നു. പ്രോസിക്യൂഷനും പൊലീസും നിരത്തിയ തെളിവുകളും വാദങ്ങളുമൊക്കെ ഫാബ്രിക്കേറ്റഡ് ആണെന്ന ദിലീപിന്റെ വാദങ്ങളെ ശരിവയ്ക്കുന്നതാണ് ഇപ്പോള്‍ വന്ന കോടതി വിധി. ആ വിധിയെ അംഗീകരിക്കുന്നു. ദിലീപിനുണ്ടായ തകര്‍ച്ചയ്ക്ക് ആര് ഉത്തരവാദിത്വം പറയും. ദിലീപിനോട് നിരുപാധികം മാപ്പ് പറയുന്നു. എന്റെ ഹൃദയത്തില്‍ നിന്നുള്ള വാക്കുകളാണിത്. തെറ്റിദ്ധാരണകള്‍ മൂലം തെറ്റുകള്‍ സംഭവിക്കാം. അത് തിരുത്തപ്പെടുമ്പോഴാണല്ലോ നമ്മള്‍ നന്മയുള്ളവരായി മാറുന്നത്.’-ആലപ്പി അഷ്‌റഫ് വ്യക്തമാക്കി.

മമ്മൂട്ടി, വിനായകൻ എന്നിവരെ കേന്ദ്ര കഥാപാത്രങ്ങളാക്കി ജിതിൻ കെ ജോസ് സംവിധാനം നിർവഹിച്ച കളങ്കാവൽ 50 കോടി ക്ലബിൽ. റിലീസ് ചെയ്ത് നാലു ദിനം കൊണ്ടാണ് ചിത്രം ആഗോള ഗ്രോസ് ആയി 50 കോടി പിന്നിട്ടത്. ഏറ്റവും വേഗത്തിൽ 50 കോടി ക്ലബിൽ ഇടം പിടിച്ച മമ്മൂട്ടി ചിത്രമെന്ന റെക്കോർഡും ഇതിലൂടെ കളങ്കാവൽ സ്വന്തമാക്കി.

ഭീഷ്മപർവം, കണ്ണൂർ സ്‌ക്വാഡ്, ഭ്രമയുഗം, ടർബോ എന്നീ ചിത്രങ്ങൾക്ക് ശേഷം 50 കോടി ക്ലബിൽ ഇടം പിടിച്ച മമ്മൂട്ടി ചിത്രം കൂടിയാണ് കളങ്കാവൽ. ജിഷ്ണു ശ്രീകുമാറും ജിതിൻ കെ ജോസും ചേർന്ന് തിരക്കഥ രചിച്ച കളങ്കാവൽ, മമ്മൂട്ടി കമ്പനിയുടെ ബാനറിൽ നിർമ്മിച്ച ഏഴാമത്തെ ചിത്രം കൂടിയാണ്.

വേഫറെർ ഫിലിംസ് കേരളത്തിൽ വിതരണം ചെയ്ത ചിത്രം, ഓവർസീസ് ഡിസ്ട്രിബൂഷൻ നടത്തിയത് ട്രൂത് ഗ്ലോബൽ ഫിലിംസ് ആണ്. കുപ്രസിദ്ധമായ സയനൈഡ് മോഹൻ കേസിൽ നിന്ന് പ്രചോദനം ഉൾക്കൊണ്ട് ഒരുക്കിയ ചിത്രം ആദ്യാവസാനം പ്രേക്ഷകരെ ത്രില്ലടിപ്പിച്ചു കൊണ്ടാണ് തകർപ്പൻ വിജയം നേടുന്നത്.

കേരളത്തിലും വിദേശത്തും ഗംഭീര പ്രതികരണമാണ് ചിത്രം നേടിയത്. ബോക്സ് ഓഫിസിൽ വലിയ നേട്ടം സ്വന്തമാക്കുന്ന ചിത്രം, റിലീസ് ചെയ്ത് ആദ്യ നാല് ദിനം കൊണ്ട് കേരളത്തിൽ നിന്ന് മാത്രം നേടിയത് 18.5 കോടിക്ക് മുകളിലാണ്.

റസ്റ്റ് ഓഫ് ഇന്ത്യ മാർക്കറ്റിൽ നിന്ന് 4 കോടിയും പിന്നിട്ട് കുതിക്കുന്ന ചിത്രം വിദേശത്തു നിന്നും നേടിയത് 27 കോടിയോളമാണെന്നു റിപ്പോർട്ടുകൾ സൂചിപ്പിക്കുന്നു. ദുൽഖർ സൽമാൻ നായകനായെത്തിയ സൂപ്പർഹിറ്റ് ചിത്രം ‘കുറുപ്പ്’ന്റെ കഥ ഒരുക്കി ശ്രദ്ധ നേടിയ ജിതിൻ കെ ജോസ് ആദ്യമായി സംവിധാനം ചെയ്ത ചിത്രമാണ് കളങ്കാവൽ.

വിനായകൻ നായകനും മമ്മൂട്ടി പ്രതിനായകനും ആയെത്തിയ ചിത്രം, ഇവരുടെ അസാമാന്യമായ പ്രകടന മികവിലാണ് പ്രേക്ഷകരെ അമ്പരപ്പിക്കുന്നത്. കരിയറിൽ വീണ്ടും ഒരു നെഗറ്റീവ് വേഷത്തിലൂടെ മമ്മൂട്ടി ഞെട്ടിക്കുമ്പോൾ, വേറിട്ട പ്രകടനവുമായി വിനായകനും വലിയ കയ്യടിയാണ് നേടുന്നത്.

ചിത്രത്തിലെ സംഗീതവും ഉയർന്ന സാങ്കേതിക നിലവാരവും പ്രേക്ഷകരെ ആകർഷിക്കുന്നുണ്ട്. കേരളത്തിന് അകത്തും പുറത്തും പ്രേക്ഷക പിന്തുണയോടൊപ്പം വലിയ നിരൂപക പ്രശംസയും നേടുന്ന ചിത്രം, മമ്മൂട്ടിയുടെ കരിയറിലെ തന്നെ ഏറ്റവും വലിയ വിജയത്തിലേക്കാണ് കുതിക്കുന്നത്.

ജിബിൻ ഗോപിനാഥ്, ബിജു പപ്പൻ, രെജിഷ വിജയൻ, ഗായത്രി അരുൺ, മാളവിക, ശ്രുതി രാമചന്ദ്രൻ എന്നിവരാണ് ചിത്രത്തിലെ മറ്റു പ്രമുഖ താരങ്ങൾ. ലോക’ ഉൾപ്പെടെയുള്ള മലയാള ചിത്രങ്ങൾ തമിഴ്‌നാട്ടിൽ എത്തിച്ച ഫ്യുച്ചർ റണ്ണപ് ഫിലിംസ് ആണ് ചിത്രം തമിഴ്നാട് വിതരണം ചെയ്തത്. സിതാര എന്റെർറ്റൈന്മെന്റ്സ്, ലൈറ്റർ ബുദ്ധ ഫിലിംസ്, പെൻ മരുധാർ എന്നിവരാണ് ചിത്രം യഥാക്രമം ആന്ധ്ര/ തെലുങ്കാന, കർണാടകം, നോർത്ത് ഇന്ത്യ എന്നിവിടങ്ങളിൽ വിതരണം ചെയ്തിരിക്കുന്നത്.

സാമൂഹികമാധ്യമങ്ങളില്‍ തനിക്കെതിരേ നടക്കുന്ന അധിക്ഷേപപ്രചാരണങ്ങളില്‍ മറുപടിയുമായി നടിയെ ആക്രമിച്ച കേസിലെ അതിജീവിതയുടെ അഭിഭാഷക അഡ്വ. ടി.ബി. മിനി. ദിലീപും സംഘവും നടത്തുന്ന സൈബര്‍ ആക്രമണവും കൊലവിളിയും താന്‍ ശരിയായിരുന്നുവെന്ന് തെളിയിക്കുന്നതാണെന്ന് അഭിഭാഷക പറഞ്ഞു. താന്‍ തളരാന്‍ ഉദ്ദേശിക്കുന്നില്ലെന്നും ടി.ബി. മിനി ഫെയ്‌സ്ബുക്ക് പോസ്റ്റില്‍ വ്യക്തമാക്കി.

നേരത്തേ, ദിലീപ് റേപ്പ് ചെയ്താല്‍ കുഴപ്പമില്ലെന്ന് താന്‍ പറഞ്ഞതായി പ്രചാരണം നടക്കുന്നതില്‍ സത്യമില്ലെന്ന് വ്യക്തമാക്കി ടി.ബി. മിനി കുറിപ്പ് പങ്കുവെച്ചിരുന്നു. താന്‍ പറഞ്ഞതിലെ വാക്കുകള്‍ അടര്‍ത്തിയെടുത്ത് അര്‍മാദിക്കുന്നവരോട് സഹതാപം മതി. 12-ാം തീയതിക്കുശേഷം വിശദീകരിക്കും. ബലാത്സംഗം തന്നെ കുറ്റമാണ്. ക്വട്ടേഷന്‍കൊടുത്ത് അത് ചെയ്യിക്കുമ്പോള്‍ ഇരട്ട കുറ്റകൃത്യമാണെന്നും അവര്‍ പറഞ്ഞു.

‘ഞാന്‍ തന്നെയാണ് ആ പെണ്‍കുട്ടി എന്നുവിചാരിച്ച് നടക്കുന്ന ഒരാളാണ്. അതിലപ്പുറം എന്റെ സഹോദരിയാണെന്ന് കരുതി രാപ്പകലില്ലാതെ അവരുടെ നീതിക്കുവേണ്ടി അധ്വാനിക്കുന്ന എന്നെ അപകീര്‍ത്തിപ്പെടുത്തുക അവരുടെ ലക്ഷ്യമാണ്. ഞാനതില്‍ കുലുങ്ങില്ല. കേരള സമൂഹം കുറ്റവാളികളുടേതല്ല’, അഡ്വ. ടി.ബി. മിനി കൂട്ടിച്ചേര്‍ത്തു.

സിനിമാമേഖലയിലെ തൊഴിലാളി സംഘടനയായ ഫെഫ്കയിൽ നിന്ന് രാജിവെച്ച് ഡബ്ബിംഗ് ആർട്ടിസ്റ്റ് ഭാഗ്യലക്ഷ്മി. നടൻ ദിലീപിനെ തിരിച്ചെടുക്കാനുള്ള നീക്കത്തിൽ പ്രതിഷേധിച്ചാണ് രാജി. ഇനി ഒരു സംഘടനയിലും ഭാഗമാകില്ലെന്നും ഭാഗ്യലക്ഷ്മി അറിയിച്ചു.

അതേസമയം നടിയെ ആക്രമിച്ച കേസിൽ ദിലീപിനെ കുറ്റവിമുക്തനാക്കിയതിന് പിന്നാലെ അദ്ദേഹത്തെ തിരിച്ചെടുക്കുന്നതുസംബന്ധിച്ചുള്ള വിഷയത്തിൽ ഫെഫ്ക ജനറൽ സെക്രട്ടറി ബി. ഉണ്ണികൃഷ്ണൻ നിലപാട് വ്യക്തമാക്കിയിരുന്നു. വിഷയത്തിൽ ഡയറക്ടേഴ്സ് യൂണിയൻ തീരുമാനമെടുക്കുമെന്നും വിധിന്യായത്തിലേക്കെത്തിയ സാഹചര്യം ഫെഫ്ക പഠിക്കുമെന്നും അദ്ദേഹം പറഞ്ഞു.

നടിയെ ആക്രമിച്ച് അപകീർത്തികരമായ ദൃശ്യങ്ങൾ പകർത്തിയെന്ന കേസിൽ എട്ടാംപ്രതിയായ നടൻ ദിലീപിനെ ഇന്നലെ വിചാരണക്കോടതി വെറുതേവിട്ടിരുന്നു. ദിലീപ് ഉൾപ്പെടെ നാലുപ്രതികളെയാണ് കോടതി വിട്ടയച്ചത്. ദിലീപിനെതിരേയുള്ള ക്രിമിനൽ ഗൂഢാലോചനക്കുറ്റവും തെളിവ് നശിപ്പിച്ചെന്ന കുറ്റവും തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് കോടതി വിലയിരുത്തിയിരുന്നു .

തനിക്കെതിരേ ഉന്നത പോലീസ് ഉദ്യോഗസ്ഥരുടെ നേതൃത്വത്തില്‍ ഗുഢാലോചന നടന്നൂവെന്ന നടന്‍ ദിലീപിന്റെ ആരോപണം അദ്ദേഹത്തിന്റെ തോന്നല്‍ മാത്രമാണെന്ന് മുഖ്യമന്ത്രി പിണറായി വിജയന്‍. സ്വയം ന്യായീകരിക്കാന്‍ പറയുന്നതാണത്. അന്വേഷണ ഉദ്യോഗസ്ഥര്‍ അവര്‍ക്ക് മുന്നിലെത്തിയ തെളിവിന്റെ അടിസ്ഥാനത്തിലാണ് നടപടികളെടുക്കുന്നതെന്നും മുഖ്യമന്ത്രി പറഞ്ഞു.

വിധിയുടെ വിശദാംശങ്ങള്‍ വരാനിരിക്കുന്നതേയുള്ളൂ. അത് വന്നാല്‍ മാത്രമേ കാര്യങ്ങള്‍ വ്യക്തമാവുകയുള്ളൂ. പ്രോസിക്യൂഷന്‍ നല്ല രീതിയില്‍ കേസ് വാദിച്ചിട്ടുണ്ട്. ബാക്കി കാര്യങ്ങള്‍ ആലോചിച്ച് ചെയ്യുമെന്നും മുഖ്യമന്ത്രി പറഞ്ഞു.

സര്‍ക്കാരിന് ഒരു ജോലിയുമില്ലാത്തത് കൊണ്ടാണ് അപ്പീല്‍ പോവുന്നതെന്നാണ് യുഡിഎഫ് കണ്‍വീനര്‍ പറഞ്ഞത്. ഇതാണ് യുഡിഎഫിന്റെ നിലപാട്. പൊതുസമൂഹത്തിന്റെ നിലപാട് അങ്ങനെയല്ലെന്നും മുഖ്യമന്ത്രി പറഞ്ഞു. സര്‍ക്കാര്‍ എന്നും അതീജീവിതയ്‌ക്കൊപ്പമാണ്. അടൂര്‍പ്രകാശിന്റേത് നാടിന്റെ വികാരത്തിന് എതിരായുള്ള പരമാര്‍ശമായിപ്പോയെന്നും അദ്ദേഹം വ്യക്തമാക്കി.

പോലീസ് ഉദ്യോഗസ്ഥരുടെ ഗുഢാലോചനാ സംബന്ധിച്ച് ദിലീപ് എതെങ്കിലും പരാതിയോ നിവേദനമോ നല്‍കിയത് ഓര്‍മയില്ല. ക്രിമിനല്‍ പോലീസ് എന്നെല്ലാമുള്ള ആരോപണം സ്വയം ന്യായീകരിക്കാന്‍ പറയുന്നതാണെന്നും മുഖ്യമന്ത്രി പറഞ്ഞു.

നടൻ മമ്മൂട്ടിക്ക് ഇത്തവണ വോട്ടില്ല. സംസ്ഥാനത്തെ ഏഴ് ജില്ലകളില്‍ ഇന്ന് വോട്ടെടുപ്പ് നടക്കവെയാണ് മമ്മൂട്ടിക്ക് ഇത്തവണ വോട്ടില്ല എന്ന വാര്‍ത്ത പുറത്തുവരുന്നത്. വോട്ടര്‍ പട്ടികയില്‍ പേരില്ലാത്തതിനാല്‍ മമ്മൂട്ടിക്ക് വോട്ട് ചെയ്യാനാവില്ല. പൊന്നുരുന്നിയിലെ സികെസി എല്‍പി സ്‌കൂളിലെ നാലാം ബൂത്തിലായിരുന്നു കഴിഞ്ഞ തവണ വരെ മമ്മൂട്ടി വോട്ട് ചെയ്തിരുന്നത്.

തഅതേസമയം ദ്ദേശ തെരഞ്ഞെടുപ്പിന്റെ ഒന്നാംഘട്ട വോട്ടെടുപ്പിന് ഇന്ന് തുടക്കം കുറിക്കുകയാണ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം ജില്ലകളിലാണ് ആദ്യഘട്ട വോട്ടെടുപ്പ് നടക്കുക. 595 തദ്ദേശസ്ഥാപനങ്ങളിലായി 11,167 വാര്‍ഡുകളിലേക്ക് 36,620 സ്ഥാനാര്‍ത്ഥികളാണ് ജനവിധി തേടുന്നത്. രാവിലെ ആറിന് മോക്‌പോളിങിന് ശേഷം ഏഴ് മണി മുതല്‍ വൈകീട്ട് ആറ് വരെയാണ് വോട്ടെടുപ്പ്.